Read Zokam Mark 14 Bible Online

Mark 14 - Zokam bible

Mark 14

¹Tu-in Paisan-pawi le Silngo-sawhloh Anlum Pawi ding ni nih bekin a sap laitakin, siampi makaite le thukham siate in, Jesu mansima thahlup theih nading lampi a zong uh hi.

²Amaute in, "Mipite hong so kha ding ahi ciangin Pawi sungin hih kei ni," a ci uh hi.

³Bethany a Miphak Simon kici pa inn-a sabuai tungah Jesu kingama a om laitakin a manpha mahmah nard kia kibawl sathau namtui suangngo thawl khat tawi-in numei khat ama kiangah a pai hi. Tuanu in a thawl sukham a Jesu lutang tungah sathau namtui a buak hi.

⁴Tua lai-a om mi kimkhat lungkim lo uh a, "Sathau namtui pammaih lel hi lo hiam?

⁵Kizuak leh kumkhat thaman d[67] sanga tamzaw kikhawng ding hi, tua sum mizawngte piakhuai zaw hi," a kici uh hi. Tua ciangin amaute in tuanu a taigawp uh hi.

⁶Jesu in, "Hih nu bangmah cih dah un. Bang hang buaisak na hi uh hiam? Amah in kei tungah a kilawm na khat a sem khin hi.

⁷Note tawh mizawngte a om khawm den ding uh a, na ut hunhunun amaute na huh thei uh hi. Ahi hangin kei note tawh ka omkhawm den kei ding hi.

⁸Hih nu in ama hih theih bang a hih zo hi. Ka pumpi sathau namtui hong buah ciangin kei kivui nading bawlkhol ahi hi.

⁹Thutak kong geninah, lungdamna-thu a kihilhna leitung mun khempeuhah tuanu a kiphawkna in ama hihsa thu zong a kigen ding hi," a ci hi.

¹⁰Tua ciangin Jesu lehek dingin Sawm-le-nihte lakah khat, Judas Iscariot, siampi makaite kiangah a va pai hi.

¹¹Amaute in hih thu a zak uh ciangin lungkim mahmah uh a, ama tungah sum piak dingin a kamciam pah uh hi. Tua hi-a amah in amaute khutah Jesu a piak thei nading hun hoih a ngak gige hi.

¹²Silngo-sawhloh Anlum Pawi ni masa pen ni Paisan tuuno-a biakna a kipiak ngei hunin Jesu nungzuite in ama kiangah, "Paisan-pawi bawl nading koi lai-ah pai-in na bawlkhol le ung na deih hiam?" ci-in a dong uh hi.

¹³Tua ahi ciangin amah in a nungzuite nih sawla, amaute kiangah, "Khuapi sungah pai le uh cin tuibel khat a pua pasal khat tawh na kituak ding uh hi. Tuapa na zui un.

¹⁴Ama lutna inntekpa kiangah, ‘Siapa in: Ka nungzuite tawh Paisan-pawi ka bawl nading, ka zintunna inndei koi lai ahi hiam, ci-in hong dongsak hi,’ va ci un.

¹⁵Amah in van zat ding a kima om, a kipuahsa inndei tungnung a zaipi khat note hong lak ding hi. Tua lai-ah ei adingin na kisakhol un," ci-in a vaikhak hi.

¹⁶Tua nungzuite gel paikhia uh a, khuapi sungah a lut uh ciangin Jesu gensa bang tektek in a mu uh hi. Tua hi-a amaute in Paisan-pawi bawl nading a na kisakhol uh hi.

¹⁷A nitak ciangin Sawm-le-nihte tawh Jesu a tung hi.

¹⁸Amaute sabuai ah kingamin an a nek laitakun amah in, "Thutak kong geninah, an ka nek khawmpih note lakah khat in kei hong lehhek ding hi,"a ci hi.

¹⁹Amaute lungsi dedu uh a, ama kiangah, "Kei hi buang kei ning maw?" ci-in khat khatin a dong uh hi.

²⁰Amah in, "Sawm-le-nihte lakah khat ahi hi; tuapa kei tawh kuangkum-a anlum a diahkhawm pa ahi hi.

²¹Ama’ thu a kigelhsa bangin Mihing Tapa a pai ding hi. Ahi hangin Mihing Tapa a lehhek pa in gimna nak thuak nazen incia! Amah a piang vet lo hileh ama adingin hoihzaw ding hi," a ci hi.

²²Amaute in an a nek laitakun Jesu in anlum la-a, lungdam ko-in balkhama, a nungzuite pia in, "Hih, ka pumpi ahi hi, la unla ne un," a ci hi.

²³Tua khit ciangin hai la-in lungdam ko-a amaute pia-in amaute in tua hai panin a dawn ciat uh hi.

²⁴Amah in amaute kiangah, "Hih in mi tampi ading a[68] kibuakhia thukhunna ka sisan ahi hi.

²⁵Thutak kong geninah, Pasian gam sungah a thaka ka dawn ni mateng tu-a kipan lenggahzu ka dawn nawn kei ding hi," a ci hi.

²⁶Amaute in biakna la a sak khit uh ciangin Olive Vum manawhin a paikhia uh hi.

²⁷Tua khit ciangin Jesu in amaute kiangah, " ‘Tuucingpa ka sat dinga, tuuhonte kithehthang ding hi,’ b[69] ci-a kigelhsa bangin note na vekpi un na pukmang ding uh hi.

²⁸Ahi hangin ka thawh kik khit ciangin note mai Galilee ah ka na pai ding hi," ci-in a gen hi.

²⁹Peter in, "Adang teng khempeuh a pukmang zongin kei ka puk kei ding hi," ci-in a pulakkhia hi.

³⁰Jesu in, "Thutak kong geninah, tuni, tuzan mahmah ak nihvei c[70] a khuan ma-in nang tektek in thumvei nong kitheihmawhbawl ding hi," ci-in a dawng hi.

³¹Ahi hangin Peter in, "Nang tawh sihkhawm ding ahi zongin nang kong kitheihmawhbawl ngei kei ding hi," a ci teitei hi. Adangte khempeuh in zong tua mah a ci ciat uh hi.

³²Amaute Gethsemane kici mun ah pai uh a, Jesu in a nungzuite kiangah, "Thungen-a ka pai kalin hih lai-ah na tu un," a ci hi.

³³Amah in Peter, James le John-te tonpih a lungdong ngeungau-in a lungkham mahmah hi.

³⁴Amah in amaute kiangah, "Dahluatna in sih nading zah in hong zen hi. Hih lai-ah na om unla, na kigalging un," a ci hi.

³⁵Tawmkha pailai-in lei-ah bok a, ahi theih leh tua hun tawh a kipelh nadingin thu a ngen hi.

³⁶"Abba d[71], Pa aw, nang adingin na khempeuh hi thei hi. Hih hai kei kiang panin hong lakkhiatsak in. Ahi zongin kei deihna bang hi loin nangma deihna bang hizaw hen," a ci hi.

³⁷Tua khit ciangin a nungzuite kiangah a pai kik leh amaute ihmu sa a om a mu hi. Amah in Peter kiangah, "Simon aw, ihmu na hi hiam? Nai khat sung beek kigalging zo lo na hi hiam?

³⁸Zia-etna na thuak loh nadingun kigalgingin thu na ngen un. Kha a ut hangin pumpi a thanem hi," a ci hi.

³⁹Khatvei paikhia leuleu-a, a ngetsa mah bangin a ngen hi.

⁴⁰Amah a pai kik ciangin amaute ihmut suak lua uh ahi manin a ihmut laitak uh a tuak leuleu hi. Amaute in ama kiangah a gen ding uh a thei kei uh hi.

⁴¹A thumveina va pai kika, amaute kiangah, "Note ihmu lailai-in tawlnga lailai na hi uh hiam? Pha zo ta! A hun hong tung ta hi. En un, mawhneite khut sungah Mihing Tapa a kilehhek hun hong tung petmah hi.

⁴²Tho un! Pai ta ni! Kei hong lehhekpa hih lai-ah hong pai ta hi!" a ci hi.

⁴³Tua banga a paupau laitak, Sawm-le-nihte lakah khat Judas a kilang hi. Siampi makaite, thukham siate le upate sawl namsau le khetbuk tawi mihon amah tawh a tonkhawm uh hi.

⁴⁴Tua a lehhekpa in, "Ka nappa pen amah hi ding hi; tuapa man pah unla, cingin paikhiatpih un," ci-in amaute tawh lim a kilakkhol khin hi.

⁴⁵Jesu kiangah Juda paipah a, "Rabbi aw!" ci-in Jesu a nam hi.

⁴⁶Tua mite in Jesu lencipin a man uh hi.

⁴⁷Tua laitakin a gei-a dingte khat in a namsau dokin tulpipa nasempa a sat leh a bil langkhat a satkhia hi.

⁴⁸Jesu in, "Kei man dinga namsau le khetbuk tawh nong kuan zawzen uh, kumpi langpangte makai ka hi hiam?

⁴⁹Nisimin biakinnpi tualte ah thu ka hilh laitakin nong man kei uh hi. Ahi hangin Laisiangtho a tangtung pelmawh ding mah ahi hi," a ci hi.

⁵⁰Tua ciangin mi khempeuh amah nusia-in a taimang uh hi.

⁵¹Saihadial puanza khat longal puan dang a silh lo tangval khat in zong Jesu a zui hi. Amaute in amah a mat uh ciangin,

⁵²amah in a puanza nusia in a guaktang in a tai hi.

⁵³Amaute in tulpipa kiangah Jesu paipih uh a siampi makaite, upate le thukham siate khempeuh a kikhawm uh hi.

⁵⁴Peter in tulpipa inntual ciang tektek a kihal simsimin Jesu a zui hi. Tua laitakah amah a cingte tawh mei awi-in a va tukhawm hi.

⁵⁵Siampi makaite le Sanhedrin buppi in Jesu a thah theih nadingun langpangin paulap a zon uh hangin khat beek a mu kei uh hi.

⁵⁶Ama langah mi tampi dingin zuau teci a pan uh hangin a thugente uh a kituak kei hi.

⁵⁷Tua ciangin mi pawlkhat dingin ama langah hih zuau teci pang uh a,

⁵⁸"Amah in, ‘Mihing khuta kibawl hih biakinnpi ka susia dinga, mihing khuta kibawl lo adang khat nithum sungin ka lam kik zo ding hi,’ a cih ka za uh hi," a ci uh hi.

⁵⁹Tua bang hi napi amaute teci panna a kituak kei lailai hi.

⁶⁰Tua ciangin amaute mai-ah tulpipa dingin Jesu kiangah, "Dawng lo ding na hi hiam? Na langkhata hihte tecipanna bang hiam?" ci-in a dong hi.

⁶¹Ahi hangin Jesu in dawng loin a dai dide hi. Tua ciangin tulpipa in ama kiangah, "Nang Thupha Ngahpa’ Tapa Christ e[72] na hi hiam?" ci-in a dong kik hi.

⁶²Jesu in, "Ka hi hi. Note in Thahat Pa taklama tu meiipi tunga hong paisuk Mihing Tapa na mu ding uh hi," a ci hi.

⁶³Tulpipa in a puansilh balkek a, "Teci dang kul nawn ding ahi hiam?

⁶⁴Pasian a gendaina na za zo uh hi. Bang na ci ngaihsut uh hiam?" ci-in a dong hi. Amaute in amah sihsak thamin a mawhpaih uh hi.

⁶⁵Tua ciangin pawlkhat in amah cilphih uh a, a mai tuamin a khuttum uh tawh tumin, "Hong gen in!" a ci uh hi. Tua ciangin a cingte in amah tonpih in a sat uh hi.

⁶⁶A nuai innpi tualah Peter a om laitakin tulpipa nasem numeite khat a kiangah va pai hi.

⁶⁷Tuanu in Peter mei-awi a muh ciangin amah a va nai et mahmah hi. "Nang zong tua Nazareth mi Jesu tawh na kipawl hi," a va ci hi.

⁶⁸Ahi hangin aman a nial hi. Amah in, "Na thugen ka thei kei-a, a pianzia zong ka thei beek kei hi," ci-in kong pua ah a kihemkhia hi. a[73]

⁶⁹Tua numei mah in tua lai-a om a muh ciangin a kima dingte kiangah, "Hih pa amaute lakah khat ahi hi," a ci kik hi.

⁷⁰Amah in a nial leuleu hi. Tawlkhat khit ciangin a gei-a dingte in Peter kiangah, "Amau pawlte lakah khat na hi taktak hi. Galilee mi na hi ngel ve leh," a ci uh hi.

⁷¹Tua ciangin amah le amah kihamsiat in, "Na gen uh hih mipa ka thei peuhmah kei hi," ci-in a tomlo hi.

⁷²Tua khit phetin a nihveina b[74] ak a khuang hi. Tua ciangin Peter in Jesu in a ma tunga, "Ak nih vei c[75] a khuan ma-in thum vei nong kitheihmawhbawl ding hi," ci-a a gensa a phawk hi. Tua ciangin amah ki-ip zo nawn loin a kapkhia hi.