Read Zokam Matthew 20 Bible Online

Matthew 20 - Zokam bible

Matthew 20

¹"Vantung gam in, ama lenggui lo a nasem ding mi cial dingin zing tunga kuankhia lo-neipa tawh kibang hi.

²Nitha denarii khat piak dingin a thukim khit uh ciangin a lenggui lo ah a kuansak hi.

³"Nai thumna pawl ciangin amah paikhia a, sumzuakna muna bangmah sem lo-a ding mawkmawk midangte a mu hi.

⁴Amaute kiangah, ‘No zong pai unla ka lenggui lo ah na va sem un; thaman a kituak zah kong pia ding hi,’ ci hi.

⁵Tua ciangin amaute a kuan uh hi. "Nai gukna pawl le nai kuana pawl ciangin paikhia leuleu a, tua mah bangina hih hi.

⁶Nai sawm le khatna pawl a sat ciangin paikhia kik leuleu a, a ding mawkmawk mi pawlkhat a mu lai hi. Amaute kiangah, ‘Bang hangin bangmah sem loin sun nilohin ding mawkmawk na hi uh hiam?’ ci-in dong hi.

⁷"Amaute in, ‘Kuamah in ko hong cial lo hi,’ ci-in dawng uh hi. "Amah in amaute kiangah, ‘No zong pai unla ka lenggui lo ah na va sem un,’ ci hi.

⁸"Nitak lam ciangin loneipa in a sum kempa kiangah, ‘Na sem teng sam inla a kicial nunung pente pan panin a masa pente dong a thaman uh pia in,’ ci hi.

⁹"Nai sawm le khat pawla kicial nasemte pai uh a, denarii khat ciat a ngah uh hi.

¹⁰A kicial masate a pai uh ciangin a tamzaw ngah dingin a kilamen uh hi. Ahi zongin denarii khat ciat mah ngah veve uh hi.

¹¹Tua banga a ngah uh ciangin loneipa a phunsan uh hi.

¹²‘Hih na cial nunung pente in nai khat sung bek na sem napi, nisa thuaka na hampi teng a sem kote tawh nong kikimsak hi,’ ci-in gen uh hi.

¹³"Ahi hangin loneipa in tua nasemte laka khat kiangah, ‘Lawm aw, nang tungah a kilawm lo-a ka tatna a om kei hi. Denarii khat thalawh ding na thukimsa hi lo ahi hiam?

¹⁴Na sum la inla ciah in. Ka cial nunung penpa zong nang kong piak zah mah ka pia nuam hi.

¹⁵Keima sum ka ut bangin zek thei hi lo ka hi hiam? Ahikeh ka citnate hong haza na hi hiam?’ ci hi.

¹⁶"Tua ahi ciangin a nunungte masa dinga a masate a nunung ding hi," a ci hi.

¹⁷Jerusalem ah Jesu a pai toh laitakin nungzui sawm le nihte tuam tonpih a, amaute kiangah,

¹⁸"Jerusalem ah i paito dinga, siampi makaite le thukham siate tungah Mihing Tapa kilehhek ding hi. Amaute in amah mawhpaihin sihna thuaksak ding uh hi.

¹⁹Tua ciangin selpho ding, sat ding le kilhlup dingin Gentile-te khutah amah a piakhia ding uh hi. A ni thum ni ciangin kihing kiksak ding hi!" ci-in a gen hi.

²⁰Tua ciangin Jesu kiangah Zebedee tapate nu, a tapate tawh va pai-in khukdina, a angvan ding a ngen hi.

²¹Jesu in, "Bang deih na hi hiam?" ci-in a dong hi. Amah in, "Na gam sungah hih ka tapate gel khat na taklamah khat na veilamah a tut theih nadingun thu hong pia in," a ci hi.

²²Jesu in amaute kiangah, "Nong nget uh na thei kei uh hi. Ka dawn ding hai na dawn thei ding uh hiam?" a ci hi. Amaute in, "Ka dawn thei ding uh hi," ci-in a dawng uh hi.

²³Jesu in amaute kiangah, "Kei hai panin na dawn takpi ding uh hi. Ahi hangin ka taklam ahi a, ka veilam ahi zongin kei piak theih ahi kei hi. Ka Pa in tua munte ah a tu dinga a sehkholhsate ading bek ahi hi," a ci hi.

²⁴Nungzui sawmte in hih thu a zak uh ciangin tua unau nihte tungah a lungkim kei uh hi.

²⁵Jesu in a vekun sama, "Gentile-te a gam-ukte uh, a nuai-ate tungah kiliansak uh a, a uliante uh amau tungah kithuneisak uh hi.

²⁶Note tua bang na hi kei uh hi. Note lakah a lian nuam peuhmah na nasem uh hi ding hi.

²⁷Note lakah mapi ahi nuam peuhmah na sila uh hi pelmawh ding hi.

²⁸Mihing Tapa, midangte ama na a semsak dinga hong pai hi lo, midangte ading nasem ding le mi tampi tat nadinga ama nuntakna a pia dingin hong pai ahi hi," a ci hi.

²⁹Jesu le a nungzuite in Jericho a nusiat uh ciangin mi tampi in amah a zui uh hi.

³⁰Lamgei-a tu mittaw nih in Jesu in tua lai tawn cih a zak uh ciangin, "Topa David Tapa aw, kote hong lainat in!" ci-in a kiko uh hi.

³¹Mihonpite in amaute tai-in daitaka a om nadingun a gen uh hi. Ahi hangin amaute in, "Topa David Tapa aw, kote hong lainat in," ci-in a kinak ko semsem uh hi.

³²Jesu khawlin amaute sama, "Bang kong hihsak ding deih na hi uh hiam?" ci-in a dong hi.

³³Amaute in, "Topa aw, khua ka mu thei nuam uh hi," ci-in a dawng uh hi.

³⁴Jesu in amaute khuatuah mahmah a, a mit uh a lawnsak hi. Amaute in khua mu theipah lian uh a, a nung a zui uh hi.