Read Zokam Mark 11 Bible Online

Mark 11 - Zokam bible

Mark 11

¹Amaute Jerusalem zuana a pai laitak, Olive Vum panga om Bethphage le Bethany a tun uh ciangin Jesu in a nungzuite nih a mapaisak hi.

²Amah in amaute kiangah "Na mai-ua khua ah pai le uh cin na lut phetun kuama tuan ngei nai lohna laano khat a kikhih na mu ding uh hi. Sut unla hong paipih un.

³Mi khatpeuh in, ‘Bang hangin hih banga hih na hi uh hiam?’ ci-a hong dot leh, ‘Topa in a deihna om hi; hong puak kik pah ding hi,’ ci un," ci-in a sawl hi.

⁴Amaute pai uh a inntual kong pualam kongzinga kikhih laano khat a mu uh hi. Amaute in a sut laitakun

⁵tua lai-a ding mi pawlkhat in, "Bang dinga tua laano sut na hi uh hiam?" ci-in a dong uh hi.

⁶Amau gel in Jesu hilhsa bangin a dawn uh ciangin tua mite in amaute a paisak uh hi.

⁷Tua laano Jesu kiang a tunpih uh ciangin a tungah a puantualpite uh phah uh a, amah a tungah a tu hi.

⁸Mi tampi in a puantualpite uh lampi ah a phah uh hi. Pawlkhat in gamlak singhiangte khiakin lampi ah a phah uh hi.

⁹A nung le a mai-a pai mihonpite in, "Hosanna!" a[42] "Topa min-a hong paipa in thupha a ngah hi!" b[43]

¹⁰"Hong tung ding i pa David kumpi gam in thupha a ngah hi!" "A sangpenna munah Hosanna!" ci-in a awng uh hi.

¹¹Jerusalem ah Jesu lutin biakinnpi ah a pai hi. Amah in na khempeuh en kawikawi a, ahi hangin khuanung lua ta ahi manin Sawm-le-nihte tawh Bethany ah a pai uh hi.

¹²A zing ciangin Bethany nusia-a a pai laitakin Jesu a gil kial hi.

¹³Theikung a teh pha khat a galmuh ciangin, a gah kha hiam cih en dingin a va pai hi. Thei gah hun hi lo ahi manin thei phung a tun ciangin a teh simloh bangmah a om kei hi.

¹⁴Tua ciangin amah in theikung kiangah, "Kuamah in na gah ne ngei nawn kei ta hen," a ci hi. A nungzuite in tua a cih a za uh hi.

¹⁵Jerusalem a tun uh ciangin biakinnpi huangah Jesu lut-a, tua lai-a sum lei sum zuakte a hawlkhia hi. Sum khengte sabuaite le vakhu zuakte tutphahsaute sawnthalsak gawpin,

¹⁶biakinntualte ah sumbuk van paipih ding kuamah a phal kei hi.

¹⁷Amah in amaute hilh a, " ‘Ka inn, minamte khempeuh thungetna inn kici ding hi,’ c[44] ci-in kigelh hi lo ahi hiam? Ahi hang-in note in ‘misuamte kua’ d[45] na suaksak tazen uh hi," a ci hi.

¹⁸Siampi makaite le thukham siate in hih thu a zak uh ciangin Jesu a thah theih nading uh lampi a zong uh hi. Ahang in, mihonpite khempeuh in ama thuhilhna lamdang sa mahmah uh ahi manin amaute in amah a kihta uh hi.

¹⁹Nitak lam ciangin amaute e[46] khuapi pualamah a paikhia uh hi.

²⁰A zingsang ciangin amaute a pai laitakun tua theikung a zunga kipan a dinggaw-a om a mu uh hi.

²¹Peter in phawka Jesu kiangah, "Rabbi aw, en in! Na hamsiat theikung dinggaw hi!" a ci hi.

²²Jesu in, "Pasian muang f[47] un.

²³Thutak kong geninah, mi khatpeuh in hih mualpi kiangah, ‘Pai inla tuipi sungah kipai in,’ ci-in lunghei loin a cih bang piang ding hi, ci-a a up leh ama cih bang tektekin a piang ding hi.

²⁴Tua ahi manin ken kong geninah, na nget peuhpeuh uh ka ngah khin hi, ci-a na up uh leh na ngah ding uh hi.

²⁵Thungena na din laitakin mi khatpeuh tungah lungkimlohna na neih leh vantunga om na Pa in na mawhnate g[48] hong maisak theih nadingin tuapa na maisak in.

²⁶Ahi zongin na maisak kei uh leh vantunga om na Pa un no mawhnate hong maisak lo ding hi," h[49] ci-in a dawng hi.

²⁷Amaute Jerusalem tung kik uh a, biakinnpi tualte ah Jesu a vak kawikawi laitakin siampi makaite, thukham siate le upate ama kiangah a pai uh hi.

²⁸Amaute in, "Bang thuneihna tawh hihte hih na hiam? Hihte hih nading thuneihna kua in hong pia hiam?" ci-in a dong uh hi.

²⁹Jesu in, "Kei zong khat kong dong ding hi. Hong dawng un; tua ciangin ken zong bang thu neihna tawh hihte hih ka hi hiam, cih kong gen ding hi.

³⁰John baptisena koi pana hong pai ahi hiam? Vantung pan hiam, mihing tung pan hiam? Hong gen dih un!" ci-in a dawng hi.

³¹Amaute kikum uh a, "Vantung pan hi,’ ci leng, ‘Tua ahileh bang hangin amah um lo na hi uh hiam?’ hong ci ding hi.

³²Ahi hangin ‘Mihing tung pan hi,’ ci leng lah..., (John pen mi khempeuh in kamsang taktakin sang uh ahi manin amaute in mipite a kihta uh hi.)" a ci uh hi..

³³Tua ciangin amaute in, "Ka thei kei uh hi," ci-in Jesu a dawng uh hi. Jesu in, "Kei zong bang thuneihna tawh hihte ka hih cih kong gen kei ding hi," a ci hi.