Read Zokam Matthew 28 Bible Online

Matthew 28 - Zokam bible

Matthew 28

¹Sabbath ni khit nipikal ni masa pen ni, phalvak tungin Mary Magdalen le adang Mary-te han hawh dingin a pai uh hi.

²Ziin nakpi-in a ling hi; Topa vansawltak khat, van panin paisuk a, tua hanah pai-in han kongvang khakna suang likkhia-in, a tungah a tu hi.

³Ama mel khuaphelep banga, a puante vuk bangin a pak hi.

⁴Han cingte in amah kihta mahmah uh ahi manin liingin a si tawh kibang uh hi.

⁵Vansawltak in numeite kiangah, "Lau kei un, a kikilhlum Jesu a zong na hilam uh ka thei hi.

⁶Amah hih lai-ah om lo hi; a gensa bang tektekin tho kik zo hi. Hong pai-in a kisialna mun hong en un.

⁷Tua khit ciangin pai mengmeng unla a nungzuite kiangah, ‘Amah misi pan tho kik khina, note mai-ah Gililee ah a pai hi. Tua lai-ah amah na mu ding uh hi,’ ci-in va gen un. Tu-in no kong hilh khin hi," a ci hi.

⁸Tua ciangin tua numeite lau le lungdam mahmah thuahin a nungzuite kiangah tua thu gen dingin han panin manlangtakin a tai uh hi.

⁹Jesu in amaute thakhatin na dawntuah a, "Dam maw," ci-in a hopih hi. Amaute ama kiangah pai uh a, a khete kawi-in a bia uh hi.

¹⁰Tua ciangin Jesu in amaute kiangah, "Lau kei un. Pai unla, ka sanggamte Galilee a pai dingin na sawl un; tua lai-ah kei hong mu ding uh hi," a ci hi.

¹¹Numeite lampi ah a pai laitakun, han cingte pawlkhat khuapi sungah pai uh a, thu piang khempeuh siampi makaite kiangah a ko uh hi.

¹²Siampi makaite le upate a kisuktuah khit uh ciangin ngaihsutna khat a geel uh hi. Galkapte sum tampi pia uh a,

¹³"‘Zan laitakin a nungzuite hong pai uh a, ka ihmut kalun a luang a gumang uh hi,’ ci un.

¹⁴Hih thukohna gam ukpipa kiang a tun leh kote in amah ka na lungkimsak ding uh a, na buai loh nadingun kong hu ding uh hi," ci-in a sawl uh hi.

¹⁵Tua ciangin galkapte in sumte sang uh a, a hilh bangbangun a hih uh hi. Tua hi-a tuni ciang dong Jew-te lakah hih thu a kigen kawikawi hi.

¹⁶Tua ciangin nungzui sawm-le-khatte Galilee ah pai uh a, Jesu in amaute pai nadinga a genna mun mual tungah a pai uh hi.

¹⁷Amaute in amah a muh uh ciangin a bia uh hi. Ahi hangin pawlkhat a lunghei nei lai uh hi.

¹⁸Tua ciangin amaute kiangah Jesu pai a, "Vantung le leitungah thuneihna khempeuh kei hong kipia khin hi.

¹⁹Tua ahi manin pai unla, minamte khempeuh nungzui na suaksak un; Pa, Tapa le Khasiangtho minin d[122] na baptise unla,

²⁰kong thupiak khempeuh a zuih nadingun na hilh un. Khanghun a bei tektek dong a tawntungin note kong ompih taktak ding hi," a ci hi.