Read Zokam Mark 15 Bible Online

Mark 15 - Zokam bible

Mark 15

¹Zingsang phalvak tungin siampi makaite in upate, thukham siate le Sanhedrin buppi tawh thukhensatna a bawl uh hi. Amaute in Jesu henin paikhiatpih uh a, Pilate khutah a tun uh hi.

²Pilate in, "Nang Jew-te kumpipa na hi hiam?" ci-in a dong hi. Jesu in, "Ka hi hi, na cih bang ahi hi," ci-in a dawng hi.

³Siampi makaite in amah thu tampi tawh a mawhmat uh hi.

⁴Tua ahi ciangin Pilate in, "Amaute in nang thu tampi tawh hong mawhmat uh na thei hi. Dawng lo ding na hi hiam?" ci-in a dong hi.

⁵Ahi hangin Jesu in dawng tuan lo lailai ahi ciangin Pilate in lamdang a sa mahmah hi.

⁶Tua hun lai-in pawi hun ciangin mipite nget thongkia khatpeuh a khahkhiat ding ngeina ahi hi.

⁷Kumpi langdo-a, tualthatte tawh thong kiakhawm Barabbas kici mi khat a om hi.

⁸Pilate kiangah mihonpite va pai uh a, a hih ngei banga a hih nadingin a ngen uh hi.

⁹Pilate in, "Jew-te kumpipa no kiangah hong khah leng na deih uh hiam?" ci-in a dong hi.

¹⁰Tua pen siampi makaite in Jesu a hazat manun ama khutah a tut uh ahilam a theih man ahi hi.

¹¹Ahi hangin Pilate in Barabbas a khahsak zawk nadingin siampi makaite in mihonpite a tawsawn uh hi.

¹²Pilate in, "Tua ahileh Jew-te kumpipa na cih pa uh bang ka cih ding hiam?" ci-in a dong hi.

¹³Amaute in, "Kilhlum in," ci-in a kiko uh hi.

¹⁴Pilate in, "Bang hangin maw? Amah in bang tatkhialhna nei ahi hiam?" ci-in a dong hi. Ahi hangin amaute in, "Amah kilhlum in!" ci-in a kinak ko semsem uh hi.

¹⁵Pilate in mihonpite a lungkimsak nop manin amaute kiangah Barabbas a khah hi. Amah in Jesu a satsak khit ciangin kilhlup dingin amaute khutah a ap hi.

¹⁶Galkapte in Jesu kumpi inn (tua pen gam-ukpa innpi) ah paipih uh a, tua ciangin galkap company bup khat a sam uh hi.

¹⁷Tua ciangin amaute in kumpi puan dupsan khat silhsak uh a, ling tawh kumpi lukhu khat phanin amah a khusak uh hi.

¹⁸Tua ciangin amaute in, "Jew-te kumpipa aw, na khan sawt ta hen!" ci-in a otkhai uh hi.

¹⁹Amaute in ciangkhutin a lu satsat uh a, cil a phihphih uh hi. Amaute khuk dinin amah a bia uh hi.

²⁰Amah a zahko khit uh ciangin kumpi puan dupsan suahkhiatsak uh a, ama puan a silhsak kik uh hi. Tua khit ciangin kilhlup dingin a paikhiatpih uh hi.

²¹Alexander le Rufus-te pa, Cyrene pana Simon kici mi khat in gamsung panin tua lai a va tawn hi. Amaute in zawhthawh thu-in amah singlamteh a puasak uh hi.

²²Amaute in Golgotha (Luguh Mun cihna) kici munah Jesu a paipih uh hi.

²³Tua ciangin amaute in amah, paknamtui kha tawh kihel lenggahzu a pia uh hi. Ahi hangin a dawn kei hi.

²⁴Amaute in singlamteh tungah amah a kilh uh hi. Amaute in a puan hawm uh a, kua in koi tang ding cihna-in ai a lawn uh hi.

²⁵Amaute in amah a kilh laitakun nai thumna a sat hi.

²⁶Amah kimawhmatna-in JEW-TE KUMPIPA, ci-in theihsakna lai kigelh hi.

²⁷Amaute in amah tawh, misuamte nih a taklam khat, a veilam khat kilh uh a,

²⁸tua ciangin Laisiangtho gen: "Thukham palsatte tawh amah kisimkhawm hi" cih thu a tangtung hi. d[76]

²⁹Tua lai a tawnte in amah engko in lupeisan uh a, "Petmah aw! Nang, biakinnpi susia a ni thum sunga lam kik ding pa,

³⁰singlamteh tung pan hong kumsuk inla, nang le nang hong kihon khia dih ve!" a ci uh hi.

³¹Tua mah bangin siampi makaite le thukham siate in amaute lakah amah a zahko uh hi. Amaute in, "Amah in midangte honkhia zo a, amah le amah kihonkhia zo lo pi!

³²I mitin mu a i up theih nadingin hih Israel-te kumpipa, hih Christ e[77] singlamteh tung pan hong kumsuk ta hen," a ci uh hi. Tua mah bangin amah tawh a kikilh khawmte in zong a engko uh hi.

³³Tua gam bupah nai gukna-a kipan nai kuana dong khim a zing hi.

³⁴Nai kuana laitakin Jesu in, "Eloi, Eloi, lama sabacthani?" ci-in nakpi-in a kiko hi. A khiatna in, "Ka Pasian, ka Pasian aw, bang hangin kei hong taisan na hi hiam?" a[78] cihna ahi hi.

³⁵Tua lai-a ding mi kimkhat in a zak uh ciangin, "Ngai dih un, amah’n Elijah sam hi," a ci uh hi.

³⁶Mi khat va tai-a, lenggahzu thuk sungah tuihup a diah khit ciangin ciang dawnah koihin Jesu dawn dingin a pia hi. Amah in, "Bangmah cih dah dih un. Amah lakhiasuk dingin Elijah hong pai hiam, en phot dih ni," a ci hi.

³⁷Jesu nakpi-in kiko-a tua ciangin a hutawpna a sang hi.

³⁸Biakinnpi puanzak a lu pan a taw dong kikekin phel nih a suak hi.

³⁹Jesu mai-a ding zakhat-ukpa in ama kikona le b[79] a sihzia a muh ciang- in, "Hih pa Pasian Tapa c[80] hi takpi ei!" a ci hi.

⁴⁰A gamla sim pan numei pawlkhat in a galvil uh hi. Amaute lakah Mary Magdalene, James nauzaw pen le Joses nu Mary, le Salome-te a om uh hi.

⁴¹Hih numeite in Galilee ah amah zui uh a, a kisapnate a sepsak uh hi. Jerusalem dong amah tawh a ton numei dang tampi zong tua lai-ah a om uh hi.

⁴²Tua ni, kiginkholh Ni, Sabbath tunma ni ahi hi. Tua hi-a ni niam kuan ciangin,

⁴³Pasian gam a ngak gige Vaihawmte lakah mi thupi khat, Arimathea mi Joseph Pilate kiangah hangtakin pai-a Jesu luang a va ngen hi.

⁴⁴Pilate in amah si zo cih a zak ciangin lamdang a sa hi. Amah in zakhat-ukpa samin, Jesu si khin takpi hiam, cih a dong hi.

⁴⁵Si khin zo takpi, cih zakhat-ukpa kam pan a zak ciangin a luang Joseph a pia hi.

⁴⁶Tua ciangin Joseph in saihadial puan pawlkhat lei-in siluang lakhia suka, saihadial puanin a tun khit ciangin suangpi a khuak han sungah a sial hi. Tua ciangin tua han kong vang suangtum khatin a khak hi.

⁴⁷Mary Magdalene le Joses nu Mary-te in ama kisialna mun a mu uh hi.