Read Zokam Matthew 22 Bible Online

Matthew 22 - Zokam bible

Matthew 22

¹Jesu in gentehnate zangin amaute tungah gen kik a:

²"Vantung gam in, a tapa ading mopawi bawl kumpipa tawh kibang hi.

³A khohsate sam dingin a nasemte a sawl hangin a khohsate a hawh nuam kei uh hi.

⁴"Tua ciangin nasem dangte sawlbeh a, ‘Nitak-an min khin ta hi: Ka bawngtalte le ka bawng vakthaute kigo zo a, na khempeuh kiman ta hi. Mopawi hong siim ta un,’ ci-in a khohsate kiangah a gensak hi.

⁵"Ahi hangin amaute in awlmawh lo uh a, khat in lo kuansan in, adang khat in a sumbukah paisan hi.

⁶Tua lo teng in a nasemte man uh a, bawlsia in a that uh hi.

⁷Kumpipa a lungso hi. A galkapte sawla, tua tualthatte thatsakin a khuapi uh a haltumsak hi.

⁸"Tua ciangin a nasemte kiangah, ‘Mopawi ankuang kilui ta hi. Ahi hangin ka khohsate lah hong hawh dingin a kilawm kei hi.

⁹Kongzing lakah va pai unla, na muh peuhpeuh uh hong sam un,’ ci-in sawl hi.

¹⁰Tua ciangin nasemte kongzing tengah pai kawikawi uh a, misia mipha a muh peuhpeuh uh a khawm uh hi. Tua ciangin mopawi bawlna innpi dimin a kisamte a om uh hi.

¹¹"Ahi hangin a kisamte en dingin kumpipa a tum ciangin mopi puan silh lo mi khat a mu hi.

¹²Amah in tuapa kiangah, ‘Lawm aw, mopi puan silh lopi-in hih lai-ah bangci lut theih na hi hiam?’ ci-in dong hi. Tuapa in a gen ding a thei kei hi.

¹³"Tua ciangin kumpipa in a sawltakte kiangah, ‘A khut a khe hen unla, kahna le hagawina a omna mun pualam khua mialna-ah paikhia un,’ ci-in a sawl hi.

¹⁴"A kisamte tampi ahi hangin a kiteelte tawmkha ahi hi," a ci hi.

¹⁵Tua ciangin Pharisee-te paikhia uh a, ama kammalte pan a awk theih nadingin a geel uh hi.

¹⁶Amaute in a nungzuite uh le Herod pawlte a kiangah a sawl uh hi. Tuate in, "Sia aw, mi thutak khat na hi-a, Pasian thutak tawh kituakin na hilh cih kong thei uh hi. Amaute hina en lo na hi manin kuama thu-in na gamta kei hi.

¹⁷Tua hi-a Caesar tungah siah piak tuak hiam, piak tuak lo, cih na ngaihsutna hong gen dih in," ci-in a dong uh hi.

¹⁸Ahi hangin Jesu in amaute ngimna khel a theih ciangin, "No kineihsiamte aw, bang hangin kei hong thangsiah na hi uh hiam?

¹⁹Siah-a kipia sumtang hong lak dih un," a ci hi. Amaute in denarii tang khat a lak uh hi.

²⁰Tua ciangin Jesu in, "Hih kua lim hi-a hih kua min ahi hiam?" ci-in a dong hi.

²¹Amaute in, "Caesar aa ahi hi," a ci uh hi. Tua ciangin amah in amaute kiangah, "Caesar aa-te Caesar pia unla, Pasian aa-te Pasian na pia un," a ci hi.

²²Amaute in hih thu a zak uh ciang- in lamdang a sa uh hi. Tua ciangin amah nusia in a paikhia uh hi.

²³Tua ni mah in: Thawhkikna om lo hi, a ci Sadducee-te Jesu kiangah thu dong dingin va pai uh hi.

²⁴Amaute in, "Sia aw, Moses in, ‘Ta nei man lo-a si pisal khatpeuh a om leh a sanggampa in a u zi luah henla, ta neihsak hen,’ ci-in gen hi.

²⁵Tu-in ko lakah unau pasal sagih a om hi. A u pen in zi nei-a, ta nei man loin si ahi manin a sanggampa adingin a zi a nusiat hi.

²⁶Tua bangin a nihna, a thumna, a banbanin a sagihna dong a kibangin hi suksuk hi.

²⁷A tawp khakna ah tua numei si hi.

²⁸Tua ahileh tua numei in, unau pasal sagihte tenpih kim ahi ciangin, thawhkik hun teh amah kua pen zi hi ding hiam?" ci-in a dong uh hi.

²⁹Jesu in, "Note in Laisiangtho ahi zongin, Pasian vangliatna ahi zongin thei lo na hi manun na khial uh hi.

³⁰Thawhkik ni ciangin mopina le mo khakna a om kei ding hi; mite, vantungah vansawltakte bang ding uh hi.

³¹Ahi hangin misite thawhkikna tawh kisai-in Pasian in note kianga a gen,

³²‘Keimah in Abraham’ Pasian, Issac’ Pasian le Jacob’ Pasian ka hi hi’ a[96] cih thu sim ngei lo na hi uh hiam? Amah in a site Pasian hi lo, a hingte Pasian ahi hi," a ci hi.

³³Mihonpite in hih thu a zak uh ciangin a thuhilhna lamdang a sa uh hi.

³⁴Jesu in Sadducee-te a daihsak lam Pharisee-te in a theih uh ciangin a kikaikhawm uh hi.

³⁵Amaute lakah thukham a thei mahmah khat in a zia-etna in,

³⁶"Sia aw, Thukham lakah koi pen thupiak lianpen ahi hiam?" ci-in a dong hi.

³⁷Jesu in, "Na Topa Pasian na lungsim khempeuh, na hinna khempeuh le na ngaihsutna khempeuh tawh it in.’ b[97]

³⁸Hih thupiak a masapen le a lianpen ahi hi.

³⁹A nihna in, ‘Nang le nang na ki-it bangin na vengpa it in,’ cih ahi hi. c[98]

⁴⁰Thukham le Kamsangte thu khempeuh, hih thupiak nihte tung pana mengkhia ahi hi," ci-in a dawng hi.

⁴¹Pharisee-te a kikhopkhawm laitak un Jesu in amaute kiangah,

⁴²"Christ d[99] bangin na ngaihsun uh hiam? Amah kua tapa ahi hiam?" ci-in a dong hi. Amaute in, "David tapa ahi hi," a ci uh hi.

⁴³Amah in amaute kiangah, "Tua ahileh bangci a David in Kha tawh thu genin amah ‘Topa’ ci thei ahi hiam?

⁴⁴"‘Topa in ka Topa kiangah: Na galte khempeuh na khenuai ah ka koih matengin ka taklamah na tu-in,’" e[100] na ci hi.

⁴⁵Tua hi-a amah David in Topa ci ahileh ama tapa bangci hi thei ding ahi hiam?" a ci hi.

⁴⁶A dawng kik thei khat bek om lo uh a, tua ni-a kipan kuamah in bangmah a dong ngam nawn kei uh hi.