Read Zokam Mark 5 Bible Online

Mark 5 - Zokam bible

Mark 5

¹Amaute tuilipi kantanin Gerasenes a[11] kual lamah a pai uh hi.

²Gunkuang pan Jesu a tuahkhiat ciangin, amah a dawntuah dingin kha gilo b[12] a lut mi khat hankhuk lak pan a paikhia hi.

³Hih mipa hankhuk laka teng hi-a, kuamah in sikkhau nangawn tawh a hen zo nawn kei hi.

⁴A khut le a khete a sikkhainiang bottatin a khe-a sikkolte a sutan hi. Amah a thazawh zo dinga hat kuamah a om kei hi.

⁵A sun a zanin hankhuk lak le mual tungah awng-a, amah le amah suang tawh a kikui keh hi.

⁶Jesu a galmuh ciangin tai-in a mai-ah a khukdin hi.

⁷Tuapa in, "A Sang Pen Pasian Tapa Jesu aw, kei bang hong cih nuam na hiam? Kei hong bawlsia lo dingin Pasian tungah kiciam in!" ci-in a aw neih zahin a awng hi.

⁸Ahang in, Jesu in ama kiangah, "Kha gilo aw, hih pa sung pan paikhia in," a ci hi.

⁹Tua ciangin Jesu in ama kiangah, "Na min bang hiam?" ci-in a dong hi. "Tampi pha ka hi manun, ka min Legion hi," ci-in a dawng hi.

¹⁰Tua ciangin tua kuam pana amaute a hawlkhiat loh nadingin Jesu kiangah tuapa in a ngen kikkik hi.

¹¹A kianga mual pangah vok hon tampi a gamta hi.

¹²Dawite in Jesu kiangah, "Vokte lakah hong sawl inla tuate sungah hong lutsak in," ci-in a thum uh hi.

¹³Amah in amaute phalna pia-a, tua ciangin kha gilote paikhia-in vokte sungah a lut uh hi. Vok honte tul nih bang pha a, kensang pan tuili sungah tuaksukin tui a kia khin uh hi.

¹⁴Vok cingte tai-in khuapi le khua neu ah hih thu a koh uh ciangin bang thu piang hiam cih en dingin mi tampi a kuankhia uh hi.

¹⁵Amaute Jesu kiang a tun uh ciangin dawi legion khat a lutna pa, tua lai-ah tu-in puan silha, a lungsim pila om a muh uh ciangin a lau uh hi.

¹⁶Tua thu a musate in dawi lutpa tunga piangte le vokte thu zong mite kiangah a gen uh hi.

¹⁷Tua ciangin mipite in Jesu in amau kual a nusiat nadingin a thum uh hi.

¹⁸Gunkuang ah Jesu a kah laitakin tua dawilut ngei pa in amah a zuih nadingin a thum hi.

¹⁹Jesu in phal loin, "Na innah ciah inla, Topa in nang tungah bangzahtak bawla, nang bangzahtakin hong lainat cih thu na innkuanpihte kiangah gen in," a ci hi.

²⁰Tua ahi ciangin tuapa paikhia a, ama adingin Jesu in bangzahtak bawl cih thu Decapolis c[13] ah a gen hi. Mite khempeuh in lamdang a sa mahmah uh hi.

²¹Gunkuang tuangin tuipi gal khatah Jesu a galkah ciangin mihon tampite a kimah va kikhawm uh hi. Tuilipi gei-ah a om laitakin

²²synagogue ukte lakah Jairus min nei khat, tua lai-ah va pai hi. Jesu a muh ciangin a khephungah bok-a,

²³"Ka tanu si dekdek hi. Nong hehpihna-in cidama a nuntak nadingin hong pai inla, ama tungah na khut hong ngaksak in," ci-in a thum ngutngut hi.

²⁴Tua ciangin Jesu in amah a zui hi. Mihon tampi in ama nung zui uh a, a kimah a nehcih uh hi.

²⁵Tua laitakin kum sawm-le-nih sung siluang natna a thuak khat a om hi.

²⁶Siavuan tampi in a bawl sungin gim mahmah a, a neihsa khempeuh a bei khin hi. Ahi zongin noptuam tuan loin a nasia semsem zaw hi.

²⁷Amah in Jesu thu a zak ciangin mihonpite lakah Jesu nunglam panin zuana, a puantualpi a lawng hi.

²⁸Ahang in, tuanu in, "A puan lawngkha peuh leng ka dam ding hi," ci-in a ngaihsun hi.

²⁹Tua khit phetin a siluang kangpah a, a thuakna pan a suahtak lam a pumpi panin a kiphawk hi.

³⁰Jesu in ama tung panin vang paikhia cih a phawk pah hi. Mihonpi lakah amah kihei kawikawi a, "Ka puansilhte hong lawnsak kua hiam?" ci-in a dong hi.

³¹A nungzuite in, "Hong nehcih mihon pite mu napi in, ‘Kuan hong lawng hiam,’ ci-in bang dinga dong lai na hi hiam?" ci-in a dawng uh hi.

³²Ahi hangin Jesu in a lawng kua hiam cih thei nuamin a kimkot a enen hi.

³³Tua ciangin ama natna hanga ama tunga thupiang a thei tua numei lau-a ling kawmin va pai-a, Jesu khephungah bokin ahi bang teng a gen hi.

³⁴Amah in tuanu kiangah, "Ka tanu aw, na upna in nang hong damsak zo hi. Lungnuamin ciah inla, na thuakna pan suakta in," a ci hi.

³⁵Jesu a paupau laitakin synagogue ukpa Jairus inn panin mi pawl khat va pai uh hi. Amaute in, "Na tanu si ta hi. Siapa buaisak kul nawn ding hiam?" a ci uh hi.

³⁶Jesu in a mau thugente thudon loin Jew-te synagogue ukpa kiangah, "Lau kei in; um lel in," ci-in a gen hi.

³⁷Amah in Peter, James le James sanggampa John-te simloh adang kua mah a kizuisak kei hi.

³⁸Jew-te synagogue ukpa’ inn a tun uh ciangin mite nakpi-in kapa taamloin a buai ngeingai Jesu in a mu hi.

³⁹Amah inn sungah lutin amaute kiangah, "Bang hangin hih bangin taamlo-a buai ngeingai na hi uh hiam? Naupangno a si hi lo hi; a ihmu hi," a ci hi.

⁴⁰Ahi hangin amaute in amah a nuihsan uh hi. Amah in amaute a pusuahsak khit ciangin numeino omna ah numeino nu le a pa le a tonpih a nungzuite a lutpih hi.

⁴¹Tua numeino a khutin len a, "Talitha koum!" ("Numeino aw, nang tungah kong ci hi tho in,!" a cihnopna) a ci hi.

⁴²Tua khit phetin numeino (amah kum sawm-le-nih pha ta) thotoin a vak kawikawi hi. Amaute in hih thu lamdang a sa mahmah uh hi.

⁴³Amah in hih thu kuamah a theihsak loh nadingun amaute thukhauh pia-a, numeino nek dingin bang khatpeuh a piak dingun a sawl hi.