Read Zokam Malachi 2 Bible Online

Malachi 2 - Zokam bible

Malachi 2

¹"Siampite aw, hih vauhilhna note ading ahi hi.

²Thu ngai loin ka min pahtawi ding na ngaihsut kei uh leh kong hamsiat dinga, na thuphate uh ka hamsiat ding hi," Thahatpen TOPA in ci hi. "Hihi, na lungsimun kei pahtawi ding ngaihsun lo na hi manun amaute ka hamsiat khin hi.

³"Note hangin na suante a[2] uh ka tai b[3] ding hi; na pawi biakpiaknate uh ek na maitanguah tatin tua tawh hong kipuakhia khawm ding hi.

⁴Tuateh Levi tawh ka thukhun a kizopsuak theih nadingin hih vauhilhna note kong piak ahilam na thei ding uh hi," Thahatpen TOPA in a ci hi.

⁵"Nuntakna le lemna thukhun amah tawh omkhawm a, ama tunga ka piak ahi hi; hih in kihtak ding hi-a amah in kei hong kihta in ka min a zahtak mahmah hi.

⁶Ama kam sungah thumaan lahna oma a muk ah khialhna khat beek kimu lo hi. Amah lungnuamtak le tangtakin kei tawh tonkhawm a, mawhna pan mi tampi a kiheisak hi.

⁷Siampipa kam in theihna a kep kula a mukpanin mite in hilhna a zong ding uh hi - bang hang hiam cih leh amah Thahatpen TOPA thupuakpa ahi hi.

⁸Ahi hangin lampi panin nang na pial khina, na thuhilhna in mi tampi muktusak zo hi. Levi tawh na thukhun na palsat khin hi," Thahatpen TOPA in ci hi.

⁹"Tua ahi ciangin keima lampi zui loin thukham thu ah mi deidan na hi manin mi khempeuh mai-ah mi simmawh le a mindai-in kong omsak hi," a ci hi.

¹⁰I vekin Pa c[4] khat nei hi lo i hi hiam? Eite Pasian khat piansak hi lo i hi hiam? Bang hanga eite khat le khat kimuanna palsatin i pate thukhun buahsak i hi hiam?

¹¹Judah in a muanhuaina a siasak hi. Israel le Jerusalem sungah a kihhuai na kisem khin hi: Judah in gamdang pasian’ tanu tenpihna tawh TOPA it munsiangtho a ninsak zo hi.

¹²Hih banga gamta mi peuhmah akua akua hita leh Thahatpen TOPA tungah biakna puak taleh - Jacob puanbuk panin TOPA in khenkhia ta hen. d[5]

¹³Na sep lai uh adang khat in: TOPA biakna-tau khitui na tuumsak uh hi. Amah lungkim loin biakna-a na piakte uh na khut panun hong sang loin zong thudon nawn lo ahi manin kapin na thum uh hi.

¹⁴"Bang hang hiam?" na ci uh hi. Tua pen na lawmnu thuciamna tawh na tenpih hi napi, amah tawh na kimuanna uh palsat na hi manin TOPA in nang le na khangno lai-a na zi kikal ah teci a suak dingin a deihna hang ahi hi.

¹⁵Tua TOPA in amaute khat a suahsaksa hi lo hiam? A pumpi uh le a kha uh ama aa ahi hi. Bang hanga khat suak ahi hiam? Bang hang hiam cih leh a pasian mi ding suan le khak e[6] a zong ahi hi. Tua ahi ciangin na lungsim uh no le no kikem unla na khangno lai zite uh tawh na muanhuaina uh palsat kei un.

¹⁶"TOPA Israel Pasian in: ‘Zi makna ka mudah hi,’ ci-a, ‘Pasal amah le amah f[7] ngongtatna tawh kihu-a a puantual tawh kiliahte ka mudah hi,’ Thahatpen TOPA in ci hi. Tua ahi manin nangma lungsim nangman kem inla na muanhuaina palsat kei in.

¹⁷Na kammalte uh tawh TOPA na gimsak uh hi. "Bangci gimsak ka hi hiam?" na ci uh hi. "TOPA muhna ah a sia-a gamtate hoihsa a, amaute tungah a lungkim hi," ahikeh "A thutang Pasian koi-ah om hiam," cihna tawh na gimsak uh hi.