Read Zokam Malachi 3 Bible Online

Malachi 3 - Zokam bible

Malachi 3

¹"En un ka lampi a sial dingin ka mai-ah ka kamtaipa ka sawl ding hi. Tua khitphetin na zonzon uh Topa a biakinnpi ah hong pai ding hi. Na lunggulh uh thukhun kamtaipa hong pai ding hi," Thahatpen TOPA in a ci hi.

²Ahi hangin ama hong pai ding ni kua in thuakzo ding hiam? Amah hong kilat ciangin kua in nang zo ding hiam? Ahang in, amah sik siansakna mei ahikeh puan sawpsiangna saban tawh kibang ding hi.

³Amah ngunte haltui-in a siangsakpa bangin a tu ding hi; amah in Levi-te siangsakin ngun le kham bangin a halsiang ding hi. Tua ciangin TOPA in thumaanna biakna a puak mi nei dinga

⁴a beisa kum le nite bangin Judah le Jerusalem-te’ biaknate TOPA in a sang ta ding hi.

⁵"Tua ciangin note kiangah thukhen dingin kong pai ding hi. Keimah in aitawi-te, numei tawh mawhte le ciampelte, nasemte thaman a khembawlte, meigongte le pa nei lote a nengniam a, pemtate thutangna a thusim lote le kei hong kihta lote langah teci pangin manlangin thu ka khen ding hi," Thahatpen TOPA in ci hi.

⁶"TOPA keimah ka kikhel kei hi. Tua ahi ciangin no Jacob suante na kisia nai kei uh hi.

⁷Na pute uh hun lai-a kipan ka thukipte panin na pial uh a, na zui kei uh hi. Hong kihei un, kei zong no lamah kong kihei ding hi," Thahatpen TOPA in ci hi. "Ahi hangin note in, ‘Bang hong kici hei ding ka hi uh hiam?’ na ci uh hi.

⁸"Mi khat in Pasian a buluh ding mah ahi hiam? Tua hi napi note in kei nong buluh uh hi. "Ahi hangin, ‘Bang hong ci buluh ka hi uh hiam?’ na ci uh hi. "Sawma khat le biaknate ah nong buluh uh hi.

⁹Note in kei hong buluh na hi manun na minam buppi un hamsiatna nuai-ah na om uh hi.

¹⁰Ka inn sungah an a om theih nadingin ansal sungah sawma khat a buppi-in hong puak un. Kei hong zia-et dih un. Vantung kongkhak zapite hongin a koih nading na neih loh zah dongun thupha kong sungkhia hiam, kong sungkhia kei hiam?" Thahatpen TOPA in ci hi.

¹¹"Na ankungte uh a kinektum loh nadingin lungnote ka dal dinga, na lo-ua lengguite a gah a mawk pulh kei ding hi," Thahatpen TOPA in ci hi.

¹²"Tua hun ciangin na gam uh leitang hoih mahmah suak ding ahi manin minam khempeuh in note thupha ngah hong ci ding uh hi," Thahatpen TOPA in ci hi.

¹³TOPA in, "Kei langah kamkhauh na pau uh hi," a ci hi. "Tua hi napi, ‘Nang langah bang gen ka hi uh hiam?’ na ci uh hi.

¹⁴"‘Pasian na i sep a mawkna hi. Ama deih bangin gamta-in Thahatpen TOPA mai-ah a thumte bangin i pai hangin bang lawhtak i hi hiam?

¹⁵Ahi zongin tu-in a kiphasakte thupha ngah i ci hi. A gamtatsiate lawhcingzaw taktaka, Pasian a tote nangawn suakta uh hi,’ na ci uh hi," a ci hi.

¹⁶Tua ciangin TOPA a kihtate khat le khat kihopih uh a, TOPA in ngai-in a za hi. Ama omna ah TOPA kihta a, a min a pahtawite tawh kisai phawk tawntungna laizial khat sungah kigelh hi.

¹⁷"Ka neih ding goute ka bawl hun ciangin a[8] amaute kei aa ahi ding uh hi," Thahatpen TOPA in ci hi. "Mi khat in ama na a sem a tapa a khuatuah bang tektekin kei zong ka hawi ding hi.

¹⁸Tua ciangin a thumaante le migilote, Pasian’ na a semte le a sem lote a kikhentuamna na mu ding uh hi.