Read Zokam Matthew 7 Bible Online

Matthew 7 - Zokam bible

Matthew 7

¹"Midangte tungah thu khen kei un. Na khen uh leh no tungah zong thu hong kikhen ding hi.

²Midangte tunga na khen bangun no tungah zong hong kikhen dinga, no zat tehna mah tawh no aa zong hong kitehsak ding hi.

³"Nang mittanga singpek ngaihsun loin bang hanga na sanggampa mita singatvui them en na hi hiam?

⁴Nang mittang ah singpek om napi na sanggampa kiangah, ‘Na mit-a ninthem hong lakkhiatsak ning,’ bangci cih thei na hi hiam?

⁵Kineihsiampa aw, nang mit-a singpek lakhia masa in, tua hileh na sanggampa mit-a na lakkhiat ding ninthem na telmuh pan ding hi.

⁶"A siangtho nate ui pia kei un. Vok mai-ah na kep manphate uh pai kei un. Tua banga na hih uh leh a tuatcil gawp khit uh ciangin kihei-in note hong balnen ding uh hi.

⁷"Ngen un hong kipia ding hi; zong un na mu ding uh hi; kiu un kongkhak hong kihon ding hi.

⁸Ahang in, a ngen khempeuh in a ngah uh hi; a zongte in a mu hi; a kiute ading kongkhak kihon ding hi.

⁹Note lakah a tapa in anlum a nget ciangin suang a pia ding kua om ahi hiam?

¹⁰Ahikeh ngasa a nget ciangin gul a pia ding kua om ahi hiam?

¹¹Tua ahileh note migilo hi napi, na tate uh na hoih piak ding thei na hi uh leh vantunga om na Pa un a ngente na hoih pia nuam zawtham lo ding ahi hiam!

¹²Na khempeuh ah no tunga hong kibawl ding na deih bangun midangte tungah bawl un. Hih in Thukham le kamsangte thu khempeuh huam khin hi.

¹³"Kong kawcik ah lut un. Ahang in, siatna a tun kongpi tanzau-in lampi zai-a mi tampi a lut hi.

¹⁴Ahi hangin nuntakna a tun kongpi neu a, lampi kawcik in mi tawmcik bek a lut hi.

¹⁵"Kamsang zuaute hangin na kigalging un. Amaute tuuvun silhin note kiangah hong pai uh hi; ahi hangin amaute sunglam, ngia hangsan ahi hi.

¹⁶Amaute a gah un na khentel thei ding uh hi. Lingkung panin lenggah kilo ngei ahi hiam? Thangling kung panin theigah kilo ngei ahi hiam?

¹⁷Tua mah bangin kung hoih in gah hoih gah a, kung hoih lo in gah hoih lo a gah hi.

¹⁸A kung hoih in gah hoih lo gah thei lo a, tua mah bangin a kung hoih lo in gah hoih gah thei lo hi.

¹⁹Gah hoih a gah lo singkung peuhmah kiphukin meikhukah kikhul hi.

²⁰Tua bangin amaute a gah panun na khentel thei ding uh hi.

²¹‘Topa, Topa’ hong ci khempeuh vantung gamah a lut kim kei ding hi. Ahi hangin vantunga om ka Pa deihna banga gamtate bek a lut ding hi.

²²Tua ni ciangin mi tampi in ka kiangah, ‘Topa, Topa, nangma minin thu hilh hi lo ka hi uh hiam; nangma minin dawite hawlkhia in, nalamdang tampi bawl hi lo ka hi uh hiam?’ hong ci ding uh hi.

²³Tua ciangin, ‘Note kong thei ngei kei hi. Gitlohna a bawlte aw, kei kiang pan taikhia un!’ teltakin ka ci ding hi.

²⁴"Tua hi-a hih ka thute za-a, a zuipahte peuhmah suangpi tunga inn lam mipilpa tawh kibang hi.

²⁵Guah zu in tui khang a, huih nungin tua inn a nawk hi. Ahi zongin suangpi tunga bulkip nei ahi manin tua inn a puk kei hi.

²⁶Ka thute za napi, a zuipah lote sehnel tunga inn lam mihaipa tawh kibang hi.

²⁷Guah zu-a tui khangin, huih nunga tua inn a nawk ciangin pukgawp hi," a ci hi.

²⁸Hih thu teng a gen khit ciangin mihonte in Jesu thuhilhnate lamdang a sa uh hi.

²⁹Bang hang hiam cih leh amah in thukham siate bang hi loin thuneipa khat bangin a hilh hi.