Read Zokam Matthew 10 Bible Online

Matthew 10 - Zokam bible

Matthew 10

¹Amah in a nungzui sawm le nihte samin kha gilote a[36] a hawlkhiat theih nading uh le natna satna namkim a damsak theih nadingun thuneihna a pia hi.

²Hihte, sawltakpi sawm-le-nihte min ahi hi: Amasa penin Simon (Peter kici) le a sanggampa Andrew; Zebedee tapa James le a saggampa John;

³Philip le Bartholomew; Thomas le siah dong Matthew; Alphaeus tapa James le Thaddaeus;

⁴Zealot pawl-a Simon le Jesu lehhekpa Judas Iscariot-te ahi hi.

⁵Jesu in sawm-le-nihte thu hilhin hih bangin a sawlkhia hi: "Gentile-te lakah pai kei unla Samaria-te khua ah zong lut kei un.

⁶Israel tuu mangthangte lak bekah pai un.

⁷Na pai kawmun, ‘Vantung gam hong nai ta hi,’ cih thupuak va hilh un.

⁸Cinate damsak unla misite thosak un. Miphakte b[37] siangsak unla, dawite hawlkhia un. Man nei lo-a na ngah bangun man nei loin na pia un.

⁹Na kawnggak sung uhah kham, ngun le sumsante khat beek vom kei un.

¹⁰Na khualzinna uhah thung-ip ahi zongin puantungsilh val ahi zongin khedap le ciangkhutte keng kei un. Ahang in, nasemte in a nekkhop ding uh ngah na ding uh hi.

¹¹Khuapi ahikeh khuaneu khat peuh peuhah na lut uh ciangin zintun nadinga kilawm mi zong unla, na ciah mateng uh tuapa innah om un.

¹²Tua innah na lut uh ciangin hopih masa un.

¹³Tua innah nopna a tung dinga kilawm ahileh na piak uh nopna om ta hen; a kilawm lo ahileh na piak uh nopna no tungah hong kileh kik ta hen.

¹⁴Note hong sang lo, na thu uh a ngai nuam lo khua le innte na nusiat uh ciangin na khepek-ua leivuite na singkhia un.

¹⁵Thutak kong geninah, thukhen ni ciangin tua khua thuak nading sangin Sodom le Gomorrah thuakna a zangzaw ding hi.

¹⁶"Ngiate lakah tuute bangin note kong sawlkhia hi. Tua ahi ciangin gul bangin na pilvang unla, vakhu bangin na cinghkam un.

¹⁷Ahi hangin mite lakah na kigalging un; amaute in tualsung vaihawmte khutah note hong puak ding uh a, amaute synagogue-te sungah note hong sat ding uh hi.

¹⁸Keima hangin gam-ukte le kumpite mai-ah hong puak ding uh a, tuate tung le Gentile-te tungah ka teci na hi ding uh hi.

¹⁹Ahi hangin note hong mat uh ciangin bang ka gen ding hiam, bang ka ci gen ding hiam, ci-in lunghimawh kei un. Tua hun ciangin na gen ding uh hong kihilh ding hi.

²⁰Ahang in, no a gen hi loin no tungtawnin na Pa uh’ Kha in a gen ding hi.

²¹"Sungkhat suak unau khat le khat ahi zongin, pata ahi zongin, sih nading dongin a kilehhek ding uh hi. Nu le pa-te langah tate pang ding uh a, thatsak ding uh hi.

²²Keima hangin mi khempeuh in note hong mudah ding uh hi. Ahi hangin a tawp donga kipte kihonkhia ding hi.

²³Mun khatah bawlsiatna na thuak uh leh a mundang khatah na tai un. Thutak kong geninah, Mihing Tapa hong pai ma-in Israel gam khuapite na sikkim man kei ding uh hi.

²⁴"Sang naupangte a siate sangin siamzaw lo-a, nasemte a pu sangin a lianzaw kei hi.

²⁵Sang naupangte a siapa a bata nasemte a pu a bat nak leh phazo hi. Inn sunga pa pen Beelzebub c[38] a kicih leh a innkuanpihte kinak cih ngel ve!

²⁶"Tua ahi ciangin amaute na kihta kei un. A kilakkhia lo dinga kiselcip bangmah a om kei hi; a kitheikhia lo dinga ki-imcip zong bangmah a om kei hi.

²⁷Khuamial sunga note kong hilhte khuavak sungah gen un. Na bil-ua hong kihuausimte innkhum pan na tangko un.

²⁸Pumpi a thah hangin kha a that thei lote kihta kei un. Kha le pumpi meili sunga a siasak thei pa na kihta zaw un.

²⁹Kawlgit nih in dangkasan d[39] khat man lel hi lo ahi hiam? Ahi zongin na Pa uh deihna ahikeh tuate khat nangawn zong lei-ah a mawk kiat kei ding hi.

³⁰Na lu ua samzang khempeuh zong kisim khin hi.

³¹Tua ahi ciangin lau kei un; Kawlgit tampi sangin na manphazaw uh hi.

³²"Mite mai-a kei hong gumte peuh mah vantunga om ka Pa mai-ah kei zong ka gum ding hi.

³³Mite mai-a hong kitheihmawhbawlte peuhmah vantunga om ka Pa mai-ah ka kitheihmawhbawl ding hi.

³⁴"Leitungah kilemna puak dingin hong pai hi, ci-in na vawh kha kei un. Kilemna puak dinga hong pai ka hi kei-a namsau khah dinga hong pai ka hizaw hi.

³⁵" ‘A pa langah tapa pangsak ding, a nu langah tanu pangsak ding, a teknu langah monu pangsak ding -

³⁶mi khat gal ama innkuanpihte mah a hisak dinga’ e[40] hong pai ka hi hi.

³⁷"Kei sangin a nu a pa a itzawte peuhmah kei adingin a cin kei hi. Kei sangin a tanu, a tapate a itzawte peuhmah kei adingin a cin kei hi.

³⁸Ama singlamteh kisuana ka nung hong zui lote peuhmah kei adingin a cin kei hi.

³⁹Ama nuntakna a hu nuamte peuhmah in taan dinga keima hanga a nuntakna a taan peuhmah in a nuntakna a hu ding hi.

⁴⁰"No hong sangte, kei hong sang hi-a, kei hong sangte, kei hong sawlpa a sang ahi hi.

⁴¹Kamsangpa, kamsang ahi mana a sang peuhmah in kamsangpa pahtakman a ngah ding hi. Thumaan mipa, mi thumaan ahi mana a sang peuhmah in thumaan mipa pahtakman a ngah ding hi.

⁴²Thutak kong geninah, hih naupangnote lakah khat peuhpeuh keima nungzui ahi mana tuisik hai khat a suah peuhmah in ama pahtakman a taan peuhmah kei ding hi," a ci hi.