Read Zokam Matthew 4 Bible Online

Matthew 4 - Zokam bible

Matthew 4

¹Tua ciangin dawimangpa zia-etna thuak dingin Kha in Jesu gamlakah a pi hi.

²Sun sawmli le zan sawmli an a tan khit ciangin a gil kial hi.

³Tua zia-etpa a kiangah va pai-a, "Nang Pasian Tapa na hileh hih suangte anlum suaksak in," a ci hi.

⁴Jesu in, "Mite anlum bek tawh nungta hi loin Pasian kam sung pana pusuak thu khempeuh tawh a nungta hizaw hi,’ c[14] ci-in kigelhhi," ci-in a dawng hi.

⁵Tua ciangin dawimangpa in amah khuapi siangtho ah paipih-a, biakinnpi khum a sang penna ah a dingsak hi.

⁶Dawimangpa in, "Nang Pasian Tapa na hileh tuaksuk dih in. Ahang in: ‘Amah in nang hangin ama vansawltakte thu pia dinga, na khepekte suang tawh a kisukkhak loh nadingin a khut uh tawh hong domto ding uh hi,’ d[15] ci-in kigelh hi," a ci hi.

⁷Jesu in, "‘Na Topa Pasian na zia-et kei in,’ e[16] ci-in zong kigelh hi," ci-in a dawng hi.

⁸Tua khit ciangin dawimangpa in amah mual sangpi dawnah paipih leuleu a, leitunga om kumpi-gam khempeuh le a thupinate a lak hi.

⁹Amah in, "Kunin kei nong biak leh hihte khempeuh nang kong pia ding hi," a ci hi.

¹⁰Jesu in, "Satan, paikhiamang in! ‘Na Topa Pasian bia inla, ama na bek sem in,’ f[17] ci-in kigelh hi," a cih san hi.

¹¹Tua ciangin dawimangpa in amah paisan a, vansawltakte hong pai-in Jesu a don uh hi.

¹²Jesu in John thongkiatna thu a zak ciangin Galilee ah a ciah kik hi.

¹³Nazareth nusia in Zebulun le Naphtali gamhuam tuilipi gei khata om Capernaum ah pai-in a teng hi.

¹⁴Hih in kamsang pa Isaiah tungtawna kigenkholsa:

¹⁵"Zebulun gam le Naphtali gam, Jordan gun dunga tuipi zuatna lampi, Gentile-te tenna Galilee ah,

¹⁶khuamial sunga teng mite in, khuavak lianpi a mu zo uh hi; sihna liim gam sunga teng mite tungah khuavak tang khin ta hi." g[18] cih thu a tangtun nading ahi hi.

¹⁷Tua huna kipanin Jesu in, "Vantung gam hong nai zo ahi manin kisik un," ci-in thuhilh a kipan hi.

¹⁸Galilee Tuipi gei-a Jesu a pai laitakin Peter kici Simon le a nau Andrew-te unau a mu hi. Amaute nga bengte ahi manun tuilipi sungah len a khuh laitak uh ahi hi.

¹⁹Jesu in, "Hong pai unla kei hong zui un. Mihing mante kong suaksak ding hi," a ci hi.

²⁰Amau zong a lente uh nusia in amah a zuipah uh hi.

²¹Tua pan a paikhiat ciangin unau dang nih, Zebedee tapa, James le a sang gampa John-te a mu hi. Amaute in a pa uh Zebedee tawh len puahin gunkuang sungah a om uh hi. Jesu in amaute a sam hi.

²²Amaute in zong gunkuang le a pa uh nusia pah uh a amah a zui uh hi.

²³Galilee gam sung tengah Jesu pai kawikawi a, synagogue-te ah thu hilhin, vantung gam lungdamna thuthak hilh-a, cina luna khempeuh a damsak hi.

²⁴Syria gam sung tengah ama thu a kizel hi. Natna tuamtuam a veite, a na valvalte, dawilutte, sibup natna veite le pumzawte khempeuh Jesu kiangah paipih uh a, amah in a damsak hi.

²⁵Galilee gam, Decapolis a[19], Jerusalem, Judea le Jordan gungal gama mihonte in amah a zui uh hi.