Read Zokam Matthew 23 Bible Online

Matthew 23 - Zokam bible

Matthew 23

¹Tua ciangin mihonpite le a nungzuite kiangah Jesu in,

²"Moses tutphahah thukham siate le Pharisee-te a tu uh hi.

³Tua ahi ciang in amau thu na mang unla, amau hong gen khempeuh na hih un. Ahi hangin amaute in a hilh bangun hih lo uh ahi manin amau hih bangin na hih kei un.

⁴Amaute in vangik pipi lomhenin mite liangko ah suan uh hi. Ahi hangin tuate khin nadingin a khutme nangawn uh a tangsak nuam kei uh hi.

⁵"Amaute hih peuhmah mite muh ding deihin a hih uh hi: Amaute in a phylact-te f[101] uh liansak in, a thunget puante uh a mongtep a sausak uh hi.

⁶Pawi bawlna ah a kipahtawi mun le synagogue-te sunga tutna thupipente ah tu nuam diak uh hi.

⁷Vanzuakna munte ah pibawl ding le ‘Rabbi’ ci-a mite sap ding a ut se uh hi.

⁸"Ahi zongin note ‘Rabbi’ a kici ding na hi kei uh hi. To khat bek nei na hi manun na vekun unau khat na hi uh hi.

⁹Vantunga om Pa khat bek nei na hi manun, leitungah kuamah ‘pa’ na ci kei un.

¹⁰Sia khat na nei uh a, amah Christ a[102] ahi manin ‘sia’ cih ding kuamah na om kei uh hi.

¹¹Note lakah a lianpen note nasem hi ding hi.

¹²Ahang in, amah leh amah a kitawisangte kiniamsak dinga, amah le amah a kiniamsakte kitawisang ding hi.

¹³"No kineihsiam thukham siate le Pharisee-te, gimna nak thuak na nu cia! Note in mite mai ah vantung gam kongkhak na khak uh hi. No lah lut loin a lut nuamte lah na lutsak kei uh hi. b[103]

¹⁴No kineihsiam thukham siate le Pharisee-te gimna nak thuak na nu cia! Note in meigongte innte na netum uh a, mi theih dingin thu sau pipi na ngen uh hi. Tua ahi manin note a nasiazaw in hong kigawt ding hi.

¹⁵"No kineihsiam thukham siate le Pharisee-te gimna nak thuak na nu cia! Note in mi khat na khel zawh nadingun leitung le tuitungah na zin kawikawi uh hi. Amah hong kikhel ciangin no zah nihvei-in hell tapa na suaksak uh hi.

¹⁶"No mittaw lamhilhte, gimna nak thuak na nucia! Note in, ‘Mi khatpeuh biakinnpi-in a kitomlawh leh phamawh lo hi. Ahi hangin biakinnpi sunga khamte-in a kitomlawh leh ama kiciamna in amah a hen hi,’ na ci uh hi.

¹⁷No mittaw mihaite aw! Tua khamte thupizaw ahi hiam? Ahi kei leh tua khamte a siangthosak biakinnpi thupizaw ahi hiam?

¹⁸‘Mi khatpeuh biakna-tau-in a kitomlawh hangin pha mawh lo hi. Ahi zongin biakna-tau tunga om nate tomlawhna-a a zang peuhmah ama kiciamna in a hen hi,’ na ci uh hi.

¹⁹No mittawte aw! Biakna-tau tunga nate le tua nate a siangthosak biakna-tau koi thupizaw ahi hiam?

²⁰Tua ahi manin biakna-tau-a tomlopa tua biakna-tau le a tunga om nate khempeuhin a tomlo suak hi.

²¹Biakinnpi-a tomlo mi, tua sunga tengpa tawh tomlo a suak hi.

²²Vantung tawh a tomlote Pasian tokhom le a tunga tupa-in a tomlo suak hi.

²³"No kineihsiam thukham siate le Pharisee-te, gimna nak thuak na nu cia! Note in na masalate uh, mint, dill le cummin-te, sawmah khat na pia uh hi. Ahi hangin thukham tawh kisai-a a thupizaw, thutangna, lainatna le muanhuainate na thudon kei uh hi. Amasa thudon lo tuan loin a nunungte na hih ding uh ahi hi.

²⁴No mittaw lamhilhte aw! Note in thovai om loh nadingin tui na khaih uh hangin kala-oh na nawmvalh uh hi.

²⁵"No kineihsiam thukham siate le Pharisee-te, gimna nak thuak na nu cia! Note in hai le kuangte a pualam na silsiang uh a, ahi hangin a sungah duhgawlna le angsung khualna tawh kidim hi.

²⁶Pharisee mittawte aw! Hai le kuang a sunglam silsiang masa un. Tua ciangin a pualam a siang ding hi.

²⁷"No kineihsiam thukham siate le Pharisee-te, gimna nak thuak na nu cia! Note, a pualam etlawm napi a sungah misi guh le nin kihhuai khempeuh a dim a kanga kizut hante tawh na kibang uh hi.

²⁸Tua mah bangin mite muhna ah na pualam uh a thumaan a bat hangin na sung uh kineihsiamna le kheltatna tawh a dim hi.

²⁹"No kineihsiam thukham siate le Pharisee-te, gimna nak thuak na nu cia! Note in kamsangte han bawlsak in, a dikte aa na zem uh hi.

³⁰Tua ciangin, ‘I pu i pa-te khan lai-in eite om hi lehang kamsangte a sisan suah amaute lakah kihel buang kei ni,’ na ci uh hi.

³¹Tuaci-in kamsangte a thatte suan le khak na hihna uh no le no in na langsak uh hi.

³²Tua ahileh na pu na pa-te uh mawhna tehna dimsak vet ve ua!

³³"No gulte! No gul gilo mualtan suante! Note meili sung tun nading mawhpaihna pan bangci suahtak thei ding na hi uh hiam?

³⁴Tua ahi ciangin note kiangah kamsangte, mipilte le siate kong sawl hi. Amaute pawlkhat thatin, pawlkhatte na kilhcip ding uh hi. Adangte synagogue-te sungah na sat ding uh a, khuapi khat pan khuapi khatah na delh kawi kawi ding uh hi.

³⁵Tua bangin mi thumaan Abel sisan-a kipan biakinnpi le biakna-tau kikala na thah uh Berakiah tapa Zechariah sisan dong, leitunga mi thumaante sisan khempeuh no tungah hong tu ding hi.

³⁶Thutak kong geninah, hihte khempeuh hih khang mite tungah a tung ding hi.

³⁷"Jerusalem aw, Jerusalem, kamsangte thata, na kianga hong kisawlte suang tawh a deng note, akpi in a note a kha nuai-ah a khop bangin na tate ka kaihkhop ding bangzah vei lunggulh ta ka hi hiam, ahi hangin na ut kei uh hi.

³⁸En un, na inn uh a hawmmangsa in kinusia hi.

³⁹Ken kong geninah, ‘Topa mina hong paipa in thupha a ngah hi’ na cih matengun kei nong mu kik nawn kei ding uh hi, c[104]" a ci hi.