Read Zokam Matthew 18 Bible Online

Matthew 18 - Zokam bible

Matthew 18

¹Tua hun laitakin Jesu kiangah nungzuite va pai uh a, "Vantung gamah kua lian pen ahi hiam?" ci-in a dong uh hi.

²Amah in naupang neu khat samin amaute lakah a dingsak hi.

³Tua ciangin amah in, "Thutak kong geninah, note kikhela naupangno na bat kei uh leh vantung gam sungah na lut ngei kei ding uh hi.

⁴Tua ahi ciangin hih naupangno banga a ki niamkhiat peuhpeuh vantung gam ah a lianpen ahi hi.

⁵Tua ciangin keima min hangin hih bang naupangno khat a sangte peuhmah, kei hong sang ahi hi.

⁶"Ahi hangin kei hong um hih naupangnote khat peuhpeuh mawhna a bawlsak a om leh a ngawngah angawina suang lianpi khihin tuipi thuk sungah tuakin tummang leh ama adingin a hoihzaw ding hi.

⁷Mite mawhna a bawlsakte hangin hih leitung in gimna nak thuak na zen in cia! Tua bang a piang pelmawh ding ahi hi; ahi hangin mawhna bawl nadinga kizang mite in gimna nak thuak na zen in cia!

⁸Na khut a hi a na khe ahi zongin mawhna hong bawlsak penpen sattan inla paimang in. Khut kim khe kimin tawntung meikhuk ah hong kikhul sangin, khutbui khebui-in nuntakna ah na lut ding hoihzaw hi.

⁹Na mittang in mawhna hong bawlsak leh khelkhia inla paimang in. Mittang kimin meili sungah hong kikhul sangin mit lang khat bek tawh nuntakna ah na lut ding hoihzaw hi.

¹⁰"Hih naupangnote khat beek na simmawh kha kei in. Ahang in, vantunga om amau vansawltakte in, vantunga ka Pa maitang a mu ngitnget uh hi. a[71]

¹¹Mihing Tapa, a mang b[72] te hon dinga hong pai ahi hi.

¹²"Bang na ci ngaihsut uh hiam? Mi khat in tuu za khat nei henla, tuate lakah khat gammang leh, a om lai sawm kua le kuate mual tungah nusia-in, tua a gammang tuu pen zong lo ding ahi hiam?

¹³Thutak kong geninah, tua a gammang tuu a muh kik ciangin a gammang lo tuu sawm kua le kuate sangin, tua tuu khat hangin a lungdam zaw ding hi.

¹⁴Tua mah bangin hih naupangte khat nangawn a manthan ding vantunga om na Pa un a phal kei hi.

¹⁵"Nang c[73] tungah na sanggampa hong mawh leh pai-in nogel bek omkhawmin ama khialhna na lak in. Na thu hong man leh nang lamah na sanggampa na zo hi.

¹⁶Ahi hangin na thu hong man nop kei leh ‘teci nih hiam thum hiam a om ciangin thu khempeuh thukip suak’ d[74] ahi manin midang khat hiam nih hiam zawnin na pai kik in.

¹⁷Amaute thu a man nop kei lai leh pawlpi na ko in; pawlpite thu a man nop kei lailai leh, lawkipa ahikeh siah dongpa bang lelin na koih in.

¹⁸"Thutak kong geninah, leitungah na hen peuhpeuh vantungah kihen dinga e[75], lei tungah na phel peuhpeuh vantungah kiphel ding f[76] hi.

¹⁹"Kong genbeh lai-inah, leitungah note nih kithukima na nget peuhpeuh uh vantunga om ka Pa in hong pia ding hi.

²⁰Ahang in, keima minin nih le thum a kikhop leh amaute tawh tua munah ka om hi," a ci hi.

²¹Tua ciangin Jesu kiangah Peter va pai a, "Topa aw, ka sanggam khat ka tungah hong mawh leh bangzah vei ciang ka maisak ding hiam? Sagih vei ciang dong hiam?" ci-in a dong hi.

²²Jesu in, "Sagih vei ciang bek hi lo, sawm sagih mun sagih g[77] vei ciang dong maisak in, kong ci hi.

²³"Tua hi-a vantung gam in ama na semte sum ciamtehna a sittel nuam kumpipa tawh kibang hi.

²⁴Tua sum ciamtehna a sittel ciangin talent h[78] tulsawm a bapa ama kiangah a paipih uh hi.

²⁵A sum bat pia zo lo ahi manin a leiba loh nadingin a zi a tate le a neihsa khempeuh zuak dingin a pu in thu a pia hi.

²⁶"Tua nasempa a pu mai-ah khukdin in, ‘Hong thuak keikai lai in. A vekpi-in kong loh ding hi,’ ci-in a thum hi.

²⁷Tua ciangin a pu in amah hehpih a, a leiba khempeuh maisak in a khah hi.

²⁸"Ahi hangin tua nasempa a paikhiat ciangin ama tunga denarii i[79] zakhat a ba a naseppihte khat a mu hi. Amah pumbawh in a gawl meka, ‘Nong sum bat hong loh meng in,’ ci-in a siik hi.

²⁹"A lawmpa zong khukdin a, ‘Hong thuak keikai lai in; kong loh na ding hi,’ ci-in a thum hi.

³⁰"Ahi hangin a ut kei hi. A ut sangsikin paikhia-a a leiba teng a loh khit matengin tuapa thong sungah a khum hi.

³¹Nasem dangte in tua thu teng a muh uh ciangin lungdong mahmah uh a, pai-in thu piang teng khempeuh a pu uh a ko uh hi.

³²"Tua ciang a pu in inn sungah tua nasempa sama, ‘Nasem tatsiapa aw, nong thum manin na leiba teng kong maisak hi.

³³Nang kong lainat bang tektekin na naseppihpa tungah na hih ding hi lo hiam?’ ci hi.

³⁴A pu heh lua ahi manin a bat khempeuh a loh khit matengin tua nasempa a kigawt dingin thong ukte khut sungah a pia hi.

³⁵"No zong na lungsim takpi uh tawh na sanggamte uh mawhna na maisak kei uh leh vantunga om ka Pa in hih bangin note tung ciatah hong hih ding hi," a ci hi.