Read Zokam Matthew 27 Bible Online

Matthew 27 - Zokam bible

Matthew 27

¹Zingsang tungin siampi ma-kaite le mipite’ upate khempeuh in Jesu, thah dingin a khensat uh hi.

²Amaute in amah henin paikhiatpih uh a, ukpipa Pilate khutah a pia uh hi.

³Amah lehhekpa Judas in Jesu a kimawhpaih lam a muh ciangin mawh kisa in dah lua ahi manin siampi makaite le upate kiangah ngun tang sawmthum va pia kik-a,

⁴"Ka mawh zo hi; mawhpeng sisan ka lehhek zo hi," a ci hi. Amaute in, "Tua leh ko bang kisai ahi hiam? Tua pen nangma thu hi hen," ci-in a dawng uh hi.

⁵Tua ciangin Judas in a sumte biakinnpi sungah lawnin a paisan hi. Tua khit ciangin amah paikhia a, amah le amah a gui-awk hi.

⁶Siampite in sumtangte tawm uh a, "Hih sum sisan man ahi manin sumkholna sunga koih ding thukham tawh kilehbulh hi," a ci uh hi.

⁷Tua ahi ciangin amaute in tua sum, gamdang mite kivuina mun dingin belseekpa lo leina-a zat dingin a khensat uh hi.

⁸Tua hangin tua mun, tuni dong Sisan Lo, kici hi.

⁹Tua hunin, kamsangpa Jeremiah gensa: "Israel mipite in ama man ding a ciangtansa bangin, amaute in sumtang sawmthum la uh a,

¹⁰Topa in kei hong thupiak bangin bellei lakna mun lei nadingin tua sumte a zang uh hi," a[117] cih thu a tangtung hi.

¹¹Tua hun laitakin ukpipa mai-ah Jesu a ding hi. Ukpipa in ama kiangah, "Nang Jew-te kumpipa na hi hiam?" ci-in a dong hi. Jesu in, "Hi mah hi, na cih bangin ka hi hi," ci-in a dawng hi.

¹²Siampi makaite le upate in amah a mawhsak uh ciangin amah in a dawng kik kei hi.

¹³Tua ciangin Pilate in, "Amaute in nang langa a teci pannate uh za lo na hi hiam?" ci-in a dong hi.

¹⁴Ahi hangin Jesu in dawng lo a, amau mawhmatnate khat beek nangawn a dawng kik peuhmah kei hi. Tua pen ukpipa in lamdang a sa mahmah hi.

¹⁵Tua lai-in Pawi kibawl hunin mipite teel thongkia khat ta khahkhiat ding, ukpipa ngeina ahi hi.

¹⁶Tua laitakin Barabbas kici a gilo-a minthang thongkia khat a om hi.

¹⁷Tua ahi ciangin mihonpite a kikhop uh ciangin Pilate in amaute kiangah, "Barabbas le Christ kici Jesu kua zaw khah leng na deih uh hiam?" ci-in a dong hi.

¹⁸Ahang in, amaute in Jesu a hazat manun ama khutah pia uh ahilam a thei hi.

¹⁹Pilate a thukhenna tokhom ah a tut laitakin a zi in, "Tua mawhpengpa bangmah na cih kha kei in; ama hangin tuni-in ka mangin tampitak ka thuak hi," ci-in thu a khak hi.

²⁰Ahi hangin in, Barabbas khaha, Jesu thah dinga a nget nadingun siampi makaite le upate in mihonpite a thuzawh uh hi.

²¹Ukpipa in, "Kua zaw hong khahkhia leng na deih uh hiam?" ci-in a dong hi. Amaute in, "Barabbas," a ci uh hi.

²²Pilate in, "Tua ahileh Christ kici Jesu bang ka cih ding hiam?" ci-in a dong hi. Amaute in a vekpi un, "Amah kilhlum in!" ci-in a dawng uh hi.

²³Pilate in, "Bang hang in? Amah’n bang tatkhialhna nei ahi hiam?" ci-in a dong hi. Ahi hangin amaute in, "Amah kilhlum in," ci-in a ngaihzaw-in a kiko uh hi.

²⁴Pilate in a cih nading thei lo tham loin mipite so dinga kipan a muh ciangin tui la-in mihonpite mai-ah a khut sil-a, "Hih pa sisan tawh kisai-in ka mawhpeng hi. Nomau thuthu hi ta hen," a ci hi.

²⁵Mipite khempeuh in, "Ama sisan kote tung le ka suan ka khakte uh tungah tu ta hen!" ci-in a dawng uh hi.

²⁶Tua ciangin amaute kiangah Barabbas a khahkhia hi. Ahi hangin Jesu a satsak khit ciangin kilhlup dingin amaute khutah a pia hi.

²⁷Tua ciangin ukpipa galkapte in ukpipa innpi ah Jesu paipih uh a, galkap company buppi a kimah a umcihsak uh hi.

²⁸Amaute in Jesu puan hawkkhiatsakin kumpi puan dupsan khat silhsak uh a,

²⁹ling tawh kumpi lukhu khat phanin a lutungah a khusak uh hi. A taklam khutah ciangkhut khat tawisak uh a, a mai-ah khukdinin, "Jew-te kumpipa aw, khansawt in," ci-in a zahko uh hi.

³⁰Amah cilphihin, a ciangkhut la kik uh a, a lutang a satsat mai uh hi.

³¹Amah a zahko khit uh ciangin a kumpi puan suahkhiat sak uh a, ama puan a silhsak kik uh hi. Tua khit ciangin kilhlup dingin amah a paikhiatpih uh hi.

³²Amaute a paikhiat laitakun Simon kici Cyrene pana mi khat tuak uh a, zawhthawh thu-in singlamteh a puasak uh hi.

³³Amaute Golgotha (Luguh mun cihna) kici mun a tung uh hi.

³⁴Tua lai-ah a khaa tawh kihel lenggahzu a pia uh hi. Ahi hangin a ciap ciangin a dawn nuam kei hi.

³⁵Singlamteh tungah Jesu a kilh khit uh ciangin amaute in ai sanin b[118] ama puan a hawm uh hi.

³⁶Tua ciangin amaute tu-in amah a vil uh hi.

³⁷Amaute in: HIH JEW-TE KUMPIPA, JESU HI, ci-in a mawhmatna uh lai, a lutung sanah a suang uh hi.

³⁸Misuamte nih a taklam khat, a veilam khat, singlamteh ah a kilh uh hi.

³⁹Tua lai a tawnte in amah engko uh a lupeisanin,

⁴⁰"Biakinnpi susia-a ni thum sunga lam kik zo ding pa aw, nang le nang kihonkhia in! Pasian Tapa na hileh singlamteh tung pan hong kumsuk in!" a ci uh hi.

⁴¹Tua mah bangin siampi makaite, thukham siate le upate in amah a zahko uh hi.

⁴²Amaute in, "Amah in midangte honkhia zo napi, amah le amah kihonkhia zo lo pi! Amah Israel-te kumpipa hi ven! Tu laitakin singlamteh tung pan hong kumsuk leh amah um ni.

⁴³Amah’n Pasian a muang hi. ‘Pasian Tapa ka hi;’ a cih buangin Pasian in a ut leh amah tu-in hon ta hen," a ci uh hi.

⁴⁴Tua mah bangin amah tawh kikhai khawm misuamte in zong a eng koko uh hi.

⁴⁵Tua gam bupah nai gukna-a kipan nai kuana dong khim a zing hi.

⁴⁶Nai kua hun pawlin Jesu in, "Eloi, Eloi, a[119] lama sabachthani?" ci-in nakpi in a kiko hi. A khiatna, "Ka Pasian, ka Paisan aw, bang hangin kei hong paisan na hi hiam?" b[120] cihna ahi hi.

⁴⁷Tua lai-a ding mi pawlkhat in hih a cih a zak uh ciangin, "Amah’n Elijah sam hi," a ci uh hi.

⁴⁸Tua khit phetin amaute lakah khat va tai a tuihup a va la hi. Lenggahzu thuk sungah tuihup a diah khit ciangin, ciang dawnah koihin Jesu dawn dingin a pia hi.

⁴⁹Ahi hangin adangte in, "Bangmah cih dah dih in; amah honkhia dingin Elijah hong pai hiam en phot dih ni," a ci uh hi.

⁵⁰Jesu nakpi in a kiko khit ciangin a kha a khah hi.

⁵¹Tua hun lianin biakinnpi puanzak alu pan ataw dong kikekin phel nih a suak hi. Lei kilokin suangtumpite kitamkham hi.

⁵²Hante kihonga, a sisa misiangthote luang tampi hing kikin a tho hi.

⁵³Amaute han panin pusuakkhia uh a, Jesu thawhkik khit ciangin khuapi siangtho sungah pai-in mi tampi kiangah a kilang uh hi.

⁵⁴Jesu luang a cingte le zakhat-ukpa in, zinling le thupiang teng a muh uh ciangin lau mahmah uh a, "Pasian Tapa c[121] lah a hi takpi a!" a ci uh hi.

⁵⁵A gamla sim pana a galvil numei tampi tua lai-ah a om uh hi. Amaute, Jesu kisapnate a hihsak dingin Galilee pana amah a zuite ahi uh hi.

⁵⁶Tuate lakah Mary Magdalene, James le Joseph-te nu Mary le Zebedee tate’ nu a om uh hi.

⁵⁷Nitak lam ciangin Jesu nungzui a suak khin Joseph min nei mihau khat Arimathea panin va pai hi.

⁵⁸Amah Pilate kiangah pai-a Jesu luang a nget ciangin, amah piak dingin Pilate in thu a pia hi.

⁵⁹Joseph in siluang la a, saihadial puan siangtho-in a tun khit ciangin,

⁶⁰amah mah in suangpi a khuak han thak sungah a sial hi. Tua han kongvang suangtumpi khatin a huk khit ciangin a paikhia hi.

⁶¹Mary Magdalene le Mary dang khat han galsan takah a tu uh hi.

⁶²Kiginkholh Ni khit a zingciang in Pilate kiangah siampi makaite le Pharisee-te a pai uh hi.

⁶³Amaute in, "Pu aw, tua mikhempa in a nuntak lai-in, ni thum khit ciangin ka tho kik ding hi,’ a cih ka phawk gige uh hi.

⁶⁴Tua ahi ciangin a ni thum ni dong tua han, bangmah a kicih loh nadingin thu pia in. Tua hi kei leh a nungzuite pai-in a luang gu ding uh a, amah misi pan tho zo hi, ci-in mite kiangah gen kha ding uh hi. Tua hileh hong khem masak sangin hong khem nunung a nasiazaw lai ding hi," a ci uh hi.

⁶⁵Pilate in, "A cing mi khat paipih un. Pai unla na theih bangun tua han a muanhuai theithei dingin na bawl un," a ci hi.

⁶⁶Tua ciangin amaute pai uh a, han kongvang khakna suang tungah seal in ciamteh uh a, a bit nadingin a cingsak uh hi.