Read Zokam Matthew 1 Bible Online

Matthew 1 - Zokam bible

Matthew 1

¹Abraham suan David tapa Jesu Christ khang ciamtehna:

²Isaac pa Abraham, Jacob pa Isaac, Judah le a sanggam pasalte pa Jacob,

³A zi Tamar tawh a neih a tapa Perez le Zerah pa Judah, Hezron pa Perez, Ram pa Hezron,

⁴Amminadab pa Ram Nahshon pa Amminadab, Salmon pa Nahshon,

⁵A zi Rahab tawh a neih a tapa Boaz pa Salmon, A zi Ruth tawh a neih a tapa Obed pa Boaz, Jesse pa Obed,

⁶Kumpi David pa Jesse. Uriah zi a hi ngei tawh a neih a tapa Solomon pa David,

⁷Rehoboam pa Solomon, Abijah pa Rehoboam, Asa pa Abijah,

⁸Jehoshaphat pa Asa, Joram pa Jehoshaphat, Uzziah pa Joram,

⁹Jotham pa Uzziah, Ahaz pa Jotham, Hezekiah pa Ahaz,

¹⁰Manasseh pa Hezekiah, Amon pa Manasseh, Josiah pa Amon,

¹¹Babylon khua pi-a a saltan lai-ua a neih Jeconiah a[1] le a sanggam pasal teng pa Josiah.

¹²Babylon a, a saltan khit uh ciang in: Shealtiel pa Jeconiah, Zerubbabel pa Shealtiel,

¹³Abiud pa Zerubbabel, Eliakim pa Abiud, Azor pa Eliakim,

¹⁴Zadok pa Azor, Akim pa Zadok, Eliud pa Akim,

¹⁵Eleazar pa Eliud, Matthan pa Eleazar, Jacob pa Matthan,

¹⁶Joseph pa Jacob hi-a, Joseph zi Mary sung panin Christ kici Jesu a suak hi.

¹⁷Hih bangin Abraham pan David dong khang sawm le li, David pan Babylon a saltan dong khang sawm le li hi-a, saltan khit pan Christ a[2] dong khang sawm le li ahi hi.

¹⁸Jesu Christ suahzia hih bang ahi hi. A nu Mary, Joseph tawh kiteng dinga kidongsa ahi hi. Amau gel a kigawm ma-un Khasiangtho in Mary a gaiisak hi.

¹⁹A pasal Joseph, mi lungsim dik hi-a, mi lakah daisak nuam loin maksim ding a sawm hi.

²⁰Ahi hangin tua banga a ngaihsut laitakin Topa vansawltak khat a mang sungah kilanga, "David tapa Joseph aw, Mary paii nau pen Khasiangtho pan ahi manin amah na tenpih ding lauthawng kei in.

²¹Tapa khat a nei ding hi; tua tapa in ama mite a mawhna uh panin honkhia ding ahi manin a min Jesu b[3] na phuak in," a ci hi.

²²Kamsangpa tungtawna Topa gensa a tangtun nadingin hihte khempeuh a piang ahi hi.

²³"Tua nungak bit gaii-in tapa khat nei dinga, ama min Immanuel kici ding hi" c[4] a khiatna in, "Eite tawh Pasian om khawm" cihna ahi hi.

²⁴Joseph a khanlawh ciangin Topa vansawltak thupiak bangin manga, Mary a tenpih hi.

²⁵Ahi hangin tapa a suah matengin a luppih kei hi. A suah ciangin a min Jesu a phuak hi.