Read Zokam Mark 8 Bible Online

Mark 8 - Zokam bible

Mark 8

¹Tua hun laitakin mihonpi dang khat va kikhawm uh hi. Amaute in nek ding bangmah nei lo uh ahi ciangin Jesu in a nungzuite sama,

²"Hih mite ka khuatuah hi. Kei kianga hong om zawh uh ni thum tak pha khin ta-a, a nek ding uh bangmah a nei kei uh hi.

³Gil kialpi in innah ciahsak leng pawlkhatte gamlapi pana hong pai uh ahi manin lamkalah phuk-hong vei-in puk ding uh hi," a ci hi.

⁴A nungzuite in, "Ahi ta zongin gamsung hi bangah mihon hizah ta vak nading an koi pan kingah thei ding ahi hiam?" ci-in a dawng uh hi.

⁵Jesu in, "Anlum bangzah na nei uh hiam?" ci-in a dot ciangin, "Sagih," ci-in a dawng uh hi.

⁶Amah in mihonpite leitual ah a tusak hi. Tua anlum sagihte la-a, lungdam a koh khit ciangin balkhama mipite a lui dingun a nungzuite pia-a, amaute in mipite a lui uh hi.

⁷Amaute in ngasa neu tawmkha zong a nei uh hi; amah in tuate hangin zong lungdam a koh khit ciangin a hawmkhia dingin nungzuite a sawl hi.

⁸Mipite in ne uh a, a kham pikpek uh hi. An khamval teng nungzuite in a neng a themin a top uh leh bawm sagih dimtak a pha hi.

⁹Tua lai-ah pasal tulli bang a om hi. Jesu in amaute a ciahkhiatsak khit ciangin

¹⁰a nungzuite tawh gunkuangah tuangin Dalmanutha kual lam a zuan hi.

¹¹Pharisee-te va pai-in Jesu kiangah thu a dong uh hi. Amah a zia-etna un, amaute in vantung panin lim khat a ngen uh hi.

¹²Amah nakpi in khuisa-a, "Bang hangin hih khang mite in lim lamdang ngen uh ahi hiam? Thutak kong geninah, amaute tungah lim bangmah a kilak kei ding hi," a ci hi.

¹³Tua ciangin Jesu in amaute nusia in gunkuangah tuang kika, a galkhat lamah a galkah hi.

¹⁴Nungzuite in gunkuang sunga a neihsa uh anlum khat longal an puak ding a mangngilh uh hi.

¹⁵Jesu in amaute kiangah, "Pilvang un, Pharisee-te le Herod silngo panin na kidawm un," ci-in a vauhilh hi.

¹⁶"An i neih loh hang hi," ci-in amaute khat le khat a kikum uh hi.

¹⁷Jesu in amaute kikupna a theih ciangin, "Bang hangin note, na an neih loh uh kikum tazen na hi uh hiam? Tu dongin mu nai lo, theitel nailo lailai na hi uh hiam? Na lungtang uh kikhauhsak lai ahi hiam?

¹⁸Mit nei napi in mu lo a, bil nei napi in za lo na hi uh hiam? Hih thu phawk lo lailai na hi uh hiam?

¹⁹Mi tulnga adingin anlum nga ka balkhap lai-in athem aneng na topte uh bawm dim bangzah pha ahi hiam, na phawk lai uh hiam?" a ci hi. "Sawm-le-nih," ci-in a dawng uh hi.

²⁰"Mi tulli ading anlum sagih ka balkhap lai-in athem aneng na topte uh, bawm dim bangzah pha ahi hiam?" ci-in a dot ciangin, amaute in, "Sagih," ci-in a dawng uh hi.

²¹Jesu in amaute kiangah, "Theitel nai lo na hi uh hiam?" a ci hi.

²²Amaute Bethsaida a tun uh ciangin mi pawlkhat in mittaw khat va paipih uh a, Jesu in a lawn nadingin a thum uh hi.

²³Amah in mittawpa a khutin kai-a, khuanawl ah a paikhiatpih hi. Jesu in tuapa mitte a cil phih-a a tungah a khutte a ngak khit ciangin, "Na khatpeuh na mu thei hiam?" ci-in a dong hi.

²⁴Amah khuadak a, "Mite ka mu hi; amaute singkung lampai bang uh hi," a ci hi.

²⁵Jesu in a khutte tuapa mitte ah a nga kik hi. Tua ciangin a mit kihongin khua mu thei-in na khempeuh siang sinsenin a mu hi.

²⁶Jesu in, "Khua sungah lut kei in," a[29] ci-in amah a ciahsak hi.

²⁷Jesu le a nungzuite, Caesarea le Philipi kima khuaneute a tun dong uh a pai uh hi. Lam a pai laitakun amaute kiangah, "Mite in kei kua hi, hong ci uh hiam?" ci-in a dong hi.

²⁸Amaute in, "Kimkhat in Baptize-pa John hi; adangte in Elijah hi; pawlkhatte leuleu in kamsangte lakah khat hi, hong ci uh hi," ci-in a dawng uh hi.

²⁹"No e leh, kei kua hi nong ci uh hiam?" ci-in a dong kik hi. Peter in, "Nang tua Christ na hi hi," b[30] ci-in a dawng hi.

³⁰Jesu in ama thu kuamah a hilh loh nadingun amaute a vauhilh hi.

³¹Tua ciangin Mihing Tapa in tampi thuak pelmawh dinga, upate, siampi makaite le thukham siate in amah nolh ding uh a, pel loin amah kithatin ni thum khit ciangin a tho kik ding hi, cih thu amaute hilh a kipan hi.

³²Amah in hih thu teltakin gena, tua ciangin Peter in amah tang paikhiatpih in a tai hi.

³³Ahi hangin Jesu kihei-a, a nungzuite enin Peter tai a, "Satan aw, ka nungah kihem in! Pasian thute ngaihsun loin mihing thute na ngaihsun hi," a ci hi.

³⁴Tua ciangin a nungzuite le mihonpite ama kiangah sama, "Mi khatpeuh in ka nung hong zuih nop leh pel loin amah le mah kinialin, ama singlamteh kisuanin hong zui ding hi.

³⁵Ahang in, a nuntakna c[31] a honkhia nuam peuh in taan dinga, ahi hangin kei hang le lungdamna-thu hangin ama nuntakna a taan peuhmah in a nuntakna a honkhia ding hi.

³⁶Mi khatin leitung buppi a neih hangin a hinna taan leh bang phatuam ding ahi hiam?

³⁷Ahi kei leh mi khatin ama hinna bang tawh khek thei ding ahi hiam?

³⁸Hih angkawm le mawhdim khang mite hunah keimah le ka thu a zumpihte, Mihing Tapa in a Pa minthanna-in ama vansawltak siang thote tawh hong pai ciangin amaute a zumpih ding hi," a ci hi.