Read Zokam Mark 2 Bible Online

Mark 2 - Zokam bible

Mark 2

¹Ni tawmvei khit Capernaum ah Jesu a lut kik ciangin inn tung kik hi, cih thu mite in a za uh hi.

²Inn pua nangawnah om nading om lo zah dongin mi tampi va kikhawm uh a, amah in amaute kiangah thu a hilh hi.

³Mi pawlkhat va pai uh a, mi li in a zawn pumzaw khat a kiangah a paipih uh hi.

⁴Mihonpite hangin Jesu kiang a tut theih loh manun Jesu tung santak innkhum phelkhia in vangsak uh a, tua ciangin a zawna phekin pumzawpa a khaisuk uh hi.

⁵Jesu in amaute upna a muh ciangin pumzawpa kiangah, "Tapa aw, na mawhnate kimaisak zo hi," a ci hi.

⁶Tua lai-a tu thukham siate pawlkhat in,"

⁷Bang hangin hih pa tua bangin pau ahi hiam? Amah in Pasian a gendai hi! Pasian longal kua in mawhna maisak thei ahi hiam!" ci-in a ngaihsun uh hi.

⁸Amaute lungsim sunga a ngaihsutna uh Jesu in a kha-in theipah ahi manin amaute kiangah, "Hih thute bang hangin ngaihsun na hi uh hiam?

⁹Pumzawpa kiangah, ‘Na mawhnate kimaisak zo hi,’ cih ding le, ‘Tho in, na phek la-in pai in,’ cih ding koi baihzaw ahi hiam?

¹⁰Ahi hangin Mihing Tapa in hih leitungah mawh maisak theih nading thu nei hi, cih na theih nadingun...," a cih khit ciangin pumzawpa kiangah,

¹¹"Tho in, na phek la inla innah ciah in, kong ci hi," a ci hi.

¹²Amah tho a, a phek la-in amaute khempeuh muhin a paikhia hi. Mi khempeuh in lamdang mahmah sa uh a, "Hih bang peuhmah mu ngei nai kei hang maw!" kici-in Pasian a phat uh hi.

¹³Khatvei tuilipi gei-ah Jesu a pai leuleu hi. Mihon tampi ama kiangah va pai uh a, amah in amaute thu a hilh hi.

¹⁴Amah a pai kawikawi laitakin Alphaeus tapa Levi, siahdonna bukno sunga tu a mu hi. Jesu in, "Kei hong zui in," a cih ciangin Levi dingto in a zui hi.

¹⁵Levi innah Jesu in nitak-an a nek laitakin mi tampi in a nung zui ahi manin siahdongte tampi le "mawhneite" in amah le a nungzuite tawh a nekhawm uh hi.

¹⁶Thukham sia ahi Pharisee-te in "mawhneite" le siahdongte tawh an a nekkhawm a muh uh ciangin, "Amah in bang hangin siahdongte le "mawhneite" tawh ankuang umkhawm ahi hiam?" ci-in a nungzuite kiangah a dong uh hi.

¹⁷Jesu in hih thu a zak ciangin amaute kiangah, "Siavuan kisam cidamte hi loin cinate hizaw hi. A thumaante sam dinga hong pai ka hi kei a, mawhneite sam dinga hong pai ka hi hi," a ci hi.

¹⁸John nungzuite le Pharisee-te in an a tang uh hi. Jesu kiangah mi pawlkhat va pai uh a, "John nungzuite le Pharisee-te nungzuite in an tang napi bang hangin nang nungzuite in an tang lo uh hiam?" ci-in a dong uh hi.

¹⁹Jesu in, "Zineipa tawh a omkhawm kimlai bangci in mopawi simte in an tang thei ding uh hiam? Zineipa tawh a omkhawm lai tengun an a tang thei kei ding uh hi.

²⁰Ahi hangin amaute kiang pan zineipa a kilakkhiat hun hong tung ding hi. Tua ni ciangin amaute in an a tang ding uh hi.

²¹"Kuamah in a ton nai lo puanbekin puanlui a thuap ngei kei hi. A thuap leh tua puanthak them in puanlui kaikekin a kek semsem ding hi.

²²Savun-um lui sungah lenggahzu thak kuamah in a thun ngei kei hi. Tua bangin thun leh lenggahzu in savun-um phukham dinga, lenggahzu le savun-um a kisia khawm ding hi. Tua bang hi lo zaw in, savun-um thak sungah lenggahzu thak thun zaw hi," a ci hi.

²³Sabbath ni khat Jesu buhlei tawnin a pai hi. Nungzuite in a pai kawmkawmun buhvuite a zut uh hi.

²⁴Pharisee-te in a kiangah, "En in, bang hangin amaute Sabbath ni-in thukham tawh kituak loin gamta uh hiam?" a ci uh hi.

²⁵Amah in, "David le a pawlte in a gilkial laitak uh le a kisap laitakun bang hih uh cih sim ngei nai lo na hi.uh hiam?

²⁶Tulpi Abiathar hunlai-in Pasian inn sungah amah luta, siampite bekin a nek theih a ki-apsa anlum ne-in, a pawlte zong a pia hi," ci-in a dawng hi.

²⁷Tua ciangin amah in amaute kiangah, "Mite adingin Sabbath kibawl hi-a Sabbath ni adingin mite a kibawl kei hi.

²⁸Tua hi-a Mihing Tapa, Sabbath ni Topa nangawn ahi hi," a ci hi.