Read Zokam Matthew 15 Bible Online

Matthew 15 - Zokam bible

Matthew 15

¹Tua ciangin Jerusalem panin Pharisee-te le thukham siate pawl khat va pai uh a Jesu kiangah,

²"Bang hangin na nungzuite in upate tangngeina palsat uh ahi hiam? An a nek ma-un a khut uh a sil kei uh hi!" ci-in a dong uh hi.

³Jesu in, "No zong tangngeina na zuih nop manun bang hangin Pasian thupiak palsat na hi uh hiam?

⁴Ahang in, Pasian in, ‘Na nu le na pa pahtawi in, b[56] a nu le a pa a hamsiatte kithat pelmawh ding hi,’ c[57] ci hi.

⁵Ahi hangin note in, mi khatpeuh in a nu le a pa-te kiangah, ‘Kei tung pana na ngah ding uh huhna peuhmah, Pasian tungah letsong a kipia ahi hi. A cihleh

⁶a pa a pahtawi kul lo hi,’ d[58] na ci uh hi. Tua bang tangngeina na kiplet manun Pasian thu na phiat mang uh hi.

⁷No kineih siamte! Isaiah in note tawh kisai-a a genkholhna:

⁸‘Hih mite in a muk uh tawh kei hong pahtawi uh a, ahi hangin a lungtang uh kei panin gamla hi.

⁹Amaute in a mawkna-in kei hong bia uh a, a thuhilhnate uh mihing bawltawm ngeina ahi hi,’ e[59] a cih a man mahmah hi," ci-in a dawng hi.

¹⁰Jesu in mihonpite a kiangah sam a, "Ngai unla theitel un.

¹¹Mite kam sunga a tumsukte in mi a ‘ninsak’ kei hi. Kam sung pana pusuakte in mi a ‘ninsak’ hi," a ci hi.

¹²Tua ciangin nungzuite in ama kiangah va nai uh a, "Pharisee-te in hih thu a zak uh ciangin a lungkim loh lam uh na thei hiam?" ci-in amah a dong uh hi.

¹³Amah in, "Vantunga ka Pa in a suan loh kung peuhmah a zungin kibotkhia ding hi.

¹⁴Amaute thudon dah lel un; amaute, mittaw lamhilhte f[60] ahi uh hi. Mittaw khat in mittaw dang khat makaih leh a nih un kawhawm sungah kiakhawm ding uh hi," ci-in a dawng hi.

¹⁵Peter in, "Tua gentehna kote hong hilhcian dih in," a ci hi.

¹⁶Jesu in amaute kiangah, "Tua zahin lungmawl lai zawzen na hi uh hiam?

¹⁷Kam sunga tumte, gilpi sungah tumsuk a, tua ciangin pumpi pualamah a pu suakkhia hi, cih thei lo na hi uh hiam?

¹⁸Kam sung pana pusuakkhiate ahileh lungtang pana piang hi-a tuate in mi a ‘ninsak hi.

¹⁹Lungtang pana piangte: ngaihsut khel, tualthahna, angkawmna, numei le pasal paktatna, guktakna, zuau teci panna le gensiatna-te ahi hi.

²⁰Hihte in mi a ‘ninsak’ hi, ahi hangin khut sil lo-a an nek in amah a ‘ninsak’ kei hi," a ci hi.

²¹Jesu in tua mun nusia in, Tyre le Sidon kual lamah a kihem to hi.

²²Tua kimnai panin Canaan numei khat va pai a, "Topa David Tapa aw, kei hong lainat in! Ka tanu sungah dawi luta, a gim lua mahmah hi," ci-in a kiko hi.

²³Jesu in kam khat zong a dawng kei hi. Tua ciangin nungzuite a kiangah pai uh a, "Tuanu in i nungah hong zui-in hong gal sapsap ahi manin hawlkhia in," ci-in Jesu a kun uh hi.

²⁴Amah in, "Kei, Israel tuu mangte kiang bekah hong kisawl ahi hi," ci-in a dawng hi.

²⁵Tua numei pai-in a mai ah khukdina, "Topa aw, hong huh tapeuh in!" a ci hi.

²⁶Amah in, "Tate nek anlum laksakin a uite uh piak ding kilawm lo hi," ci-in a dawng hi.

²⁷Tua numei in, "Himah hi, Topa aw, ahi hangin uite in zong a topa sabuai pana kia annengte a ne uh hi," a ci hi.

²⁸Tua ciangin Jesu in, "Numei aw, upna lian na nei hi! Nong nget bangin kong pia hi," ci-in a dawng hi. Tua hun lianin a tanu a dampah hi.

²⁹Tua mun nusia in Galilee Tuipi dungah Jesu a pai hi. Tua ciangin mualpang ah kahto in a tu hi.

³⁰Mihon tampi ama kiangah pai-in mittawte, khebaite, a poite, a pautheilote le cina dang tampi va paipih uh a, a khe phungah a nga uh hi. Jesu in amaute a damsiangsak hi.

³¹Tua mite in, a pautheilote pau thei a, a poite dam kikin, khebaite lam pai thei a, mittawte in khua a muh theih a muh uh ciangin lamdang a sa uh hi. Tua ciangin Israel-te Pasian a phat uh hi.

³²Jesu in nungzuite a kiangah sam a, "Hih mite ka khuatuah hi. Ka kiangah a om zawh uh ni thumtak pha ta a, a nek ding uh bangmah a nei kei uh hi. Gilkial pi in ka ciahsak nuam kei hi; tua bangin ciah le uh phukhong vei in pukgawp ding uh hi," a ci hi.

³³A nungzuite in, "Hih bang gamtawngah mihon hih zahta vak nading an koi pan kingah thei ding hiam?" ci-in a dawng uh hi.

³⁴Jesu in, "Anlum bangzah na nei uh hiam?" ci-in a dot ciangin, "Lum sagih le ngasa tawmkha om lai hi," ci-in a dawng uh hi.

³⁵Amah in mihonpite leitual ah a tusak hi.

³⁶Tua ciangin tua anlum sagih le ngasate la a, lungdam a koh khit ciangin balkhamin a nungzuite a pia hi. Nungzuite in mipite a piasawn uh hi.

³⁷Mipite in ne uh a, a kham pikpek uh hi. Nungzuite in khamval teng athem anengin a top uh leh bawm sagihtak a pha hi.

³⁸Tua an nete numei naupang sim loh tulli a pha hi.

³⁹Jesu in mihonpite a ciahkhiatsak khit ciangin gunkuang ah tuangin Magadan kim nai lam zuanin a pai hi.