Read Zokam Matthew 25 Bible Online

Matthew 25 - Zokam bible

Matthew 25

¹"Tua hun ciangin vantung gam in a meivakte uh kengin zineipa dawn dinga kuankhia nungak bit sawmte tawh kibang ding hi.

²Tuate lakah nga hai-a nga a pil hi.

³Tua a hai teng in meivak keng napi, meitui a keng kei uh hi.

⁴A pilte in ahileh a meivak uh leh thawl sungah meitui a keng uh hi.

⁵Zineipa tung hak lua ahi manin a vekun ihmut suakin a ihmu uh hi.

⁶"Zankim laitakin, ‘Zineipa hong tung ta hi! Pai-in dawn un!’ ci-in kitangko hi.

⁷"Tua ciangin nungak bitte a vekun khanglo uh a, a meivak uh a puah tek uh hi.

⁸Nungak hai teng in a pilte kiangah, ‘Ka meivak uh mit hi, na meitui uh hong hawm un,’ ci-in ngen uh hi.

⁹"Nungak pilte in, ‘I vek adingin kicing lo ding ahi manin kong hawm zo kei ding uh hi. Tua sangin, pai-in meitui zuakte kiangah no ading va lei un,’ ci uh hi.

¹⁰"Tua bangin meitui lei dinga a pai kalun, zineipa a tung hi. A kigingkholsa nungakte, zineipa tawh mopawi-ah lutkhawm uh hi. Tua ciangin kong kikhak hi.

¹¹"Tua nung ciangin adangte zong pai uh a, ‘Pu aw! Pu aw, kote kong hong hon in!’ ci uh hi.

¹²"Ahi hangin amah in, ‘Thutak kong geninah, note kong thei kei hi,’ ci-in dawng hi.

¹³"Tua ahi manin a ni, a hun thei lo na hi manun na kigingkhol un.

¹⁴"Tua ciang leuleu-in, mi khatin a nasemte sama, a neihsa teng amaute khutah a kepsak khit ciangin khual a zinkhia mipa tawh kibang ding hi.

¹⁵Amau hihtheihna ciat tawh kizui-in, nasem khat tungah talent a[111] nga, a dang khat tungah talent nih, adang khat tungah talent khat tua bangin a pia ciat hi. Tua khit ciangin khual a zinsan hi.

¹⁶Talent nga a ngah pa paikhia pah a, summet bawlin a met talent nga a ngah hi.

¹⁷Tua mah bangin talent nih a ngah pa in zong a met talent nih mah a ngah hi.

¹⁸Ahi hangin talent khat a ngah pa paikhia-in lei to-a, a pu sum a phum hi.

¹⁹"Hun sawtpi khit ciangin tua nasemte’ pu ciah kika, amaute sum kepna thu teng a sittel hi.

²⁰Talent nga a ngah pa in adang nga hong tawi thuah a, ‘Pu aw, kei muanga nong kepsak talent nga ahi hi. En in, hih lai-ah a met nga ka ngah hi,’ ci hi.

²¹"A pu in, ‘A hoih a muanhuai nasempa aw, pha hi! Na tawmkha tungah na muanhuai hi; na tampi kong uksak ding hi. Hong pai inla na pu tawh lungdam khawm in!’ ci hi.

²²"Talent nih a ngah pa zong va pai a, ‘Pu aw, kei muanga nong kepsak talent nih ahi hi. En in, a met nih ka ngah hi,’ ci hi.

²³"A pu in, ‘A hoih, a muanhuai na sempa aw, pha hi! Na tawmkha tungah na muanhuai hi; na tampi kong uksak ding hi. Hong pai inla na pu tawh lungdam khawm in!’ ci hi.

²⁴"Tua ciangin talent khat a ngah pa va pai a, ‘Pu aw, nang mi genhak na hi hi, na vawh lohna munah na at a, khaici na theh lohna munah a kaikhawmpa na hilam ka thei hi.

²⁵Tua ahi ciangin kong kihta a paikhia-in na talent lei sungah ka sel hi. En in, nang aa teng mah ahi hi,’ ci hi.

²⁶"A pu in, ‘A tatsia, a thadah na sempa aw! Ka vawh lohna munah atin, khaici ka theh lohna munah ka kaihkhop lam thei takpi na hi hiam?

²⁷Tua ahileh kong ciah kik cianga a met le a sumpi ka ngah kik theih nadingin bang dinga ka sum, sumsinte na ap lo na hi hiam.

²⁸"Tua talent khat ama tung pan lakhia unla, talent sawm neipa na pia un.

²⁹Ahang in, a nei peuhmah kipiabeh dinga, tampitak a nei ding hi. A nei lo peuhmah a neihsun nangawn a kilakkhiatsak ding hi.

³⁰Kimanna nei lo tua nasempa, kah-na le hagawina a omna mun pualam khuamialna ah paikhia un,’ ci hi.

³¹"Mihing Tapa Vansawltakte khempeuh tawh ama minthanna tawh hong pai ciangin, vantung minthanna kumpi tokhom tungah hong tu ding hi.

³²Ama mai-ah mi namkim khempeuh kikhawm dinga, tuucingpa in tuu le keel a tuam khen mah bangin mite a tuamkhen ding hi.

³³Tuute a taklamah koihin keelte a veilamah a koih ding hi.

³⁴"Tua hun ciangin Kumpipa in a taklama omte kiangah, ‘Ka Pa in thupha hong piaksate aw, hong pai un; leipiansak cil-a kipan no adinga kibawlsa na luah ding uh gam hong luah un.

³⁵Ahang in, ka gilkial laitakin ka nek ding nong pia uh a, ka dangtak laitakin ka dawn ding nong pia uh hi. Mikhual ka hi laitakin zin nong do uh hi.

³⁶Puan ka neih loh laitakin nong silhsak uh hi. Ka cinat laitakin nong khoi uh a, ka thong kiat laitakin nong veh uh hi,’ ci ding hi.

³⁷"Tua ciangin a thumaante in, ‘Topa aw, na gilkial laitak cikin hong mu-a, hong vakin, na dangtak laitak na dawn ding hong pia ka hi uh hiam?

³⁸Mikhual na hi laitak cikin hong mu-a, zin hong do ka hi uh hiam? Puan na neih loh laitak cikin hong mu-a, puan hong silhsak ka hi uh hiam?

³⁹Na cinat laitak ahi a, na thongkiat laitak ahi zongin cikin hong mu-a, hong veh ka hi uh hiam?’ ci ding uh hi.

⁴⁰"Kumpipa in, ‘Thutak kong gen-inah, hih ka sanggamte a neupen khat adinga na bawlte khempeuh uh kei adinga hong bawl na hi uh hi,’ ci-in dawng ding hi.

⁴¹"Tua khit ciangin a veilam a omte kiangah, ‘Hamsiatna a thuakte aw, kei kiang pan taikhia un, dawimangpa le ama vansawltakte adinga kibawlsa tawntung meikuang sungah pai un.

⁴²Ahang in, ka gilkial laitakin ka nek ding bangmah nong pia kei uh hi.

⁴³Mikhual ka hi laitakin zin nong do kei uh hi. Puan ka kisap laitakin nong silhsak kei uh hi. Ka cinat laitak ahi zongin ka thongkiat laitak ahi zongin nong khoi kei uh hi,’ ci ding hi.

⁴⁴"Amaute in zong, ‘Topa aw, na gilkial laitak, na dangtak laitak, puan na neih loh laitak, mikhual na hi laitak, na cinat laitak le na thongkiat laitak cikin hong mu-a, hong don lo ka hi uh hiam?’ ci-in dawng ding uh hi.

⁴⁵"Amah in, ‘Thutak kong geninah, hihte a neu pen khat adinga na bawl loh khempeuh uh, kei adinga hong bawl lo na hi uh hi,’ ci kik ding hi.

⁴⁶"Tua ciangin amaute tawntung gawtna ah pai ding uh a, a thumaante ahi uh leh tawntung nuntakna ah a pai ding uh hi," a ci hi.