Read Zokam Matthew 16 Bible Online

Matthew 16 - Zokam bible

Matthew 16

¹Pharisee-te le Sadducee-te Jesu kiangah pai uh a, vantung pan lim khat ngetna tawh amah a zia-et uh hi.

²Amah in, a[61] "Nitakin, ‘Meiisan a suah ciangin khuapha ding hi,’ na ci uh a,

³zingsangin, ‘Meiisan suak a khua a nim ciangin huihpi nungin guahpi zu ding hi,’ na ci uh hi. Van maitang pianzia na khiat theih uh hangin hun lahna limte na thei thei kei uh hi.

⁴A tatkhel le angkawmhat hih khang mite in lim lamdang a zon uh hangin Jonah lim longal adang khat beek a kilak kei ding hi," ci-in a dawng hi. Tua ciangin Jesu in amaute nusia in a paikhia hi.

⁵Tuilipi a kantan laitakun nungzuite in an a pua mangngilh uh hi.

⁶Jesu in amaute kiangah, "Pilvang unla, Pharisee-te le Sadducee-te silngo panin kikem un," a ci hi.

⁷Amaute in, "Anlum khat beek i puak loh hang hi," ci-in amauteng a kikum uh hi.

⁸Jesu in amaute kikupna a theih ciangin, "Upna neute aw, bang hangin anlum om loh thu kikum tazen na hi uh hiam!

⁹Theitel nai lo lailai na hi uh hiam? Mi tul nga ading anlum nga le a val bawm bangzah na kaikhawm uh cih phawk nawn lo na hi uh hiam?

¹⁰Ahikeh mi tulli adingin lum sagih le a val bawm bangzah na kaikhawm uh cih phawk nawn lo na hi uh hiam?

¹¹Bangci-a an thu gen ka hi loh lam theitel lo na hi uh hiam? Ahi hangin Pharisee-te le Sadducee-te silngo panin na kikem un," a ci hi.

¹²Tua ciangin anlum bawl cianga kizang silngo gen hi loin Pharisee-te le Sadducee-te hilhna pana kikep ding gen ahilam a theitel pan uh hi.

¹³Caesarea Philipi kuala Jesu a pai ciangin a nungzuite kiangah, "Mite in Mihing Tapa kua hi, a ci uh hiam?" ci-in a dong hi.

¹⁴Amaute in, "Mi pawlkhat in, ‘Baptize-pa John hi; pawlkhatte in Elijah hi; pawlkhat leuleu in, Jerimiah hiam, kamsang khatpeuh hiam, hi ding hi,’ hong ci uh hi," ci-in a dawng uh hi.

¹⁵"Tua ahileh no e leh? Kei kua hi nong ci uh hiam?" ci-in a dong hi.

¹⁶Simon Peter in, "Nang, a nungta Pasian Tapa, Christ b[62] na hi hi," ci-in a dawng hi.

¹⁷Jesu in, "Jonah tapa Simon aw, thupha ngah na hi hi; ahang in, hih in mihing hong laak hi loin vantung a om ka Pa hong laak ahi hi.

¹⁸Tua hi a, nang Peter c[63] na hi hi. Hih suangpi tungah ka pawlpi ka phut dinga Gawtmun d[64] kongpite in a zo zo kei ding uh hi. e[65]

¹⁹Vantung gam tawhtangte nang kong pia ding hi. Leitung a na hen peuhpeuh vantungah kihen dinga f[66], leitung a na phel peuhpeuh vantungah kiphel ding g[67] hi," a ci kik hi.

²⁰Tua ciangin Jesu in amah Christ ahilam kuamah a hilh loh nadingun a nungzuite a vauhilh hi.

²¹Jerusalem ah Jesu pai-in upate, siampi makaite le thukham siate khutah tampi thuak pelmawh dinga, pel loin amah kithatin, a ni thum ni ciangin kihingkiksak ding hi, cih thute tua hun pana kipan a nungzuite a hilhcian hi.

²²Peter in amah tang paikhiatpih in tai a, "Topa, hi ngei mahmah lo e! Hih thu nang tungah tung ngei peuhmah lo ding hi!" a ci hi.

²³Jesu kihei a Peter kiangah, "Satan ka nunglamah kihem in! Kei adingin kimuk-tukna na hi hi. Pasian thute ngaihsun loin mihing thute na ngaihsun hi," a ci hi.

²⁴Tua ciangin Jesu in a nungzuite kiangah, "Mi khatpeuh in ka nung hong zuih ding leh amah le amah kinialin, ama singlamteh kisuanin hong zuih pelmawh kul hi.

²⁵Ahang in, ama nuntakna h[68] a honkhia nuamte in taan dinga, ahi hangin kei hanga ama nuntakna a taante in, nuntakna a ngah ding hi.

²⁶Mi khatpeuh in leitung buppi a neih hangin a hinna tanlawh leh ama adingin bang phatuam ding ahi hiam? Ahikeh mi khatpeuh in ama kha bang tawh khek thei ding ahi hiam?

²⁷Ahang in, Mihing Tapa ama vansawl takte tawh a Pa minthanna kengin hong pai ding hi. Tua ciangin mi khempeuh in amau sepna tawh kizui-in pahtakman a sang ciat ding uh hi.

²⁸Thutak kong geninah, hih lai-a ding mi pawlkhat in, Mihing Tapa ama kumpi-gam tawh hong pai, a muh matengun sihna a ciamkha kei ding uh hi," a ci hi.