Read Zokam Matthew 24 Bible Online

Matthew 24 - Zokam bible

Matthew 24

¹Biakinnpi nusia-in Jesu a paikhiat laitakin tua innte ensak dingin nungzuite a kiangah a pai uh hi.

²Jesu in, "Hihte khempeuh na mu uh hiam? Thutak kong geninah, hih taka suang khat tungah suang dang khat beek a kiciang om loin, a vekpi in a kicimmang kiuhkeuh ding hi," a ci hi.

³Olive Vum tungah Jesu a tut laitakin a nungzuite ama kiangah a paisim uh hi. Amaute in "Hih thu cik cianga piang dinga, nong pai kik nading le khanghun bei nading lim bang hi ding hiam, hong hilh in," a ci uh hi.

⁴Jesu in, "Note kuamah in hong khem zawh loh nadingin na kigalging un.

⁵Keima minin mi tampi hong pai ding uh a, ‘Keimah, Christ d[105] ka hi hi,’ ci-in mi tampi khem ding uh hi.

⁶Galthu le galthuthangte na za ding uh hi; ahi hangin na patau nai peuhmah kei un. Tua thute a piang pelmawh ding mah ahi hi. Ahi hangin a beina hi nai lo hi.

⁷Minam khat le minam khat kido dinga, gam khat le gam khat a kido ding uh hi. Mun tuamtuamah kialpi tung dinga, zin a ling ding hi.

⁸Hihte khempeuh nausuahnat kipatna ahi hi.

⁹"Tua ciangin note bawlsiat ding le thah dingin hong kipiakhia dinga, keima hangin minam khempeuh in note hong mudah ding uh hi.

¹⁰Tua hun ciangin mi tampitak in upna taisan dinga, khat le khat kimudah in kilehhek ding uh hi.

¹¹Kamsang-zuau tampi hong kilangin mi tampi a khem ding uh hi.

¹²Tatsiatna khang ding ahi manin mi tampite ki-itna a kiam ding hi.

¹³Ahi hangin a bei donga kipte in hotkhiatna a ngah ding uh hi.

¹⁴Tua ciangin mi namkim tungah teci ahi dingin leitung buppi ah kumpi-gam lungdamna-thu kihilh dinga tua khit ciangin beina a tung ding hi.

¹⁵"Tua hi-a kamsangpa Daniel tung tawna kigensa, mun siangtho ah ‘a hawm mangsak kihhuaina’ a[106] a din na muh uh ciangin—a simte in theitel ta hen.

¹⁶Judea gama omte mualte tungah tai uh hen.

¹⁷A innkhum tunga omte kuamah inn sungah na khatpeuh la dingin kumsuk kei hen.

¹⁸Lo-a omte kuamah puantualpi la dingin ciah kik kei hen.

¹⁹Naupaiite le naungek nei numeite adingin tua nite mulkimhuai lua na’n cia!

²⁰Na galtai hun uh phalbi lai le Sabbath ni tawh a kituah loh nadingin thu na ngen un.

²¹Ahang in, leitung piancil a kipan tu hun dong tuazah a om ngei lo le a om ngei nawn lo ding lungdonna hong tung ding hi.

²²Tua nite kitomsak lo hileh kuamah a suakta zo kei ding hi. Ahi hangin a kiteel mite cihna-in tua nite kitomsak ding hi.

²³Tua hun ciangin note kiangah mi khatpeuh in, ‘En un, hih lai-ah Christ om hi! Ahikeh ‘Hua lai-ah om hi,’ hong cih leh um kei un.

²⁴Ahang in, Christ-zuaute le kamsang-zuaute hong kilang ding uh a, ahi thei hileh telsate nangawn a khem nadingun lim le na lamdang lianpipite bawl ding uh hi.

²⁵Thei ta un, hih thute a hun ma-in kong hilh hi.

²⁶"Tua ahi ciangin note kiangah mi khatpeuh in, ‘Hua gamlakah amah om hi,’ hong cihleh paikhia kei un; ahikeh ‘Inndei sungah amah om hi,’ hong cihleh um kei un.

²⁷Ahang in, khuaphelep in nisuahna pan nitumna dong a tanzal bangin Mihing Tapa hong pai ciangin tua bang hi ding hi.

²⁸Gan siluang omna peuhpeuh ah musanete a kikhawm ding uh hi.

²⁹"Tua lungdonnite khit phetin, ‘ni kimialsak dinga, kha a tang nawn kei ding hi; van panin aksite kiasuk dinga, vana om nate kiling ding hi’ b[107]

³⁰"Tua hun ciangin vanah Mihing Tapa lim hong kilang dinga, leitung a om minam khempeuh a kap ding uh hi. Vangliatna le minthanna lianpi tawh Mihing Tapa vana meii tungah tuanga hong pai amaute in a mu ding uh hi.

³¹Amah in ngaihtakin pengkul-a sapna tawh tonin a vansawltak-te a sawlkhia ding hi. Amaute in van mong khat pan mong khat dong huih lite panin a teelsa mite a kaikhawm ding uh hi.

³²"Tu-in hih thute theikung panin na sin un; a hiang menga, a teh a sel ciangin khuakhal nai ta hi, cih na thei uh hi.

³³Tua mah bangin hih nate na muh uh ciangin tua thu c[108] kongbiang dongin hong nai ta hi, cih na thei un.

³⁴Thutak kong geninah, hih thute khempeuh a tun khit mateng hih khang d[109] mite a bei kei ding uh hi.

³⁵Van le lei a mangthang ding hi; ahi hangin ka thute a mangthang ngei kei ding hi.

³⁶"A ni le a hun kuamah in a thei kei hi; vana om vansawltakte nangawn in a thei kei uh hi. Tapa e[110] in zong thei lo a, ahi hangin Pa bek in a thei hi.

³⁷Mihing tapa hong pai ding, Noah hun lai mah bang hi ding hi.

³⁸Tuiciin a tun ma-in gunkuangpi sungah Noah a lut ni dongin mite in ne-in, dawnin, mopi mokha-in a om uh hi.

³⁹Tui khanga, amaute a lakmang hun mateng bang thu piang ding cih a thei kei uh hi. Mihing Tapa hong pai ciangin zong tua mah bang hi ding hi.

⁴⁰Lo khokhawm mi nih, khat kila-in khat kinusia ding hi.

⁴¹An gawi khawm numei nihte khat kila-in khat kinusia ding hi.

⁴²"Tua ahi ciangin na Topa uh hong pai ding hun thei lo na hi manun na kigalging un.

⁴³Ahi hangin note in hih thu na theitel un: Inn neipa in zan lai bang hunin gutate pai ding hiam, cih theikhol hileh na kigalging dinga, a inn a kiluhsak kei ding hi.

⁴⁴Tua hi-a na lamet loh laitakun Mihing Tapa hong pai ding ahi manin kigingsa in om den un.

⁴⁵"Tua ahileh ama inn sunga nasem dangte ukin, amaute a hunhunin an a pia dinga a pu in a koih a muanhuai a pil nasempa kua ahi hiam?

⁴⁶A pu a ciah kik ciangin tua banga a sep laitak a tuah nasempa a hampha ding hi.

⁴⁷Thutak kong geninah, a pu in tuapa a neihsa khempeuh a saisak ding hi.

⁴⁸Ahi hangin tua nasempa mi tatsia khat hi henla, ‘Ka pu sawt veipi hong tam ding hi,’ ci-in

⁴⁹a naseppihte satin, zu khamkhamte tawh ne-in dawnkhawm leh a,

⁵⁰tua nasempa a pu a upmawhloh ni le a khuadon loh hun laitakin tung leh,

⁵¹tua nasempa a pu in atnenin, kahna le hagawina a omna munah kineihsiamte tawh a koihkhawm ding hi.