Read Zokam Mark 6 Bible Online

Mark 6 - Zokam bible

Mark 6

¹Tua mun nusia in Jesu le a nungzuite ama tenna khua ah a pai uh hi.

²Sabbath a tun ciangin synagogue sungah thuhilh kipana, ama thugen a za mi tampi in lamdang a sa uh hi. Amaute in, "Hih mipa in hih nate koi pana a ngah ahi hiam? Nalamdangte nangawn a bawl theih nadingin ama tunga kipia hih pilna bang ahi hiam?

³Khutsiampa hi lo ahi hiam? Mary tapa hi-a, James, Joseph a[14], Judas le Simon-te sanggampa hi lo ahi hiam? A saggam numeite ei tawh teng khawm uh hi lo ahi hiam?" a ci uh hi. Tua ciangin ama tungah amaute a lungkim kei uh hi.

⁴Jesu in amaute kiangah, "Kamsangpa ama khua sung, ama tanau-te lak le ama inn sung bekah a kipahtawi kei hi," a ci hi.

⁵Tua lai-ah amah in mi cina tawmkhatte tungah a khut nga-in a damsak lohngal nalamdang khat beek a bawl thei kei hi.

⁶Amah in amaute uplahna lamdang a sa hi. Tua ciangin Jesu, khua khat pan khua khatah thuhilhin a vak kawikawi hi.

⁷Sawm-le-nihte ama kiangah sama, kha gilote b[15] tungah thuneihna pia-in nihta nihta-in a sawlkhia hi.

⁸Amah in amaute a lamlahna hih bang ahi hi: "Na khualzinna ua na zat dingun ciangkhut longal an ahi zongin, thung-ip ahi zongin, kawnggak sungah sum ahi zongin bangmah pua kei un.

⁹Khedap bulh unla ahi hangin puantungsilh keng thuah kei un.

¹⁰Inn khatpeuh ah na lut uh ciangin tua khua na nusiat mateng uh tua inn ah tam suak un.

¹¹Note hong ngai lo, na thu uh a ngai nuam lo munte na nusiat uh ciangin amaute langa teci panna-in na khepek ua leivuite singkhia un," a ci hi.

¹²Amaute paikhia uh a, mite a kisik nadingin thu a hilh uh hi.

¹³Amaute in dawi tampi hawlkhia uh a, cina tampite sathau nilhin a damsak uh hi.

¹⁴Jesu min kithei khawk khin ta ahi manin Kumpi Herod in zong hih thu a za hi. Mi pawlkhatin, c[16] "Baptize-pa John misisa tho kika, tua hangin amah in nalamdang bawl theihna vangliatna nei ahi hi," a ci uh hi.

¹⁵Adangte in, "Amah Elijah hi," a ci uh hi. Pawlkhatte leuleu in, "Tang lai-a kamsangte banga kamsangpa khat ahi hi," a ci uh hi.

¹⁶Ahi hangin Herod in hih thu a zak ciangin, "A ngawng ka tanpa John misisa tho kik hi!" a ci hi.

¹⁷Ahang in, John mat dingin Herod mahmah in thu pia-in hensak-a thong sungah a khumsak hi. A nau pa Philip zi a suh nu Herodia hangin hih banga a hih ahi hi.

¹⁸John in Herod kiangah, "Na sanggampa zi na suh thukham tawh kituak het lo hi," a cici khin zo hi.

¹⁹Tua ahi ciangin Herodia in John hua-in a that nuam hi. Ahi hangin tuanu in amah a that thei kei hi.

²⁰Bang hang hiam cih leh John mi thumaan le misiangtho khat ahilam Herod in thei ahi manin amah kihta in a hu hi. Herod in John thu a zak ciangin amkham mahmah d[17] napi ama thugen a ngai nuam hi.

²¹A nunungna-ah a hun hoih khat a om hi. Herod in a suah ni-in ama uliante le galkapmangte le Galilee makaite an a vak hi.

²²Herodia’ tanu sungtumin lama, tuanu in Herod le a nitak-an nekpih lenglate a lungkimsak hi. Kumpipa in numeino kiangah, "Na deih peuhpeuh hong ngen in, kong pia ding hi," a ci hi.

²³Amah kiciama, "Ka kumpi gam phel khat dong nong nget peuhpeuh kong pia ding hi," ci-in a kamciam hi.

²⁴Tuanu paikhia-in a nu kiangah, "Bang ngen ding ka hi hiam?" a ci hi. Amah in, "Baptize-pa John’ lutang," ci-in a dawng hi.

²⁵Kumpipa kiangah numeino manlangin paipah a, "Tu mahmah in kuangdai-in Baptize-pa John lutang nong piak ding ka deih hi," ci-in a ngen hi.

²⁶Kumpipa lungdong lua mahmah a, ahi hangin ama kamciamsa le a nitak-an nekpih a lenglate hangin tuanu a nial nuam kei hi.

²⁷Tua ciangin amah in John lutang a paipih nading thupiakna tawh mithatpa khat a sawlpah hi. Tua mipa pai-in thong sunga om John ngawng tana,

²⁸ama lutang kuangdai-in a puak kik hi. Amah in numeino pia-a tuanu in a nu a pia hi.

²⁹John nungzuite in hih thu a zak uh ciangin pai uh a, a luang la-in han sung khatah a sial uh hi.

³⁰Jesu kimkotah sawltakpite va kikhawm uh a, amau hihsa le a hilhsate uh a ko uh hi.

³¹Tua ciangin mipite a ciah le a kuan a tam luat manin an nek hun ding nangawn nei lo uh a, amaute kiangah, "Gamdaihna mun khatah no kia bek in hong zui unla, tawlnga un," a ci hi.

³²Tua ciangin amau guak gamtawng khatah gunkuang khatin a pai uh hi.

³³Ahi hangin amaute paikhiat a mute in thei uh a, khua khempeuh panin khe-in tai uh a, amaute tun ma-in a na tung uh hi.

³⁴Jesu lei-ah a tun ciangin mihonpi tampi a mu hi. Amah in amaute khuatuah hi, bang hang hiam cih leh amaute a cingpa om lo tuuhon tawh kibang uh hi. Tua ciangin amaute thu tampi a hilh hi.

³⁵Tua hunlaitak nitak lam ahi hi. Tua ciangin a nungzuite a kiangah va pai uh a amaute in, "Hih tak gamtawng hi-a khuanung lua mahmah ta hi.

³⁶Hih kima khuata khuaneute ah pai-in a nek ding uh an a lei theih nadingun mipite ciahsak ta in," a ci uh hi.

³⁷Ahi hangin amah in, "Note in a nek ding uh khatpeuh pia un," a ci hi. Amaute in ama kiangah, "Tuabang hileh pasal khat, kha giat thaman a[18] tak bei ding hi! Kote pai-in tua zah tawh an va lei-in amaute nek ding, pia ding ka hi uh hiam?" a ci uh hi.

³⁸Amah in, "Anlum bangzah na nei uh hiam? Pai-in va en dih un,"a ci hi. Amaute in a et khit uh ciangin, "Lum nga le ngasa nih om hi," a ci uh hi.

³⁹Tua ciangin Jesu in mipite lopa hing tungah a pawlpawlin a tusak hi.

⁴⁰Tua ahi ciangin amaute a zaza, a sawm nganga-in a tu ciptep uh hi.

⁴¹Tua anlum nga le ngasate gel la-a, vantung lam ento-in lungdam a koh khit ciangin anlumte a balkham hi. Tua ciangin mipite a lui dingun a nungzuite a pia hi. Amaute khempeuh lakah ngasate gel zong a hawm hi.

⁴²Amaute in ne uh a, a kham pikpek uh hi.

⁴³Nungzuite in anlum le ngasa athem aneng bawmta sawm-le- nih a tawm uh hi.

⁴⁴Tua an nete pasal cingteng tul nga a pha hi.

⁴⁵Tua khit phetin Jesu in nungzuite gunkuang sungah tuangsaka, ama mai Bethsaida ah paisakin mihonpite a ciahsak hi.

⁴⁶Amaute paisan-a, amah thungen dingin mual tungah a pai hi.

⁴⁷Nitak ciangin tuilipi laizangah gun kuang om a, amah ahileh lei lakah a om hi.

⁴⁸Huih in gunkuang lehmut ahi manin nungzuite in gunkuang nakpi-a a hot uh a mu hi. Zan vil lina pawlin amaute lam zuanin tuilipi tungah Jesu a pai hi. Amaute kheng dektak a,

⁴⁹ahi hangin amah tuilipi tunga pai a muh uh ciangin sikha sa in a kikokhia uh hi.

⁵⁰Bang hang hiam cih leh a vekun amah mu uh a, a lau mahmah uh hi. Jesu in amaute kiangah, "Lau kei un! Keimah ka hi hi. Hong kihta kei un," a cipah hi.

⁵¹Tua ciangin amaute tawh gunkuang tungah kahto a, huih nung a dai kiuhkeuh hi.

⁵²Amaute in anlum ngate thu theitel lo uh ahi manin lamdang lua mahmah a sa uh hi, amaute lungtang kikhauhsak hi.

⁵³Amaute galkah uh a, Gennesaret a tun uh ciangin tua lai-ah a gunkuang uh a khih uh hi.

⁵⁴Gunkuang pan a pusuah phetun, mipite in Jesu mel a theitel uh hi.

⁵⁵Mipite tua kual khempeuhah tai kawi kawi uh a, cinate phek tawh zawngin, amah om hi ci-a a zakna peuhpeuhuah a paipih uh hi.

⁵⁶Khuapite khuaneute le gamsung khuate ahi zongin ama paina peuhpeuhah cinate paipih uh a, sum zuakna munte ah a na koih uh hi. Ama puantualpi mongtep ciang beek a lawnsak theih nadingin thum uh a, amah a lawngte khempeuh a dam uh hi.