Read Zokam Malachi 4 Bible Online

Malachi 4 - Zokam bible

Malachi 4

¹"A ni hong tung takpi ta hi; pummei-a kang hong bang ding hi. A kiphasakte le migilote khempeuh ninpa keu tawh kibang ding uh a, hong tung ding tua ni-in amaute meikhuk ah a khul ding hi," Thahatpen TOPA in ci hi. "A bul a hiangin amaute a kinusiat kei ding hi.

²Ahi hangin ka min a kihta note adingin a khate tungah damna tuangin thumaanna ni a suak ding hi. Tuateh bawngnote a kikhumna pan kikhahkhia-a a dian uh bangin paikhia-in na diang ding uh hi.

³Tua ciangin migilote na tuancil ding uh a, hih nate ka hih ni ciangin amaute na khepek nuai-ua vut a suak ding uh hi," Thahatpen TOPA in ci hi.

⁴"Ka nasempa Moses thukham, Israel-te khempeuh adinga Horeb a amah ka piak ka thukipte le ka thukhamte phawk un.

⁵"Ngai un, a lauhuai mahmah TOPA ni lian hong tun ma-in kamsangpa Elijah kong sawl ding hi.

⁶Amah in a pa lungsim a tate lamah hei dinga, a tate lungsim a pate lamah a hei ding hi. Tua hi kei leh kei hong pai-in na gam uh hamsiatna tawh ka susia ding hi," a ci hi.