Read Zokam Mark 13 Bible Online

Mark 13 - Zokam bible

Mark 13

¹Biakinnpi pan Jesu a paikhiat laitakin a nungzuite khat in ama kiangah, "Siapa en dih ve! Hih suangtumte gol thei tabuang a! Hih innte thupi thei ngemngam mahmah hi!" a ci hi.

²Jesu in, "Hih inn liante khempeuh na mu hiam? Suang khat tungah suang dang khat beek a kiciangsa-in a kinusia kei ding hi; a vekpi in a kicimmang ding hi," ci-in a dawng hi.

³Biakinnpi tawh a kigalsai Olive Vum tungah Jesu a tut laitakin Peter, James, John le Andrew-te in,

⁴"Hihte cik cianga piang ding ahi hiam? Tua teng a tangtun kim nading bang lim hong hi ding hiam hong hilh in," ci-in a dong sim uh hi.

⁵Jesu in amaute kiangah, "Note kuamah in hong khem zawh loh nadingin kikem un.

⁶Keima minin mi tampi hong pai ding uh a, ‘Keimah in amah ka hi hi’ ci teltalin mi tampi a khem ding uh hi.

⁷Galthu le galthuthang na zak uh ciangin na patau nai kei un. Tua bangte a piang pelmawh ding mah ahi hi. Ahi hangin hun beina hi nai lo hi.

⁸Mi nam khat le nam khat kido dinga, gam khat le gam khat a kido ding uh hi. Mun tuamtuam ah zin lingin kialpi a tung ding hi. Hihte khempeuh nausuahnat kipatna ahi hi.

⁹Note kigingsa in om pelmawh un. Tualsung vaihawmte khutah note hong ap ding uh a, synagogue-te sungah hong sat ding uh hi. Keima hangin gam-ukte le kumpite mai-ah teci in na ding ding uh hi.

¹⁰Minamte khempeuh tungah lungdamna-thu kihilh masa pelmawh ding hi.

¹¹Note hong kimanin thu hong kisit peuhpeuh ciangin, bang ka gen ding hiam, ci-in ama-in lunghimawh khol kei un. A gen ding no hi loin Khasiangtho hizaw ding ahi manin tua huna hong kipia peuhpeuh na gen lel un.

¹²"Unau khat le khat ahi zongin, pa in a ta ahi zongin, sih nading dongin a kilehhek ding uh hi. A nu a pa-te langah tate pang ding uh a, a thatsak ding uh hi.

¹³Keima hangin mi khempeuh in note hong mudah ding uh hi. Ahi zongin a bei dongin a kipte kihonkhia ding hi.

¹⁴"Note in ‘a hawmmangsak kihhuaina’ e[61] a f[62] kisai loh na munah a ding na muh uh ciangin—a simte in theitel ta hen—Judea gama omte mual tungah tai uh hen.

¹⁵A innkhuma omte kuamah kumsuk kei hen. Ahikeh inn sunga na khatpeuh la dingin lut kei hen.

¹⁶Lo-a om kuamah a puantual-pi la dingin ciah kei hen.

¹⁷Nau paiite le naungek nei numeite adingin tua nite a mulkimhuai lua ding hi!

¹⁸Hih hun phalbi sunga a tun loh nadingin thu na ngen un.

¹⁹Ahang in, Pasian in leitung a piansak cil-a kipan tu hun dong tua zah a om ngei lo le a om ngei nawn lo ding lungdonna nite ahi ding hi.

²⁰Topa in tua nite tomsak lo hileh kuamah a suakta zo kei ding hi. Ahi hangin amah in a teelsa teltuamte hangin tua nite a tomsak khin zo hi.

²¹Tua hun ciangin mi khatpeuh in note kiangah, ‘En un, hih lai-ah Christ g[63] om hi!’ ahikeh, ‘Hua lai-ah om hi!’ hong cih leh um kei un.

²²Ahang in, Christ zuaute le kamsang zuaute hong kilang ding uh a, hi thei hi leh teelsate nangawn a khem nadingun limte le nalamdangte a bawl ding uh hi.

²³Tua ahi ciangin kigingsa in om un; na khempeuh a pian ma-in kong genkhol hi.

²⁴"Ahi hangin tua lungdon nite khit ciangin, " ‘ni kimialsak dinga, kha a tang nawn kei ding hi;

²⁵van panin aksite kiasuk dinga, van-a om nate kilingsak ding hi.’ a[64]

²⁶"Tua hunin mite in Mihing Tapa a vanglianpi le a minthanna tawh meii lakah a paisuk a mu ding uh hi.

²⁷Tua ciangin amah in ama vansawltakte sawl dinga, lei kiu lite pan, leimongte panin van mongte dongin a teelsa mite a kaikhawm ding hi.

²⁸"Tu-in hih thute theikung panin na sin un: A hiang menga a teh a sel phetin khuakhal hong nai ta hi, cih na thei uh hi.

²⁹Tua mah bangin hih nate a piang na muh ciangun kongbiang mahmah dong hong nai ta hi, cih na thei un.

³⁰Thutak kong genin-ah, hih thute khempeuh a tun khit mateng hih khang b[65] mite a bei kei ding uh hi.

³¹Van le lei a mangthang ding hi; ahi zongin ka thu a mangthang ngei kei ding hi.

³²"A ni ahi zongin a hun ahi zongin kuamah in a thei kei hi; vantunga vansawltakte nangawn in a thei kei uh hi; Tapa in zong thei lo a, ahi zongin Pa khat bek in a thei hi.

³³Kigingsa-in om un! Kigalging un! c[66] Tua hun cik ciangin hong tung ding cih na thei kei uh hi.

³⁴Tua in khual zinkhia mi khat tawh kibang hi. Amah in a nasemte khutah a inn ap a, amau sep ding ciat sehsakin, kongcingpa kiangah a vil gige ding a vaikhak hi.

³⁵"Tua ahi ciangin inn neipa a tun kik ding hun—nitak hi ding hiam, zankim laitak hi ding hiam, akkhuan hi ding hiam, phalvak ciang hi ding hiam, cih thei lo na hi manun na vil gige un.

³⁶Amah thakhatin hong tung vat leh ihmusa a na om laitak uh kituaksak kei un.

³⁷Note kianga kong cih bangin a kuamahpeuh kiangah: ‘Vil un!’ ka ci hi," a ci hi.