Read Zokam Mark 10 Bible Online

Mark 10 - Zokam bible

Mark 10

¹Tua ciangin Jesu tua mun nusia in Jordan gal khat lam Judea kualah a pai hi. Ama kiangah mihonte va pai leuleu uh a, a hih ngei bangin amaute thu a hilh hi.

²Pharisee-te pawlkhat va pai uh a, a zia-etna un, "Mikhat in zi a mak ding thukham tawh a kituak hiam?" ci-in a dong uh hi.

³Amah in, "Moses in note bang thu hong pia ahi hiam?" ci-in a dawng hi.

⁴Amaute in, "Mi khatin a zi a makna lai pia-a, a zi a nawkiksak theih nading Moses in a phal hi," a ci uh hi.

⁵Jesu in, "Na lungtang uh khauh lua ahi manin Moses in hih thukham note adingin a gelh ahi hi.

⁶Ahi hangin Pasian in na khempeuh a piansak cilin amaute ‘numei le pasal-in a bawl hi.’ f[37]

⁷‘Hih thu hangin pasal in a nu a pa nusia-in a zi tawh kigawm dinga, g[38]

⁸amaute gel sakhat a suak ding uh hi.’ h[39] Tua ahi ciangin amaute nih hi nawn loin khat ahi hi.

⁹Tua ahi manin Pasian gawmsate mihing in khen kei ta hen," a ci hi.

¹⁰Amaute inn sungah a om kik uh ciangin, nungzuite in hih thu Jesu a dong uh hi.

¹¹Amah in, "Ama zi ma-a, numei dang khat a tenpih peuhmah a zi angkawmsan ahi hi.

¹²Tua ciangin numei khat in a pasal ma-a pasal dang khat a tenpih leh tua numei angkawm a suak hi," ci-in a dawng hi.

¹³Jesu lawn dingin mipite in nau pangnote ama kiangah a paipih uh leh, nungzuite in amaute a na tai uh hi.

¹⁴Jesu in a muh ciangin a lungkim kei hi. Amah in amaute kiangah, "Naupangnote ka kiangah hong paisak un, amaute dal kei un. Ahang in, Pasian gam i cih hih bangte aa ahi hi.

¹⁵Thutak kong geninah, naupangno banga Pasian gam a sang lo peuhmah, tua sungah a lut ngei kei ding hi," a ci hi.

¹⁶Tua ciangin amah in naupangnote a khutin tawi-a, a tunguah a khutte nga in amaute thupha a pia hi.

¹⁷Jesu a paikhiat laitakin ama kiangah mi khat va tai-a, a mai ah khukdinin, "A hoih siapa aw, nuntak tawntungna ka luah nadingin bang ka hih ding kul hiam?" ci-in a dong hi.

¹⁸Jesu in, "Bang hangin kei hoih hong ci na hi hiam? Pasian bek longal mi hoih khat beek a om kei hi.

¹⁹‘Tual that kei in, ang kawm kei in, gu kei in, zuau teci pang kei in, khem kei in, na nu na pa pahtawi in,’ a[40] kici thupiakte na theihsa ahi hi," ci-in a dawng hi.

²⁰Tuapa in, "Sia aw, tuate khempeuh ka neu tunga kipan ka zuihsa ahi hi," a ci hi.

²¹Jesu in amah enin it a, "Na khat na kisam lai hi. Pai-in, na neihsa khempeuh zuak inla mizawngte pia in. Tua hileh vantungah gou na nei ding hi. Tua khit ciangin hong pai inla kei hong zui in," a ci hi.

²²Hih thu hangin tuapa a mai a mual hi. Amah hau mahmah ahi manin lungsi dedu in a paikhia hi.

²³Jesu in a kim teng en kawikawi a, a nungzuite kiangah, "A haute Pasian gam a lut nading haksa na zen e!" a ci hi.

²⁴Nungzuite in Jesu thugente lamdang a sa mahmah uh hi. Ahi hangin Jesu in, "Tate aw, Pasian gam lut nading haksa mahmah si! b[41]

²⁵Mihau khat Pasian gam a lut ding sangin phim bilvang ah kala-oh thawl ding a baihzaw hi," a ci hi.

²⁶Nungzuite in lamdang sa semsem uh a, "Tua hileh kua kihonkhia thei peuhmah ding hiam?" ci-in khat le khat a kikum uh hi.

²⁷Jesu in amaute en a, "Mihing adingin ahi thei lo mah ahi hi; ahi hangin Pasian adingin tua bang hi lo hi. Pasian adingin na khempeuh hi thei hi," a ci hi.

²⁸Peter in ama kiangah, "Kote in na khempeuh nusia in nang kong zui uh hi," a ci hi.

²⁹Jesu in "Thutak kong geninah, keima hang le lungdamna-thu hangin a inn, a sanggampate, a sanggamnute, a nu, a pa, a tate le a lote a nusia peuhmah in,

³⁰tu khanghunin a zah zakhat (innte, sanggampate, sanggamnute, nute, tate le lote—tuate tawh bawlsiatnate) le hong tung ding khanghunin nuntak tawntungna a ngah ding a kipelh kei ding hi.

³¹Ahi hangin a masate tampi nunung ding uh a, a nunungte a masa ding uh hi," ci-in a dawng hi.

³²Jesu mapi in amaute Jerusalem manawhin a pai laitakun nungzuite in lamdang vat sa uh a, amau zuite ahileh a lau uh hi. Amah in Sawm-le-nihte paipih tuamin ama tunga piang dingte a hilh hi.

³³Amah in, "Jerusalem dong i pai dinga, siampi makaite le thukham siate tungah Mihing Tapa a kilehhek ding hi. Amaute in amah thah dingin mawhpaih ding uh a, Gentile-te khut ah amah piakhia ding uh hi.

³⁴Amaute in amah zahko-in, cilphih in, satin, a that ding uh hi. Tua zawh ni thum ciangin amah a tho kik ding hi," a ci hi.

³⁵Tua ciangin Zebedee tapate James le John a kiangah va pai uh hi. Amaute in, "Sia aw, kong nget peuhpeuh uh hong hihsak dingin kong deih uh hi," a ci uh hi.

³⁶Amah in, "Bang hong hihsak leng na deih uh hiam?" ci-in a dong hi.

³⁷Amaute in, "Na minthanna na ngah ciangin kote gel na taklam khat na veilam khat hong tusak in," ci-in a dawng hi.

³⁸Jesu in, "Nong nget uh na thei kei uh hi. Ka dawn ding hai dawn thei ding na hi uh hiam? Ahikeh kei kibaptise nading baptisena ah na kibaptise thei ding uh hiam?" a ci hi.

³⁹Amaute in, "Ka hih thei ding uh hi," ci-in a dawng uh hi. Jesu in amaute kiangah, "Ka dawn ding hai na dawn takpi ding uh a, kei kibaptisena tua kibaptisena ah na kibaptise takpi ding uh hi.

⁴⁰Ahi hangin ka taklam ahikeh ka veilam a tu ding kei hong piak theih hi lo hi. Tua munte ah a tu dinga a kiseh kholsa mite bek tu ding uh hi," a ci hi.

⁴¹Nungzui sawmte in hih thu a zak uh ciangin James le John tungah a lungkim kei uh hi.

⁴²Jesu in amaute samkhawm a, "Gentile-te tungah gam-uka kingaihsunte, amau tungah kiliansak uh a, a uliante uh amau tungah kithuneisak uh hi, cih na thei uh hi.

⁴³Note tua bang na hi kei uh hi. Tua bang na hi sangsik-un note lakah a lian nuam peuhmah na nasem uh suakin,

⁴⁴a masa pen ahi nuam peuh, mi khempeuh sila ahi pelmawh kul hi.

⁴⁵Ahang in, Mihing Tapa nangawn ama na midangte a semsak ding hi loin, midangte na a sem ding le mi tampi tat nadingin ama nuntakna pia dinga hong pai ahi hi," a ci hi.

⁴⁶Tua ciangin amaute Jericho a tung uh hi. Jesu le a nungzuite in mihon tampi tawh tua khuapi a nusiat laitakun mittaw khat Bartimaeus (tua pen, Timaeus Tapa) khut dawh-a ngenin lam gei ah a na tu hi.

⁴⁷Amah in Nazareth mi Jesu ahi lam a zak ciangin, "David Tapa Jesu aw, kei hong lainat in," ci-in a kiko hi.

⁴⁸Mi tampi in amah tai uh a, daitaka a om nadingin a gen uh hi. Ahi hangin tuapa in, "David Tapa aw, kei hong lainat in!" ci-in a kiko semsem hi.

⁴⁹Jesu khawl a, "Amah sam un," a ci hi. Tua ciangin amaute in mittawpa kiangah, "Lung nuam in! Ding in! Amah in nang hong sam hi," ci-in a sam uh hi.

⁵⁰Amah in a puantualpi paikhia pahin dingto-a Jesu kiangah a pai hi.

⁵¹Jesu in, "Bang kong hihsak ding deih na hi hiam?" ci-in amah a dong hi. Tua mittawpa in, "Rabbi aw, khua ka mu thei nuam hi," a ci hi.

⁵²Jesu in, "Pai ta in, na upna in nang hong damsak zo hi," a ci hi. Tua khit phetin amah in khua mu thei pah lian a, lampi ah Jesu a zui hi.