Read Zokam Matthew 13 Bible Online

Matthew 13 - Zokam bible

Matthew 13

¹Tua ni mah in tua inn pan Jesu paikhia a, tuilipi gei-ah a tu hi.

²A kimkotah mi tam lua ahi manin amah gunkuang sungah pai-in a tu hi. Mihonte a hileh tuigei ah a ding uh hi.

³Amah in gentehnate-in na tampi gena: "Lokhopa khat ama khaici vawh dingin a kuankhia hi.

⁴Khaici a theh ciangin pawlkhat lam-dungah tu-a vasate pai-in a nemang uh hi.

⁵Pawlkhatte leitak tam lohna mun suang lakah a tu hi. Leitak dai ahi manin popah sam hi.

⁶Ahi hangin ni a san ciangin ankungte kangdulh a, zung kha lo ahi manin a vulpah hi.

⁷Pawlkhat ling lakah tu-a a po tei hangin lingkung in a depgawp hi.

⁸A dang pawlkhat pen lei hoihna ah tu-in, a kivawh zah za khat, azah sawmguk, azah sawmthum a gahkhia hi.

⁹Bil nei peuh in za ta hen," a ci hi.

¹⁰Ama kiangah nungzuite va pai uh a, "Bang hangin gentehnate tawh mite hilh na hi hiam?" ci-in a dong uh hi.

¹¹Amah in, "Vantung gam thusimte theih theihna no tungah hong kipiak hangin amaute tungah a kipia kei hi.

¹²A nei peuhpeuh kipiakbeh ding a, tampitak a nei ding hi. A nei lo peuhmah tung panin a neihsa nangawn kilakkhiatsak ding hi.

¹³Hih thu hangin amaute kiangah gentehnate ka gen hi: "Amaute in en napi a mutel thei kei uh hi; amaute in ngai napi zatel thei loin a theitel thei kei uh hi.

¹⁴Amaute tungah kamsangpa Isaiah in: ‘"Note in na zak ngitnget uh hangin, na theitel ngei kei ding uh hi; na muh ngitnget uh hangin na mutel ngei kei ding uh hi.

¹⁵Hih mite lungtang kheeng lua ahi manin; a bil uh tawh za mialmial in, a mit uh si uh hi. Tua hi kei leh a mit-un mu-in a bil uh tawh za-in a lungtang uh tawh theitel in kihei ding uh a, amaute ka damsak kha ding hi,’ a[52] ci-a a genkholhna tangtung hi.

¹⁶"Note na hi uh leh na mitun mu thei na hi manun na mit uh thupha ngah hi-a; na bilun za thei na hi manun na bil uh thupha ngah ahi hi.

¹⁷Thutak kong geninah, kamsangte le mi thumaan tampite in na muhte uh a muh nop uh hangin mu lo uh a, na zakte uh a zak nop uh hangin a za kei uh hi.

¹⁸"Tua ahileh khaici vawhpa tawh gentehna bang cihnopna hiam, cih na ngai un:

¹⁹Mi khatpeuh in vantung gam thu a zak hangin a theihtel kei leh, gilopa pai-in a lungtang sunga kivawhsate a sutkhia hi. Hih khaici pen lamdunga tute ahi hi.

²⁰Suang laka tute ahileh thu a zak ciangin lungdamin thakhatin a sangpahte ahi hi.

²¹Ahi hangin zung kha lo ahi manin tawmvei sung bek a hing zo hi. Thu hangin lungmanna ahi zongin bawlsiatna ahi zongin a tun ciangin pukmang pah hi.

²²Ling laka tute ahileh thu za napi hih leitung nuntak nading lunghimawhna le hauhna’ khemna in depgawp a gah a gah lote ahi hi.

²³Ahi hangin lei hoihna-a tute ahileh thu a zak uh ciangin a theitel pah mipa ahi hi. Tuate a kivawh zah za khat, azah sawmguk, azah sawmthum a gahpa ahi hi," ci-in a dawng hi.

²⁴Jesu in gentehna dang khat gen a: "Vantung gam pen ama lo sunga khaici hoih a vawh mi khat tawh kibang hi.

²⁵Ahi hangin mi ihmut kalin a galpa va pai-a buh kivawhna ah tahum a vawh khit ciangin a paikhia hi.

²⁶Buh poto in a vuih ciangin tahumte zong a kilang hi.

²⁷"Lo nei pa kiangah nasemte pai uh a, ‘Pu aw, na lo sungah khaici hoih vawh hi lo na hi hiam! Hih tahumte koi pana hong piang ahi hiam?’ ci uh hi.

²⁸"Amah in, ‘Hih in galpa hih ahi hi,’ ci-in dawng hi. "A nasemte in, ‘Pai-in va botkhia le ung na phal hiam?’ ci-in dong uh hi.

²⁹"‘Tahumte bot le uh cin buh tawh botkhawm kha ding na hi manun ka phal kei hi.

³⁰Anlak hun mateng pokhawm tadih hen. Tua hun ciangin anlate kiangah: Tahumte khawm masa unla khultum dingin a lomlomin hen un; tua ciangin buh teng kaikhawm unla, ka sal sungah na koih un,’ ka ci ding hi," a ci hi.

³¹Jesu in amaute tungah gentehna dang khat gena: "Vantung gam in mi khatin a lo sungah a cin ankam tang tawh kibang hi.

³²Tua ankam tang, khaici khempeuh lak pan a neu pen hangin a khan ciangin huan ankungte khempeuh lakah a lian pen ahi hi; kungpi a suah ciangin vana vasate pai-in a hiangte tungah a tuang uh hi," a ci hi.

³³Jesu in gentehna dang khat genbeh lai-a: "Vantung gam in, numei khat in a mekman buhnel lompi b[53] khat a tawkkim zo-a kisawh silngo tawh kibang hi," a ci hi.

³⁴Jesu in mihonpite kiangah hih thute khempeuh gentehna tawh a hilh hi. Gentehna zang loin amaute kiangah bangmah a gen kei hi.

³⁵Hih in kamsangpa tungtawna kigen: "Gentehnate zangin ka kamka dinga, leitung piansak cil-a kipan a ki-imcip thute ka genkhia ding hi," c[54] cih thu a tangtunna ahi hi.

³⁶Tua ciangin mihonpite nusia in inn sungah a lut hi. Nungzuite a kiangah va pai uh a, "Lo sunga tahumte tawh gentehna hong hilhcian dih in," a ci uh hi.

³⁷Jesu in, "Khaici hoih a vawhpa, Mihing Tapa ahi hi.

³⁸Lo sung pen leitung hi-a khaici hoih in kumpi-gam tapate cihna ahi hi. Tahum ahileh gilopa tate cihna ahi hi.

³⁹Tua tahum tangte a vawh galpa in dawimangpa ahi hi. An lak hun in tu khang bei hun hi-a anlate in vansawltakte ahi hi.

⁴⁰"Tahumte kibotin mei-ah a kikhul mah bangin, tu khanghun a bei ciangin zong tua mah bang ahi ding hi.

⁴¹Mihing Tapa in ama vansawltakte sawlkhia dinga, a gam sungah mawhna a piangsak na khempeuh le gitlohna a hihte khempeuh a botkhiasak ding hi.

⁴²Tua vansawltakte in amaute a sa mahmah mei-am khukpi sungah a khul ding uh hi. Tua munah kahna le hagawina a om ding hi.

⁴³A thumaante ahileh tua hun ciangin amau Pa gam sungah ni bangin a tang ding uh hi. Bil nei peuh in za ta hen.

⁴⁴"Vantung gam in lo lai-a kisel gou tawh kibang hi. Mi khat in tua gou a muh ciangin sel-a, lungdamin ciaha, a neih khempeuh a zuak khit ciangin tua lo a lei hi.

⁴⁵"Khat leuleu ah vantung gam in kepmanpha hoih a zong sumbukpa tawh kibang hi.

⁴⁶Tam a man mahmah kep manpha khat a muh ciangin ciah kika, a neih khempeuh a zuak khit ciangin tua kepmanpha a lei hi.

⁴⁷"Khatvei leuleu, vantung gam in, tui sunga a kikhuh ciangin ngasa namkim a awk len tawh kibang hi.

⁴⁸Len dima ngasa a awk khit ciangin ngasa bengte in tui gei-ah a kaikhia uh hi. Tua ciangin amaute tu uh a, ngasa hoih teng khawmin bawm sungah koih uh a, a hoih lo teng a pai uh hi.

⁴⁹Tu khanghun a bei ciangin hih bang ahi ding hi: Vansawltakte hong pai-in mi thumaante lak pan a tatsia mite khenkhia ding uh a,

⁵⁰a sa mahmah mei-am khukpi sungah a khul ding uh hi. Tua mun ah kahna le hagawina a om ding hi" a ci hi.

⁵¹Jesu in, "Hih thu teng na theitel uh hiam?" ci-in a dong hi. Amaute in, "Theitel mah ung," ci-in a dawng uh hi.

⁵²Amah in amaute kiangah, "Tua ahi ciangin vantung gam thu tawh kisai-a lam a kilaksa thukham siate khempeuh, ama sumkholna pana a gou a lui le a thak a pusuahkhia inn neipa tawh kibang hi," a ci hi.

⁵³Jesu in hih gentehna teng a gen khit ciangin tua mun panin a paikhia hi.

⁵⁴Ama khua a tun ciangin synagogue sungah mite thuhilh kipana, amaute in lamdang a sa uh hi. Amaute in, "Hih pilna le hih bang nalamdang bawl theihna vangte hih pa in koi pana a ngah ahi hiam?

⁵⁵Khutsiampa tapa hi lo ahi hiam? Anu min Mary hi-a James, Joseph, Simon le Judas-te ama sanggam hilo ahi hiam?

⁵⁶A sanggam numeite ei tawh tengkhawm hilo ahi hiam? Tua ahileh hih pa in, hihte khempeuh koi pana a ngah hiam?" ci-in a kidong uh hi.

⁵⁷Tua ciangin amaute in amah a phunsan uh hi. Ahi hangin Jesu in amaute kiangah, "Kamsangpa in ama khua sung le ama inn sung bekah pahtawina a ngah kei hi," a ci hi.

⁵⁸Tua hi-a amaute uplahna hangin Jesu in tua lai-ah nalamdang tampi a bawl kei hi.