Read Zokam Mark 12 Bible Online

Mark 12 - Zokam bible

Mark 12

¹Tua ciangin amah in amaute kiangah gentehnate zangin thu gen a: "Lenggui a ciing mi khat a om hi. A kimkotah dai kai-a, lengtui sukna khat toin, tausang khat a dawh hi. Tua khit ciangin a lenggui lo lokho pawlkhat khawhlawhsakin khual a zinsan hi.

²A lak hun a tun ciangin lenggah khawm dingin lo-khawhlawhte kiangah a nasemte khat a sawl hi.

³Ahi hangin amaute in tuapa na man uh a, satgawpin a guak ciahsak uh hi.

⁴Tua ciangin amah in tuate kiangah nasem dang khat a sawl kik hi. Amaute in hih pa lu sat sakin a zahlaksak ngi-ingei uh hi.

⁵Amah in zong nasem dang khat sawl kik leuleu a, amaute in tuapa a that uh hi. Nasem adang tampi a sawl hangin amaute in pawlkhat satin, adangte a that uh hi.

⁶"Amah in a sawl theih ding a it a tapa khat a nei lai hi. A tawpkhakna ah, ‘Ka tapa zahtak buang ding uh hi,’ ci-in a tapa a paisak hi.

⁷"Ahi hangin lo-khawhlawhte in, ‘Hih pa a gouluahpa ahi hi; hong pai un amah that ni, a luah ding teng ei aa suakpah ding hi,’ kici uh hi.

⁸Tua ciangin amah manin that uh a, daipua lamah a paikhia uh hi.

⁹"Tua bangin hileh lenggui lo neipa in bang a cih ding hiam? Amah hong pai-in lo-khawhlawhte thatin ama lo midangte a pia ding hi.

¹⁰Hih Laisiangtho thu: "‘Inn lamte nilkhiat suang inntungkhum a[50] suang a suak hi;

¹¹hih thu Topa hih hi a, eite mitmuh in piandang hi,’ b[51] cih sim ngei lo na hi uh hiam?" a ci hi.

¹²Hih gentehna amaute a langgenna ahilam thei uh ahi manin amah mat nading lampi a zong uh hi. Ahi hangin amaute in mihonpite kihta uh a, tua ciangin amah nusia-in a paimang uh hi.

¹³Tua nung ciangin amaute in ama thugenin amah a mat theih nadingun Pharisee-te le Herod pawlte Jesu kiangah a paisak uh hi.

¹⁴Amaute va pai-in ama kiangah, "Sia aw, nang mi thutak khat na hi lam ka thei uh hi. Kuamah maivil nei lo na hi manin, kuama thu-in na gamta kei a, Pasian thutak tawh kizui-in na hilh hi. Tua hi-a Caesar tungah siah piak tuak hiam, piak tuak lo hiam?

¹⁵Pia ding ka hi uh hiam, pia lo ding ka hi uh hiam?" a ci uh hi. Ahi hangin Jesu in amaute a kineih a hina thei-a, "Bang hangin kei hong thangsiah na hi uh hiam? Denarius khat hong la unla hong veelsak dih un," a ci hi.

¹⁶Amaute in tua sumtang a paipih uh ciangin amaute kiangah, "Hih kua lim hi-a hih kua min ahi hiam?" ci-in a dong hi. Amaute in, "Caesar aa ahi hi," ci-in a dawng uh hi.

¹⁷Tua ciangin Jesu in amaute kiangah, "Caesar aa te Caesar na pia unla, Pasian aa te Pasian na pia un," a ci hi. Tua ciangin amaute in amah lamdang a sa mahmah uh hi.

¹⁸Tua khit ciangin thawhkikna om lo hi, a ci Sadducee-te thu dong dingin Jesu kiangah a pai uh hi.

¹⁹Amaute in, "Sia aw, Moses in, ‘Ta nei man loin a zi a sihsan pasal khatpeuh a om leh a sanggampa in tua meigongnu tenpihin a sanggampa ading tate neihsak hen,’ ci-in ko adingin na gelh hi.

²⁰Tu-in unau pasal sagih a om hi. A u pen in zi nei a, ta nei man loin a si hi. A nihna pa in

²¹tua meigongnu tenpih a, ahi hangin amah zong ta nei man lo mah in a si hi. A thumna pa zong tua mah bang ahi hi.

²²A taktak in tua unau sagihte khat beek in ta a nei man kei uh hi. A tawpkhakna ah tua numei zong a si hi.

²³Tua ahileh tua numei in unau pasal sagih teng tenpih kim ahi ciangin thawhkik c[52] ciangin amah kua pen zi hi ding hiam?" ci-in a dong uh hi.

²⁴Jesu in, "Note in Laisiangtho ahi zongin, Pasian vang ahi zongin thei lo na hi manun khial hi lo na hi uh hiam?

²⁵Misite a thawh kik ciangin mopina le mokhakna a om kei ding hi. Amaute vana vansawltakte a bang ding uh hi.

²⁶Misite thawhkikna tawh kisai-in Pasian in, Moses kiangah, ‘Abraham’ Pasian, Isaac’ Pasian le Jacob’ Pasian ka hi hi,’ d[53] ci-a sawlbawk laka a genna thu Moses laibu sungah sim ngei lo na hi uh hiam?

²⁷Amah a site Pasian hi loin a nungtate Pasian ahi hi. Note nakpi takin na khial uh hi!" ci-in a dawng hi.

²⁸Tua laitakin thukham siate lakah khat va pai-a amaute kam kinialna a za hi. Jesu in amaute hoihtakin a dawn theih lam tuapa in a theih ciangin, "Thupiakte khempeuh lakah koi a thupi pen ahi hiam?" ci-in amah a dong hi.

²⁹Jesu in, "A thupi penpen hih ahi hi: ‘Israel aw, ngai dih in i Topa eite Pasian in Topa khat ahi hi. e[54]

³⁰Na Topa Pasian, na lungtang khempeuh, na hinna khempeuh, na lungsim khempeuh le na thahatna khempeuh tawh it in.’ f[55]

³¹A nihna hih ahi hi: ‘Nang le nang na ki-it bangin na vengte it in.’ g[56] Hihte gel sanga lianzaw thupiak khat beek a om kei hi," ci-in a dawng hi.

³²Tuapa in, "Sia aw, na gente ahi takpi ahi hi. Pasian khat bek hi-a, amah longal Pasian dang a om kei hi, na cih a maan hi.

³³Na lungtang khempeuh, na theihna khempeuh le na thahatna khempeuh tawh amah it ding le nang le nang na ki-it banga na vengte na it ding pen meihal biakna buppi le biakpiaknate sangin thupizaw mah hi," ci-in a dawng kik hi.

³⁴Jesu in tuapa in pilna tawh dawng cih a theih ciangin ama kiangah, "Nang Pasian gam tawh na kigamla kei hi," a ci hi. Tua-a kipan kuamah in thu dang a dong ngam nawn kei uh hi.

³⁵Biakinntualte ah Jesu in thu a hilh laitakin, "Christ a[57] pen David Tapa hi, ci-in bangci a thukham siate in gen thei uh ahi hiam?

³⁶David mahmah in: "Topa in ka Topa kiangah: ‘Na galte khempeuh na khe nuai-ah ka koih matengin ka taklamah na tu in’" ci-in Khasiangtho in na pulakkhia khin hi. b[58]

³⁷"Amah pen David mahmah in ‘Topa’ ci ahileh bangci in ama tapa hi thei ding hiam?" ci-in a dong hi. Mihon tampite in lungkimtakin ama thugen a ngai uh hi.

³⁸Tua bang a hilh kawmin Jesu in, "Thukham siate panin na kikem un. Amaute puantual deldal silhin vak kawikawi nuam uh a, vanzuakna munte ah pibawl ding a ut uh hi.

³⁹Synagogue-te sunga tutna thupi pente ah tu nuam diakin, pawite ah pahtawina munte ah a tu nuam uh hi.

⁴⁰Amaute in meigongte inn netum uh a, kineih khemin sauvei pipi thu a ngen uh hi. Tua bang mite a nasia penin kigawt ding hi," a ci hi.

⁴¹Sumpi khiatna mun mai-ah Jesu tu-in mihonpite in biakinnpi sumkholna sunga amau sumpi a khiat uh a vil hi. Sumhau tampi in sum tampipi a khia uh hi.

⁴²Ahi hangin azawng meigongnu khat va pai-a sum c[59] tawmkha bek a man sumsan d[60] tangneu nih a khia hi.

⁴³Jesu in a nungzuite ama kiangah sama, "Thutak kong geninah, hih a zawng meigongnu in midang teng khempeuh sangin sumkholna ah tam a khia zaw hi.

⁴⁴Amaute in a hauhna lak panun a pia uh hi; tuanu in ahileh a zawnsa pipi-in ama kivak nadinga a neih khempeuh a khia hi," a ci hi.