Read Zokam Mark 1 Bible Online

Mark 1 - Zokam bible

Mark 1

¹Pasian Tapa a[1] Jesu Christ tawh kisai lungdamna-thu a kipatna.

²Kamsangpa Isaiah lai sungah: "Na lampi a sialkhol dingin, ka thupuakpa na mai-ah ka sawl ding hi," b[2]

³"Gamlak-a kikopa aw in ‘Topa ading lampi sialkhol unla, ama lampi na tangsak un,’" c[3] ci-in kigelh hi.

⁴Tua bangin John in sehnel-gam kual sungah baptise in mawhnate maisak nading kisikna tawh kisai baptisena thu hilh in a pai hi.

⁵Judea gam sung teng le Jerusalem a mite khempeuh ama kiangah a pai uh hi. A mawhnate uh pulak uh a, amah in Jordan Gun sungah a baptise hi.

⁶John in kala-oh mul tawh kibawl puan silhin savun kawnggak a gak hi. Kauphe le gamlak khuaizu an in a nei hi.

⁷Ama thupuak hih ahi hi: "Ka nungah kei sanga vanglianzaw khat hong pai ding hi. Kun in ama khedap khaute sut ding nangawnin ka kilawm kei hi.

⁸Kei in note tui in d[4] kong baptize hi. Ahi hangin amah in note Khasiangtho in hong baptize ding hi."

⁹Tua hunin Galilee gam Nazareth panin Jesu pai-a, Jordan gun sungah John a kibaptisesak hi.

¹⁰Tui lakpanin Jesu a paikhiat toh laitakin van kihong a, ama tungah vakhu bangin Kha a kumsuk a mu hi.

¹¹Tua laitakin vantung panin aw khat ginga, "Nang, ka it ka Tapa na hi hi; nang tungah ka lungkim mahmah hi," a ci hi.

¹²Thakhatin Kha in amah sehnelgamah sawlpah a,

¹³Satan zia-etna thuakin ni sawmli sung a om hi. Gamsate tawh amah omkhawm a, vansawltakte in a don uh hi.

¹⁴John thong a kiat khit ciangin Pasian lungdamna thuthak tangko in Galilee gam sungah Jesu va pai hi.

¹⁵Amah in, "A hun hong tung zo hi. Pasian gam hong nai ta hi. Kisik unla thupha um un!" a ci hi.

¹⁶Galilee Tuipi gei-a Jesu a pai laitakin nga beng mi ahi Simon le a sanggampa Andrew-te in tui sungah len a khuh laitak uh a mu hi.

¹⁷Jesu in, "Hong pai unla kei hong zui un. Mi a mante kong suaksak ding hi," a ci hi.

¹⁸Amau zong a lente uh nusia pah in amah a zui uh hi.

¹⁹Tua pan tawmkha a pai lai leh Zebedee tapa James le a sanggampa John, a lente uh puaha gunkuang sunga om a mu hi.

²⁰Amah in amaute sampah a, amau zong a pa uh Zebedee le sumthalawhte gunkuang sungah nusia-in amah a zui uh hi.

²¹Amaute Capernaum ah pai uh a, Sabbath ni a tun ciangin synagogue ah Jesu lutin thuhilh a kipan hi.

²²Thukham siate bang hi loin thuneipa khat bangin a hilh manin mite in a thuhilh zia lamdang a sa mahmah uh hi.

²³Tua laitakin synagogue sungah kha gilo e[5] a lut mi khat in,

²⁴"Nazareth mi Jesu aw, kote bang hong cih nuam na hi hiam? Kote susia dingin hong pai na hi hiam? Nang kua na hiam cih kong thei hi - Pasian Mi Siangtho na hi hi!" ci-in a kiko hi.

²⁵Jesu in khauhtakin, "Pau ken! Ama sung pan paikhia in!" a ci hi.

²⁶Kha gilo in tua mipa a pumlinsak gawp khit ciangin kiko zekzak kawmin a paikhia hi.

²⁷Mite in lamdang sa mahmah uh a, "Hih in bang ahi hiam? Thuneihna tawh thuhilhna thak khat hilh mawk! Kha gilote thu a piak ciang nangawnin amaute in a mang tazen uh hi," ci-in khat le khat a kidong uh hi.

²⁸Galilee kual bupah ama thu a kizel khinpah hi.

²⁹Synagogue pan amaute a paikhiat khit phetun James le John tawh Simon le Andrew-te innah a hawh uh hi.

³⁰Simon sungnu nattun a lupna-a lum ahilam amaute in Jesu kiangah a gen uh hi.

³¹Tua ciangin ama kiangah Jesu pai-a, a khut lenin a phongto hi. A nattun dam a, amaute a zindo hi.

³²Tua nitak, ni a tum khit ciangin mite in cinate le dawilutte khempeuh Jesu kiangah a puak uh hi.

³³Khuazangpi in kongkhak kiangah kikhawm uh a,

³⁴natna tuamtuam a vei mi tampi Jesu in a damsak hi. Amah in dawi tampi zong hawlkhia a, tua dawite in amah kua hiam cih thei uh ahi manin Jesu in amaute pau ding a phal kei hi.

³⁵Zingkhangpi phalvak ma-in Jesu tho a, tua inn panin gamdaihna munah pai-in tua lai-ah thu a ngen hi.

³⁶Simon le a pawlte amah zong dingin a pai uh hi.

³⁷Amah a muh uh ciangin, "Mi khempeuh in nang hong zong uh hi lo hiam!" ci-in a ko uh hi.

³⁸Jesu in, "Thu hilh dinga hong pai ka hi manin hih khuate khatpeuhah thuhilh dingin paikhia ni" a ci hi.

³⁹Tua ciangin amah Galilee gam sung tengah zin kawikawi a, synagogue-te ah thu hilhin dawite a hawlkhia hi.

⁴⁰Miphak a[6] khat a kiangah va pai a, khukdinin, "Ut peuh lecin nong siangsak thei hi," ci-in a thum hi.

⁴¹Khuatuahna tawh Jesu kidimin, a khut zana, tuapa lawngin, "Ka ut hi. Siang ta in!" a ci hi.

⁴²Tua khit phetin a phak natna in amah nusia-a, a damsiang hi.

⁴³Jesu in vauhilhna khauh tawh amah sawlkhiapah a,

⁴⁴"Hih thu kuamah hilh peuhmah kei in. Ahi hangin pai inla siampipa kiangah va kilak in; amaute tungah teci pang na suah nadingin na sian nading a Moses thupiak biakpiakna na pia in," a ci hi.

⁴⁵Tuapa in tua banga a hih sangsikin paikhia-a genthang in tua thu a kizelsak hi. Tua hangin khuapi sungah Jesu a langtangin lut thei nawn lo-a, a pualam kuama om lohna munmun ah a om kawikawi hi. Tua hi napi mun khempeuh panin mihonte ama kiangah a pai veve uh hi.