Read Zokam Mark 7 Bible Online

Mark 7 - Zokam bible

Mark 7

¹Jerusalem panin Pharisee-te le thukham siate pawlkhat Jesu kiangah va kikhawm uh a,

²a nungzuite pawlkhat in ngeina banga "siang lo"—tua pen biakna ngeina a silsiang loh khut tawh an a nek laitak uh a mu uh hi.

³(Pharisee-te le Jew-te khempeuh in upate tang ngeinate a kipletna un a ngeina bangin khut sil masa loin an a ne kei uh hi.

⁴Sum zuakna mun pan a ciah uh ciangin kisil masa loin an a ne kei uh hi. Tua ciangin haite, tuivotbeelte le niangbeelte sawpsiangna-a kipan tang ngeina adang tampi a tang uh hi. b[19])

⁵Tua ahi ciangin Pharisee-te le thukham siate in, "Bang hangin na nungzuite in khut sianglo tawh an a nek uh sangin upate tang ngeina bangin gamta zaw lo uh ahi hiam?" ci-in Jesu a dong uh hi.

⁶Amah in, "No kineihsiamte tawh kisai-a Isaiah in a genkholh hih banga kigelhsa: "‘Hih mite in a muk uh tawh kei hong pahtawi uh a, ahi hangin a lungtang uh kei tawh kigamla hi.

⁷A mawkna in kei hong bia uh a, a thuhilhte uh mihing bawltawm ngeina ahi hi,’ c[20] a cih man mahmah hi.

⁸"Note in Pasian thupiakte na paikhia uh a, mihingte tang ngeinate na len tentan uh hi," ci-in a dawng hi.

⁹Tua ciangin amah in amaute kiangah, "Na tang ngeinate uh na tan d[21] theih nadingun Pasian thupiakte nawlkhin dan na siam uh hi!

¹⁰Moses in, ‘Na nu na pa pahtawi in. e[22] A nu a pa a hamsiat mi peuhmah thah ding ahi hi,’ f[23] ci hi.

¹¹Ahi hangin note in, mi khatpeuh in a nu a pa-te khatpeuh kiangah, ‘Kei tung pana na ngah ding uh huhnate Corban (Pasian a ki-apsa letsong) hi ta hi,’ na ci uh a,

¹²tua ciangin a nute a pate ading bangmah na hihsak nawn kei uh hi.

¹³Tua bangin note na kipiaksawn uh na tang ngeinate uh zangin Pasian thu bangmah lo na suaksak uh hi. Tua banah tua bangin na tampi na hih uh hi," a ci hi.

¹⁴Jesu in mihonpite sam leuleu a, "Na vekpi un ngai unla hih thu theitel un.

¹⁵A pualam pana mihing sunga tumsuk, bangmah in amah a ‘nin’ suaksak thei lo hi. Mihing sung pana pusuakte in amah a ‘nin’ g[24] suaksak zaw hi.

¹⁶Zak nading bil nei peuh in za ta hen," h[25] a ci hi.

¹⁷Mihonpite nusia in inn sungah a lut ciangin a nungzuite in hih gentehna thu ama kiangah a dong uh hi.

¹⁸Amah in, "Tua zahin lungmawl zawzen na hi uh hiam? Pua lam panin mihing sunga tumsuk khatpeuh in amah a ‘nin’ suaksak thei lo ahilam thei lo na hi uh hiam?

¹⁹Ahang in, a lungtang sungah tumsuk loin gilpi sungah tumsuk a, tua ciangin pumpi pualamah a pusuak khia hi," a ci hi. (Jesu in hih banga a gen ciangin ante khempeuh ‘siang’ hi ci-a a pulakkhia ahi hi.)

²⁰A thugen zom lai-a: "Mihing sung pana pusuak in amah a ‘nin’ suaksak hi.

²¹Ahang in, a sunglam mihing lungtang panin ngaihsutna khel, numei pasal paktatna, guktakna, tualthahna, angkawmna,

²²huaihamna, etsatna, zuau tatna, thangtatna, enna, gensiatna, kiphatsakna le hainate a pusuakkhia hi.

²³Hih gitlohnate khempeuh a sung lam pana pusuakkhia hi-a, mihing a ‘nin’ suaksak hi," a ci hi.

²⁴Jesu in tua mun nusia a, Tyre a[26] kimnai-ah a pai hi. Amah inn khatah luta, ama omsim lam kuama theih ding deih lo napi a ki-im zo kei hi.

²⁵A taktakin, a tanu sunga kha gilo b[27] a lut nupi khat in ama thu a zak khit phetin va pai-a, a khe phungah a bok hi.

²⁶Tuanu, Syria gam Phoenicia a suak Greek mi ahi hi. Tuanu in a tanu sunga dawi a hawlkhiatsak nadingin Jesu kiangah a thum hi.

²⁷Amah in tuanu kiangah. "Tate an nek kim lai laksakin uite piak ding kilawm lo ahi manin, tate in a duh zahzah uh ne masa phot uh hen," a ci hi.

²⁸Tuanu in, "Himah hi, Topa aw, ahi hangin sabuai nuai-a uite in zong naupangte annengte a ne uh hi," a ci hi.

²⁹Tua ciangin amah in tuanu kiangah, "Tuaci banga nong dawn manin na ciah thei hi; dawi in na tanu a nusia zo hi," a ci hi.

³⁰Tuanu ciaha, a sung pana dawi a paikhia khin, lupna tunga lum a tanuno a mu hi.

³¹Tua ciangin Jesu in Tyre kimnai teng nusia-a, Sidon kantanin Galilee tuipi ah pai-a tua ciangin Decapolis c[28] kualah a paisuk hi.

³²Tua lai-ah mi pawlkhat in bilngong-a pau-awk pasal khat va paipih uh a, tuapa tungah a khut a ngak nadingin ama kiangah a thum hi.

³³Jesu in tuapa mihonpite lak panin a tang paikhiatpih khit ciangin a khutmete tuapa bil sungah a khum suk hi. Tua ciangin a cil phih a tuapa leii a lawng hi.

³⁴Vantung lam ento a nakpi-in khuisa-a tuapa kiangah, "Ephatha!" ("Kihong ta hen!" cihna) a ci hi.

³⁵Tua laitakin tua mipa bilte kihonga, a leiigui kikolin siangtakin a pau thei sensen hi.

³⁶Kuama tungah a gen loh nadingun Jesu in amaute thu a pia hi. Ahi hangin tua banga thu a piak semsem ciangin amaute in tua thu a gen semsem uh hi.

³⁷Mipite in lamdang sa lua mahmah uh a, "Amah in na khempeuh a hoihin bawl khin zo hi. Amah in bilngongte khua zasakin, a pau thei lote nangawn a pausak hi," a ci uh hi.