Read Zokam Mark 4 Bible Online

Mark 4 - Zokam bible

Mark 4

¹Hun dang khatin Jesu in tuilipi gei-ah thuhilh a kipan hi. Ama kimkota kikhawm mi tam lua ahi manin tuilipi tunga gunkuang sungah kahin a tu hi. Mipite ahileh tui gei sehtak tungah a tu uh hi.

²Amah in amaute gentehnate tawh na tampi hilh a:

³"Ngai un! Lokhopa khat ama khaici vawh dingin a kuankhia hi.

⁴Khaici a theh ciangin pawlkhat lamdung-ah tu-a, vasate pai-in tawmin a nemang uh hi.

⁵Pawlkhatte leitak tam lohna mun, suang lakah a tu hi. Leitak dai ahi manin popah sam hi.

⁶Ahi hangin ni a san ciangin ankungte kangdulh a, zung kha zo lo ahi manin vulpah hi.

⁷Adang pawlkhatte ling lakah tu-a, lingkungte khangin ankungte depgawp ahi manin gah a gah zo kei hi.

⁸Adang pawlkhatte leuleu lei hoihna ah a tu hi. Ankung po-a, khangtoin, a kivawh zah sawmthum, sawmguk tham lo zakhat nangawn a gahkhia hi," a ci hi.

⁹Tua ciangin Jesu in, "Bil nei peuh in za ta hen," a ci hi.

¹⁰Amah kia a om laitakin, Sawm-le-nihte le ama kima om adangte in tua gentehna thute, amah a dong uh hi.

¹¹Amah in amaute kiangah, "Note tungah Pasian gam thusim hong kipia zo hi. Ahi hangin a pualama omte gentehnate tawh ka hilhna pen,

¹²"‘Amaute in mu ngitnget napi, mutel ngei lo ding uh a, za ngitnget napi, a theitel ngei kei ding uh hi; tua hi kei leh amaute lunghei in, kimaisak kha ding hi!’" a[10] a ci hi.

¹³Tua ciangin Jesu in amaute kiangah, "Hih gentehna theitel lo na hi uh hiam? Tua ahileh gentehna khatpeuh bangci theihtel thei ding na hi uh hiam?

¹⁴Lokhopa in thu a vawh hi.

¹⁵Mi pawlkhatte thu kivawhna lamdung a tu khaici tawh kibang uh hi. Tua thu a zak phetun Satan va pai-a amaute sunga kivawhsa thu a lak mangsak hi.

¹⁶Adangte, suang laka tu khaici tawh kibangin thu ngai uh a, lungdamin a sangpah uh hi.

¹⁷Ahi hangin zung kha lo ahi manin tawmvei sung bek a hing zo hi. Thu hangin lungmanna ahi zongin bawlsiatna ahi zongin a tun ciangin a pukmang pah uh hi.

¹⁸Adangte leuleu, ling laka tu khaici kivawh tawh kibang uh hi; thu ngai uh a,

¹⁹ahi hangin leitung nuntak nading lunghimawh nate, hauhna’ khemna-te le nadangte lunggulhna lutin, thu depgawp a, gah a gahsak kei hi.

²⁰A dangte lei hoihna-a tu khaici tawh kibang uh hi; thu ngai-in sang uh a, a kivawh zah sawmthum, sawmguk tham lo za khat nangawn a gahkhia uh hi," a ci hi.

²¹Amah in amaute kiangah, "Note in kuangkum nuai peuh lupna nuai peuh a koih dingin meivak keng na hi uh hiam? A tunna tungah tungzaw hi lo na hi uh hiam?

²²Ahang in, a ki-imcip peuhmah a kigenkhia ding cihnopna hi-a, a kiselcip peuhmah a kipholak ding cihnopna ahi hi.

²³Zak nading bil nei peuh in za ta hen," a ci hi.

²⁴Amah in, "Na zakte uh limtakin ngaihsun un. Midangte aa na tehna uh tawh no aa zong hong kitehsak tham loin a tamzaw in hong kiteh kik ding hi.

²⁵A nei peuhmah a kipia beh ding hi; a nei lo peuhmah a neihsun nangawn a kilak khiatsak ding hi," a ci lai hi.

²⁶Amah in, "Pasian gam pianzia hih bang ahi hi: Mi khat in leitungah khaici a vawh hi.

²⁷Amah in khaici pianzia a theih loh hangin a sun a zan, a ihmut kal ahi zongin, a hah sung ahi zongin khaici po in na khang hi.

²⁸Lei in ama thu-in gah a gahsak hi. A masa penin a kung, tua khit ciangin a vui, tua khit ciangin a vui sungah atak a piangsak hi.

²⁹Buh a min phetin an lak hun tung ta ahi manin phiaukawi tawh a at hi," zong a ci lai hi.

³⁰Amah in, "Pasian gam pianzia bang tawh kibang ci ding i hi hiam? Bang gentehna zangin telgen ding i hi hiam?

³¹Pasian gam in lei sunga na tuh khaici neupen ankam tang tawh kibang hi.

³²Ahi zongin a kituh ciangin khangto-a, huan ankungte khempeuh lakah a lian pen suakin vana vasate a lim belin a tuan theih-na zahin a hiangte lian hi," ci-in a gen leuleu hi.

³³Jesu in amaute theihcian theih zahzah tua tawh a kibang gentehna tampite zangin amaute thu a hilh hi.

³⁴Amah in gentehna zang loin amaute bangmah a hilh kei hi. Ahi hangin a nungzuite bek tawh a omkhawm ciangin na khempeuh a hilhcian hi.

³⁵Tua ni nitak lam ciangin amah in a nungzuite kiangah, "Galkhat lamah pai ni," a ci hi.

³⁶Mihonpite nusia-in, amaute in gunkuang sunga a om bangbangin a paipih uh hi. Gunkuang dangte tawh zong a ton uh hi.

³⁷Huih le guah nasiatakin kinuai-a, tuihualte in gunkuang vatin gunkuang a tuum dektak hi.

³⁸Gunkuang nunglamah lukham khamin Jesu a ihmu hi. Nungzuite in amah phong uh a, "Sia aw, tui kia le ung phamawh sa lo na hiam?" a ci uh hi.

³⁹Amah tho a huih tai-in tuihualte kiangah, "Dai un! Tang kei un!" a ci hi. Tua ciangin huih nung khawla, tui sippahin a dai dide hi.

⁴⁰Amah in a nungzuite kiangah, "Bang dinga tua ci lau lawmlawm na hi uh hiam? Upna nei nai lo lailai na hi uh hiam?" a ci hi.

⁴¹Amaute lau lua mahmah uh a, "Hihpa kua hiam? Huih le tuihualte nangawn in a thu mang tazen hi!" a kici uh hi.