Read Zokam Mark 3 Bible Online

Mark 3 - Zokam bible

Mark 3

¹Khatvei synagogue ah a pai leh a khut teem mi khat a na om hi.

²Amaute lakah pawlkhat in Jesu a mawhmat nading uh zongin, tua mipa Sabbath ni-in a damsak kha hiam, ci-in a vil gige uh hi.

³Jesu in khutteem pa kiangah, "Mi khempeuh mai-ah ding dih in," ci-in a sawl hi.

⁴Tua ciangin Jesu in amaute kiangah, "Sabbath ni-in a sia hih ding le a pha hih ding, nuntakna hot ding le thah ding, koi pen thukham tawh kituakzaw hiam?" ci-in a dong hi. Ahi hangin amaute a dai khipkhep uh hi.

⁵Amah hehin akim apam en-a, amaute lungkhauhna hangin lungdong ngeungau-a khutteempa kiangah, "Na khut zan in," ci-in a sawl hi. Amah in a khut a zan leh, a sa dim kikin a damsiang kiuhkeuh hi.

⁶Tua ciangin Pharisee-te paikhia uh a, Jesu a thah theih nadingun Herod pawlte tawh a geelsim uh hi.

⁷Jesu a nungzuite tawh tuilipi lamah kihemkhia uh a Galilee panin mihon tampi in a zui uh hi.

⁸Amaute in ama hihte khempeuh a zak uh ciangin Judea, Jerusalem, Idumea le Jordan gungal kual teng le Tyre le Sidon kima gamte panin mi tampi in amah a zuan uh hi.

⁹Mihonpite in amah a nehcip gawp khak loh nadingin gunkuang khat kigingsa-a a koih nadingun Jesu in a nungzuite kiangah a gen hi.

¹⁰Ahang in, amah in mi tampi damsak khin ahi manin a cina laite in amah lawng nuamin mailam a phu tentan uh hi.

¹¹Amah kha gilote a[7] in a muh peuhpeuh uh ciangin a mai-ah bokin, "Pasian Tapa na hi hi," ci-in a kiko uh hi.

¹²Ahi hangin amah kua hiam, cih a gen loh nadingun amaute thukhauh a pia hi.

¹³Jesu mualtung lamah kahto a, ama deihte a kiangah samin amaute in amah a zuan uh hi.

¹⁴Amah in sawm-le-nihte sehkhia-a, sawltakpi, b[8] ci-in a minvawh hi. Tua in amaute ama kiangah a om theih nading, thu hilh ding le

¹⁵dawite hawlkhiat theihna thuneihna nei-a a sawlkhiat theih nading ahi hi.

¹⁶A sehkhiat sawm le nihte hih teng ahi hi: Simon (Peter min a phuah);

¹⁷Zebedee tapa James le a sanggampa John (Vanging Tapate cih nopna in amau unau Boanerges, ci-a min a phuah);

¹⁸Andrew, Philip, Bartholomew, Matthew, Thomas, Alphaeus tapa James, Thaddaeus, Zealot pawl-a Simon

¹⁹le amah lehhekpa Judas Iskariot-te ahi hi.

²⁰Tua ciangin Jesu inn khatah luta mihonpite va kikhawm leuleu uh ahi manin amah le a nungzuite in an nangawn a ne thei kei uh hi.

²¹A innkuanpihte in hih thu a zak uh ciangin, "Amah a lungmawk ahi hi," ci-in a kemcing dingin a pai uh hi.

²²Jerusalem pana paisuk thukham siate in, "Ama sungah Beelzebub c[9] lut hi! Amah in dawimangpa suangin dawite a hawlkhia hi," a ci uh hi.

²³Tua ahi ciangin Jesu in amaute samin gentehnate zangin amaute kiangah thu gen a, "Bangci bangin Satan in Satan hawlkhia thei ding ahi hiam?

²⁴Amah le amah kilangpanga a kikhenthang kumpi-gam a kip kei hi.

²⁵Amah le amah kilangpanga kikhenthang innkuan a kip kei ding hi.

²⁶Tua ahi ciaingin Satan, amah le amah kilangpangin kikhenthang leh a kip kei ding hi; ama beina a tung ta hi.

²⁷A taktak in mi khatpeuh in mihatpa hencip masa loin tuapa inn sungah lutin a neihsa bangci puakkhiatsak thei ding ahi hiam? A hencip khit ciangin a inn a luh thei pan ding hi.

²⁸Thutak kong geninah, mite mawhnate khempeuh le Pasian gen dainate khempeuh kimaisak ding hi.

²⁹Ahi hangin Khasiangtho a gendai peuhmah a kimaisak ngei kei ding hi; amah tawntung khialhna ah a mawh hi," a ci hi.

³⁰Amaute in, "Amah in kha gilo nei hi," a cihna uh hangin amah in hih thu a gen hi.

³¹Tua ciangin Jesu nu le a sanggamte a tung uh hi. Amaute innpua ah ding uh a, amah sam dingin inn sungah mi khat a sawl uh hi.

³²A kimkotah mihonpi tu uh a, amaute in ama kiangah, "Na nu le na sanggamte nang hong zongin inn pua-ah om uh hi," ci-in a hilh uh hi.

³³Amah in, "Ka nu kua hi a, ka sanggamte kua ahi hiam?" ci-in a dong hi.

³⁴Tua ciangin amah in a kimkot-a tute en a, "Hih lai-ah ka nu le ka sanggamte a om uh hi!

³⁵Pasian deihna a hih peuhpeuh ka sanggampa, ka sanggamnu le ka nu ahi uh hi," a ci hi.