Read Zokam Mark 9 Bible Online

Mark 9 - Zokam bible

Mark 9

¹Tua ciangin amah in amaute kiangah, "Thutak kong geninah, vangliatna tawh Pasian gam hong tung, hih lai-a ding mi kimkhat in a muh matengun sihna a ciam kei ding uh hi," a ci hi.

²Niguk khit ciangin Jesu in Peter, James le John tonpih in mualsang tungah kahpih to a, tua lai-ah amauteng bek a om uh hi. Tua lai-ah amauteng bek mitmuhin a mel a kikhel hi.

³Ama puansilhte leitunga, a kipaksak thei penpen sangin pak zaw-a a leng daldal hi.

⁴Tua laitakin amaute mai-ah Elijah le Moses kilanga, Jesu tawh a kiho uh hi.

⁵Peter in Jesu kiangah, "Rabbi, hih lai-a i om nuam mahmah hi. Nang ading khat, Moses ading khat, Elijah ading khat, buk thum lam ni," a ci hi.

⁶(Amah in a gen ding thei lo hi, amaute a lau mahmah uh hi.)

⁷Tua ciangin meii lompi khat kai-in amaute tuama, tua meii lak panin aw khat in, "Hih in, ka it ka Tapa ahi hi. Ama thu na ngai un," a ci hi.

⁸Tua khit phetin a kimkot uh a et uh leh Jesu longal kuamah dang a mu nawn kei uh hi.

⁹Amaute mualtung pan a kumsuk kawmkawmun Mihing Tapa misi pan a thawh kik mateng a muhte uh kuama kiangah a gen loh nadingun Jesu in amaute thu a pia hi.

¹⁰Amaute in hih thu amauteng theih in koih uh a "misi pan tho kik" cih bang cihnopna hiam cih a kikum uh hi.

¹¹Tua ciangin amaute in, "Bang hangin thukham siate in, Elijah hong pai masa pelmawh ding hi, ci-in gen uh ahi hiam?" ci-in amah a dong uh hi.

¹²Jesu in, "A taktakin Elijah hong pai masa takpi mah a na khempeuh bawlpha mah hi. Tua ahileh Mihing Tapa in nak thuak mahmah dinga a kinolh ding hi, cih thu bang hangin kigelh ahi hiam?

¹³Ahi hangin ken kong cihinah, Elijah hong pai khin zo a, ama thu a kigelhsa bangin amau ut bangin ama tungah bawl khin zo uh hi," ci-in a dawng hi.

¹⁴Nungzui dangte kiangah amaute a tun uh ciangin amaute kimah mihon tampi na oma, thukham siate tawh thu a kinialnial uh a mu uh hi.

¹⁵Tua lai-a om mite khempeuh in Jesu a muh phetun lamdang sa lua uh a, amah dawntuah dingin a tai uh hi.

¹⁶Amah in, "Amaute tawh bang thu kinialnial na hi uh hiam?" ci-in a dong hi.

¹⁷Mihonpite lakah khat in, "Sia aw, ka tapa sungah kha khat lutin pausak thei lo-a na kiangah kong paipih hi.

¹⁸A dawi in a mat peuhpeuh ciangin leilak a denna hi. A kam panin cilphuan bua-a, a ha gawi-in gawcip hi. Na nungzuite kiangah tua kha a hawlkhiat nadingun ka nget hangin a hawlkhia thei kei uh hi," ci-in a dawng hi.

¹⁹Jesu in, "Thu um lo khangmite aw, no tawh bang tan om khawm lai ding ka hi hiam? Bang tanvei hong thuak zo ding ka hi hiam? Tua pasalno ka kiangah hong paipih un," a ci hi.

²⁰Tua ciangin amaute in amah a paipih uh hi. Tua kha in Jesu a muh phetin tua naupang a kisatgawpsak hi. Amah lei lakah pukin kipum khuka, a cilphuan a bua hi.

²¹Jesu in, "A hicih zawh bang tanvei sawt khin hiam?" ci-in tua pasalno’ pa a dong hi. Amah in, "A neu tunga kipan ahi hi.

²²Tua kha in amah that nuamin mei sung khawng, tui sung khawng ah sawnpai zel hi. Ahi zongin nang na hih theih leh hong hehpih inla, hong huh in," a ci hi.

²³Jesu in, "‘Na hih theih leh e’? A um mi adingin na khempeuh hi thei hi," a ci hi.

²⁴Tua pasalno’ pa in zong, "Ka um hi; ka uplahna ka zawh nadingin hong huh in!" a cikhia pah hi.

²⁵Tua munah mihonpite hong tai uh Jesu in a muh ciangin tua kha gilo a[32] a tai hi. Amah in, "Nang a bilngong, a pauthei lo kha aw, ama sung pan paikhia inla, lut kik nawn peuhmah kei in, ci-in thu kong pia hi," a ci hi.

²⁶Tua kha ku zelzal a, tua pasalno kisatsak vanvanin tua khit ciangin a paikhia hi. Tua pasalno misisa tawh kibang lua ahi manin mi tampi in, "Si ta ei!" a ci uh hi.

²⁷Ahi hangin Jesu in tuapa khut lenin a phottoh leh amah a ding to hi.

²⁸Inn sungah Jesu a tum khit ciangin a nungzuite in, "Bang hangin kote in hawlkhia thei lo ka hi uh hiam?" ci-in a dong sim uh hi.

²⁹Amah in, "Hih bangte pawl, thungetna b[33] bek tawh paikhia thei hi," ci-in a dawng hi.

³⁰Amaute in tua mun nusia in Galilee a kantan uh hi. Jesu in amau omna kuama theih ding a deih kei hi.

³¹Bang hang hiam cih leh amah in, "Mihing Tapa, mite khut sungah kilehhek ding hi. Amaute in amah that ding uh a, ni thum khit ciangin amah tho ding hi," ci-in a nungzuite a hilh hi.

³²Ahi hangin amaute in ama cihnopna theitel lo uh a, tua thu tawh kisai lah a dong ngam kei uh hi.

³³Amaute Capernaum a tung uh hi. Inn sungah a om laitakun, "Lampi-a na kisel uh bang ahi hiam?" ci-in amaute a dong hi.

³⁴Ahi hangin lampi-a a kisel uh kua lianpen hiam, cih thu tawh kisai ahi manin a dai uh hi.

³⁵Jesu tusuk in Sawm-le-nihte sam a, "Mi khatpeuh a masakpen nop leh a nunung penpen le adang teng’ nasem ahi pelmawh kul hi," a ci hi.

³⁶Amah in naupangno khat kai-a amaute lakah a dingsak hi. Amah in tua naupangno tawi-in amaute kiangah,

³⁷"Keima min hangin hih bang naupangno khat a sang peuhmah kei hong sang ahi hi. Kei hong sang peuhmah, keimah hong sang hi loin kei hong sawlpa a sang ahi hi," a ci hi.

³⁸John in, "Sia aw, mi khatin nang minin dawite a hawlkhiat ka mu uh a, ei mi hi lo ahi manin a hih nawn loh nadingin ka kho uh hi," a ci hi.

³⁹Jesu in, "Tuapa kho kei un, kuamah in keima minin nalamdang a bawl khit phetin kei hong siatgen pah thei lo ding hi.

⁴⁰Ahang in, ei hong langpang lo peuh ei aa ahi hi.

⁴¹Thutak kong geninah, Christ pawl na hi manun kei min hanga tuisik hai khat hong suah peuhpeuh pahtakman ngah loin a om peuhmah kei ding hi.

⁴²Kei hong um hih naupang no khatpeuh mawhna a bawlsak a om leh a ngawngah angawina suang lianpi khihin tuipi sungah kipai leh ama adingin hoihzaw ding hi.

⁴³Na khut in mawhna hong bawlsak leh sattan in.

⁴⁴Khut kimin, amaute than a sihlohna, mei a mit lohna mun meilipi khukah hong kikhul sangin khut buisa-in nuntakna ah lut lecin nang adingin a hoihzaw hi. c[34]

⁴⁵Na khe in mawhna hong bawlsak leh sattan in

⁴⁶Khe kimin, amaute than a sihlohna mei a mit lohna mun d[35] meilipi khukah hong kipaih sangin khe buisa-in nuntakna ah lut lecin nang ading a hoihzaw hi.

⁴⁷Na mittang hangin mawhna na bawl leh khelkhia in. Mittang kimin meilipi khukah hong kipaih sangin mit langkhat bek tawh Pasian gamah lut lecin nang adingin a hoihzaw hi.

⁴⁸Tua meilipi khukah " ‘amaute than nangawn si lo-a, mei zong a mit ngei kei hi,’ e[36]

⁴⁹Mi khempeuh cisawh bangin mei tawh kisawh ding hi.

⁵⁰"Ci a lim hangin a alna mang leh bangci alkiksak thei ding na hi hiam? Note zong ci alin al unla, khat le khat na kilem un," a ci hi.