Read Zokam Matthew 26 Bible Online

Matthew 26 - Zokam bible

Matthew 26

¹Jesu in hih thu teng a gen khit ciangin a nungzuite kiangah,

²"Na theihsa bangun tu zawh ni nih khit ciangin Paisan pawi hong tung dinga - Mihing Tapa kilhcip dingin kipia ding hi," ci-in a gen hi.

³Tua ciangin Caiaphas kici tulpipa innpi-ah siampi makaite le mipite’ upate a kikhawm uh hi.

⁴Tua ciangin amaute in Jesu mansim a thahlup ding a sawmsim uh hi.

⁵Ahi hangin, "Mipite hong so kha ding ahi ciangin Pawi sungah hih kei ni," a ci uh hi.

⁶Bethany a Simon kici Miphakpa innah Jesu a om laitakin,

⁷a manpha mahmah sathau namtui suangngo thawl khat tawi-in numei khat ama kiangah a pai hi. Sabuai tungah kingama a om laitakin tuanu in a lutungah a sathau namtui a buak hi.

⁸Nungzuite in a muh uh ciangin a lungkim kei uh hi. Amaute in, "Pammaih lel hi lo hiam?

⁹Hih sathau namtui man tampi-in zuakin a sum mizawngte piak tuak zaw hi," a ci uh hi.

¹⁰Jesu in a theih ciangin amaute kiangah, "Hih nu bang dinga buaisak na hi uh hiam? Amah in kei tungah a kilawm na hoih khat a hih khin hi.

¹¹Mizawngte tawh note na omkhawm den ding uh a, ahi hangin kei tawh na omkhawm den kei ding uh hi.

¹²Ka pumpi sathau nam-tui hong buah ciangin kei kivui nading a bawlkhol ahi hi.

¹³Thutak kong geninah, hih lungdamna-thu a kihilhna leitung mun khempeuh ah amah a kiphawk gige nadingin ama hihsa thu zong a kigen ding hi," a ci hi.

¹⁴Tua ciaingin sawm-le-nihte lakah khat - Judas Iscariot kici pa siampi makaite kiangah va pai a,

¹⁵"Amah note khutah hong pia leng, kei bang nong pia ding uh hiam?" ci-in a dong hi. Tua ciangin amaute in sumtang sawm thum a sehkhia uh hi.

¹⁶Tua huna kipan Judas in amaute khutah Jesu a piak theih nading hun hoih a ngak gige hi.

¹⁷Silngo sawh loh Anlum Pawi ni masa pen ni-in Jesu kiangah nungzuite va pai uh a, "Paisan-pawi an nek nading koi lai-ah na bawlkhol le ung na deih hiam?" ci-in a dong uh hi.

¹⁸Amah in, "Khuapi sunga mi khat kiangah, ‘Siapa in: "A kisehsa ka hun tung dek ta hi. Ka nungzuite tawh na innah Paisan-pawi kong bawl ding uh hi, ci hi,’ va ci un," ci-in a dawng hi.

¹⁹Tua ciangin nungzuite in Jesu cih bangin Paisan-pawi bawl nading a bawlkhol uh hi.

²⁰A nitak ciangin, Sawm-le-nihte le Jesu sabuai ah a kingam uh hi.

²¹Amaute in an a nek laitakun Jesu in, "Thutak kong geninah, note lakah khat in kei hong lehhek ding hi," a ci hi.

²²Amaute dah mahmah uh a, a ban banin ama kiangah, "Kei hi buang kei ning maw Topa?" a ci ciat uh hi.

²³Jesu in, "Kei tawh ankuang a sawk khawmpa in kei hong lehhek ding hi.

²⁴Ama thu a kigelhsa bangin Mihing Tapa a pai ding hi. Ahi hangin Mihing Tapa a lehhekpa in gimna nak thuak na zen in cia! A piang vet lo hileh ama adingin hoih zaw ding hi ven," a ci hi.

²⁵Tua ciangin amah lehhek ding pa Judas in, "Kei hi buang kei ning maw Rabbi?" a ci hi. Jesu in, "Hihi, nang na hi hi," a[112] ci-in a dawng hi.

²⁶Amaute in an a nek laitakun, Jesu in anlum la a, lungdam koin balkhama, a nungzuite pia-in, "Hih ka pumpi ahi hi, la unla ne un," a ci hi.

²⁷Tua khit ciangin hai la a, lungdam koin, amaute pia-a, "Hih hai-in dawn kim ciat un.

²⁸Mi tampi mawh mai nadinga kibuakhia, thukhunna b[113] ka sisan ahi hi.

²⁹Ken kong geninah, ka Pa gam sungah note tawh a thaka ka dawn khawm mateng, tu-a kipan lenggahzu ka dawn nawn kei ding hi," a ci hi.

³⁰Amaute in biakna la a sak khit uh ciangin Olive Vum ah a pai uh hi.

³¹Tua ciangin Jesu in amaute kiangah: "‘Tuucingpa ka sat dinga, tuuhonte a kithehthang ding hi,’ c[114] ci-a kigelhsa bangin tu zan mahmah in kei hangin na vekun na puk ding uh hi.

³²Ahi hangin ka thawh kik khit ciangin note mai-ah Gililee gamah ka na pai ding hi," ci-in a gen hi.

³³Peter in, "Nang hangin mi khempeuh a puk zongin kei ka puk ngei kei ding hi," ci-in a dawng hi.

³⁴Jesu in, "Thutak kong geninah, tu zan mahmah ak khuan ma-in thumvei nong kitheihmawhbawl ding hi," a ci kik hi.

³⁵Ahi hangin Peter in, "Nang tawh sihkhawm nading ahi zongin kong kitheihmawhbawl ngei kei ding hi," a ci teitei hi. Tua mah bangin nungzui dangte in zong a ci ciat uh hi.

³⁶Tua khit ciangin Jesu a nung zuite tawh Gethsemane kici munah pai uh a, amaute kiangah, "Hua lai-ah pai-a thu ka nget kalin hih lai-ah na tu un," a ci hi.

³⁷Amah in Peter le Zebedee tapate gel tonpih a, tua ciangin amah dah lua-in a lungmang hi.

³⁸Tua ciangin amaute kiangah, "Dah luatna in sih nading zah dongin hong zen hi. Hih lai-ah na om unla, kei tawh kigalging khawm un," a ci hi.

³⁹Tawmkha pai lai-in lei-ah boka, "Pa aw, ahi theih leh hih hai tawh hong kipelhsak in. Ahi zongin kei deih bang hi loin nangma deihna bang hizaw hen," ci-in thu a ngen hi.

⁴⁰Tua ciangin nungzuite kiangah pai kika, amaute a na ihmu khin uh hi. Jesu in Peter kiangah, "Note in nai khat sung nangawn hong kigalginpih zo lo na hi uh hiam?

⁴¹Khem na na thuak loh nadingun thungenin kigalging un. A kha a ut hangin pumpi thanem hi," a ci hi.

⁴²Amah a nihveina va pai kika, "Pa aw, hih hai kei dawn loh a kipelh thei lo ahileh, nangma deihna bang hi ta hen," ci-in thu a ngen hi.

⁴³Amaute ihmut suak lua uh ahi manin amah a pai kik ciangin a ihmut laitak uh a tuak leuleu hi.

⁴⁴Tua ciangin amaute nusia-in paikhia leuleu a, a nget ngei mah a thumveina a ngen hi.

⁴⁵Tua khit ciangin nungzuite kiangah pai kik-a, "Note ihmu lailai in tawlnga lailai na hi uh hiam? En un, Mihing Tapa mawhneite khut sungah a kilehhek hun naita hi.

⁴⁶Tho un, pai ta ni! Kei hong lehhekpa hih lai-ah hong pai ta hi!" a ci hi.

⁴⁷Tua banga a paupau laitakin, Sawm le nihte lakah khat Judas a tung hi. Amah tawh, siampi makaite le mipite’ upate in a sawl, namsau le khetbuk tawi mihonpi tawh a tonkhawm hi.

⁴⁸Tua a lehhekpa in, "Ka nap penpen Jesu hi ding hi; tuapa man pah un," ci-in amaute tawh lim a kilahkholhsa bangin

⁴⁹Jesu kiangah Judas paipah a, "Rabbi dam maw!" ci-in amah a nam hi.

⁵⁰Jesu in, "Lawm aw, hih dinga nong paina hih in," a[115] ci-in a dawng hi. Tua ciangin mihonte in Jesu nehphei uh a, lencipin a man uh hi.

⁵¹Tua laitakin Jesu pawlte khat in ama namsau mana, dokin tulpipa nasempa sat-a, a bil a satkhia hi.

⁵²Jesu in ama kiangah; "Na namsau a paii ah siat in. Namsau zangte namsau mah in si ding hi.

⁵³Ka Pa ko thei lo dingin hong ngaihsun na hi uh hiam? Ko leng ka deih banga ka zat theih ding van sawltak legion sawm le nih sanga tamzawte thakhatin hong puakpah ding hi.

⁵⁴Tua bang hileh hih bang tektekin piang ding hi, ci-a Laisiangtho gensa bangci tangtun thei ding ahi hiam?" a ci hi.

⁵⁵Tua laitakin Jesu in mihonpite kiang ah, "Kei man dinga namsau le khetbuk tawh nong kuan uh, kumpi langpangte makai ka hi hiam? Nisimin biakinnpi tualte ah thu ka hilh laitakin nong man kei uh hi.

⁵⁶Ahi hangin kamsangte gelhsate a tangtun theih nadingin hih bang teng a piang ahi hi," a ci hi. Tua ciangin nungzuite khempeuh amah nusia-in a tai uh hi.

⁵⁷Jesu a mante in thukham siate le upate omkhawmna mun tulpi Caiaphas inn a tun uh hi.

⁵⁸Ahi hangin Peter in tulpipa inntual dong kihal simsimin Jesu a zui hi. Bang thu piang ding hiam, cih thei nuamin inntual ah lut-a a cingte tawh a va tukhawm hi.

⁵⁹Siampi makaite le Sanhedrin buppi in Jesu a thah theih nadingun a langah zuau teci a zong uh hi.

⁶⁰Zuau teci pang tampi a pai uh hangin thu-a santak ding thukho a mu zo kei uh hi. A tawpna ah nih va pai uh a,

⁶¹"Hih pa in, ‘Pasian biakinnpi susia in nithum sungin ka lam kik thei ding hi,’ ci hi," ci-in teci a pang uh hi.

⁶²Tua ciangin tulpipa dingin Jesu kiangah, "Dawng lo ding na hi hiam? Na lang khata hihte teci pannate bangci bang ahi hiam?" ci-in a dong hi.

⁶³Ahi hangin Jesu a dai dide hi. Tulpipa in ama kiangah, "Nang Pasian Tapa Christ b[116] na hi hiam hong gen in, ci-in a nungta Pasian ah tomlo-in nang kong sawl hi," a ci hi.

⁶⁴Jesu in, "Himah ing, na cih bangin ka hi hi. Ahi hangin note khempeuh kiangah kong gen hi: Mailam hunah Mihing Tapa, Thahat Pa’ taklamah tu-in meii tungah hong tuangsuk na mu ding uh hi," ci-in a dawng hi.

⁶⁵Tua ciangin tulpipa in a puansilhte balkeka, "Pasian a gendai zo hi! Teci dang kul nawn ding ahi hiam? En un, Pasian a gendaina kam na za zo uh hi.

⁶⁶Bang na ci ngaihsut uh hiam?" a ci hi. Amaute in, "Amah sihsak taak hi," ci-in a dawng uh hi.

⁶⁷Tua ciangin amaute in a maitang cilphih uh a, a khuttum uh tawh a tum uh hi. Adangte in a pang bengin,

⁶⁸"Christ aw, nang kua’n hong su hiam, hong gen dih in," a ci uh hi.

⁶⁹Inntual ah Peter a tut laitakin nasem numei khat a kiangah va pai-in, "Nang zong Galilee mi Jesu tawh na kipawl hi," va ci hi.

⁷⁰Ahi hangin amah in, "Na thu gente ka thei kei hi," ci-in amaute khempeuh mai ah a nial hi.

⁷¹Tua ciangin inntualkong lam manawhin a pai leh numei dang khat in amah mu-a, mipite kiangah, "Hih pa Nazareth mi Jesu tawh kipawl hi," a ci hi.

⁷²Amah in, "Tua mipa ka thei kei hi," ci-in tomlo-in a nial kik hi.

⁷³Tawlkhat khit ciangin tua lai-a dingte Peter kiangah va pai uh a, "Ama pawlte lakah khat na hi taktak hi; na aw suah in zong kithei hi," a va ci uh hi.

⁷⁴Tua ciangin amah le amah kihamsiat-in, "Tuapa ka thei peuhmah kei hi!" ci-in amaute mai-ah a kiciam hi. Tua khit phetin ak a khuang hi.

⁷⁵Tua ciangin, "Akkhuan ma-in kei thum vei nong kitheihmawhbawl ding hi," ci-a Jesu gen Peter in a phawk hi. Tua ciangin amah a pualamah pusuak a, kah cihtakin a kap hi.