Read Zokam Matthew 21 Bible Online

Matthew 21 - Zokam bible

Matthew 21

¹Amaute Jerusalem zuanin pai uh a, Olive Vum tunga om Bethpage a tun uh ciangin Jesu in a nungzuite nih a mapaisak hi.

²Jesu in amaute kiangah, "Mai-a khuaah pai le uh cin laapi khat a kikhihsa-a om na mu pah ding uh hi; a no zong a gei-ah om ding hi. A nuta in sut unla hong paipih un.

³Mi khatpeuh in bang khatpeuh hong cih leh, Topa in a deihna om hi; hong puak kikpah ding hi,’ ci-un," ci-in a sawl hi.

⁴Kamsangpa tungtawna kigen:

⁵"En un, na kumpipa uh, lungsim niam tawh, laapi tung le, a kituang nai lo laano, laapi ta laano tungah, tuangin note kiangah hong pai hi,’ ci-in Zion Tanu kiangah na gen in," a[86] cih thu a tangtunna-in hih thu a piang ahi hi.

⁶Nungzuite pai uh a, Jesu hilh bangin a hih uh hi.

⁷Laapi le laano paipih uh a, a tungah a puantualpite uh phahin Jesu in tuate a tutphah hi.

⁸Mihonpite in a puantualpite uh lampi ah a phah uh hi. Pawlkhatte in singhiangte khiakin lampi ah a phah uh hi.

⁹A nung le a mai-a pai mihonpite in, "David Tapa tungah Hosanna! b[87] "Topa mina hong paipa in thupha a ngah hi!" c[88] "A sang penna munah Hosanna!" d[89] ci-in a awng uh hi.

¹⁰Jerusalem ah Jesu a lut ciangin khuazangpi-in linglawng henhan uh a, "Hih pa kua ahi hiam?" a ci uh hi.

¹¹Mihonpite in, "Galilee gam Nazareth pana kamsangpa Jesu hi," ci-in a dawng uh hi.

¹²Biakinnpi huang sungah Jesu lut a, tua lai-a sumleite le sumzuakte khempeuh a hawlkhia hi. Sumkhengte sabuaite le vakhuzuakte tutphahsaute a sawn thalsak hi.

¹³Amaute kiangah, "‘Ka inn, thungetna inn kici ding hi,’ e[90] ci-in ‘kigelh’ hi. Ahi hangin note in ‘misuamte kuapi’ f[91] na suaksak uh hi," a ci hi.

¹⁴Biakinnpi-a ama kiangah mittawte le khelbaite va pai uh a, amaute a damsak hi.

¹⁵Ahi hangin siampi makaite le thukham siate in, a nalamdang bawlte mu uh a biakinnpi huang sungah, "David Tapa tungah Hosanna," ci-a naupangte otna a zak uh ciangin a lungkim kei uh hi.

¹⁶Amaute in, "Hih naupangte gen na za hiam?" ci-in a dong uh hi. Jesu in, "Za mah ing, ‘Naupangnote le naungekte muk pan phatna a ginkhiat ding, nangma sehkholhsa ahi hi,’ g[92] cih thu sim ngei lo na hi uh hiam?" a ci hi.

¹⁷Tua ciangin amaute nusia-in tua khuapi panin Bethany ah pai-a tua lai-ah a giak hi.

¹⁸Zingsang tungin khuapi zuana a ciah kik leh a gil kial hi.

¹⁹Lampi gei-ah theikung khat a muh ciangin a zuan to hi. Ahi hangin theikung tungah a teh longal bangmah a mu kei hi. Tua ciangin, "Gah nawn peuhmah kei in!" a cih leh thei kung a dinggaw pah hi.

²⁰Nungzuite in hih a muh uh ciangin lamdang a sa uh hi. Amaute in, "Bangci a theikung dinggaw pah mawk ahi hiam?" ci-in a dong uh hi.

²¹Jesu in, "Thutak kong geninah, lunghei loin upna na neih nak uh leh theikung tunga kihih bang hih thei bek tham loin hih mualpi kiangah, ‘Pai inla tuipi sungah nang le nang kipai in,’ ci le uh cin, na cih bangun piang ding hi.

²²Na up nak uh leh thungetna-a na nget peuhpeuh uh na ngah ding uh hi," a ci hi.

²³Biakinnpi tualah Jesu luta thu a hilh laitakin siampi makaite le mipite’ upate a kiangah va pai uh hi. Amaute in, "Bang thuneihna tawh hihte hih na hi hiam? Hih thuneihna kua hong piak hiam?" ci-in a dong uh hi.

²⁴Jesu in, "Kei zong khat kong dong ding hi. Nong dawn uh leh bang thuneihna tawh hihte hih ka hi hiam, cih kong gen ding hi.

²⁵John baptisena koi pana hong kipan ahi hiam? Vantung pan hiam, mihing tung pan hiam?" a ci hi. "‘Vantung pan hi,’ ci leng, ‘Tua ahileh bang hangin amah um lo na hi uh hiam?’ hong ci ding hi.

²⁶‘Mihing tung pan hi,’ ci leng lah John pen kamsang khatin sang uh ahi manin mipite i kihta zel hi," ci-in amaute a kikum uh hi.

²⁷"Tua ahi ciangin, "Ka thei kei uh hi," ci-in a dawng uh hi. Tua ciangin Jesu in, "Ken zong bang thuneihna tawh hihte ka hih cih kong gen kei ding hi.

²⁸"Bang na ci ngaihsut uh hiam? Tapa nih a nei mi khat a om hi. Khat kiangah pai masa a, ‘Ka ta aw, tu ni-in lenggui lo ah va kuan inla na va sem in,’ ci-in sawl hi.

²⁹"A tapa in, ‘Kuan kei ning,’ ci hi. Ahi hangin a den ciangin a lungsim khela a kuan hi.

³⁰"Tua ciangin a tapa dang khat kiangah pai-a tua mah bangin a sawl hi. A tapa in, ‘Pa aw, va kuan ning,’ ci napi a kuan kei hi.

³¹"Tua nihte kua zaw in a pa deihna bangin hih ahi hiam?" a ci hi. Amaute in, "Amasa pen in," a ci uh hi. Jesu in amaute kiangah, "Thutak kong geninah, siahdongte le numei kizuakte in vantung gam hong lutsan ding uh hi ta hi.

³²Note kiangah thumaanna lampi lak dingin John hong pai hangin na um kei uh a, ahi zongin siahdongte le numei kizuakte in a um uh hi. Hih thu na muh khit ciang nangawnun kisikin na um tuan kei uh hi.

³³"Gentehna dang khat na ngai un: Lenggui a cing loneipa khat a om hi. Amah in a kimkotah dai kai-a, lengtui sukna khuk khat to-in tausang khat a dawh hi. Tua khit ciangin a lenggui lo, lokho pawlkhat a khawhlawhsak hi. Tua ciangin khual a zinsan hi.

³⁴A lak hun a tun ciangin lenggah khawm dingin lo-khawh-lawhte kiangah a nasemte a sawl hi.

³⁵"Lo-khawhlawhte in nasemte man uh a, khat sat, adang khat thatin, a thumna a deng uh hi.

³⁶Tua ciangin a sawl masakte sangin nasem tamzaw a paisak hi. Lo-khawhlawhte in tuate zong a masate mah bangin a bawl uh hi.

³⁷A tawpkhakna ah, ‘Ka tapa na zahtak buang ding uh hi,’ ci-in a tapa a paisak hi.

³⁸"Ahi hangin lo-khawhlawhte in tua a tapa a muh uh ciangin, ‘Hih pa a innluahpa ahi hi. Hong pai un, amah thatin a luah ding teng tang ni,’ kici uh hi.

³⁹Tua ciangin amah manin dai pua-ah kaikhia uh a, a that uh hi.

⁴⁰"Tua ahi ciangin loneipa a pai ciangin tua lo-khawhlawhte bang a ci bawl ding hiam?" ci-in a dong hi.

⁴¹Amaute in, "Siatna khukah tua migentheite tun dinga, an lak ciangin loneipa tan ding zah a pia ding lo-khawhlawh dangte a khosak ding hi," ci-in a dawng uh hi.

⁴²Jesu in amaute kiangah, "Laisiangtho sungah: "‘Inn lamten a nilkhiat suang, inntungkhum suang a suak hi; a[93] hih thu Topa hih hi-a, eite mitmuh in a piandang hi,’ b[94] cih thu sim ngei lo na hi uh hiam?

⁴³"Tua ahi ciangin ken kong geninah, note kiang pan Pasian gam kilakhia dinga, ama gah a gahsak ding mite khutah kipia ding hi.

⁴⁴Hih suang tunga a puk peuhmah kitamzan dinga, ahi hangin hih suang in a delhkhakte peuhmah a zancim ding hi," c[95] a ci hi.

⁴⁵Siampi makaite le Pharisee-te in Jesu gentehnate a zak uh ciangin amau a genna ahilam a thei uh hi.

⁴⁶Amah mat theih nading lampi zong uh a, ahi hangin mipite in Jesu kamsangin sang uh ahi manin mihonpite a kihta uh hi.