Read Zokam Luke 1 Bible Online

Luke 1 - Zokam bible

Luke 1

¹Eite laka a tangtungsa a[1] nate thu mi tampi in na gelh khin zo uh hi.

²A tunga kipan mit-a a mute le thu’ nasemte in eite kianga hong hilhsawm bang tektek uh ahi hi.

³Tua ahi manin zahtakpipen Theophilus aw, kei mahmah in zong tuate khempeuh atunga kipan limtaka ka kantel sinsen khit ciangin a thu kizom diudeu-in nang adinga kong gelh ding pha ka sa hi.

⁴Tua pen nang hong kihilhte a taktak a hina na theih nading ahi hi.

⁵Judea gamah Herod kumpi ahi laitakin Abijah uk siampi pawl lakah Zechariah min nei siampi khat a om hi. Ama zi Elizabeth zong Aaron suan ahi hi.

⁶Amau nupa Pasian muhna-ah mi thutang hi uh a, Topa thupiakte le zuih ding ngeinate khempeuh kawkbaanna om loin a zui uh hi.

⁷Ahi hangin Elizabeth tasel ahi manin ta a nei kei uh hi; a nih un zong a kum uh tam lua ta hi.

⁸Khatvei Zechariah uk pawl in na a sep hun, amah in Pasian mai-ah siampi na a sep sungin,

⁹siampi ngeina tawh kizui-in Topa biakinnpi sungah pai-a gimnamtui hal ding ai a san uh leh amah in a ngah hi.

¹⁰Gimnamtui hal hun a tun ciangin Pasian bia-a kikhawmte khempeuh in a pualam ah thu a ngen uh hi.

¹¹Tua laitakin Topa vansawltak khat ama kiangah kilanga, gimnam-tui halna biakna-tau taklam pangah a ding hi.

¹²Zechariah in amah a muh ciangin kigaih a lau-in a koncip hi.

¹³Ahi hangin vansawltakin a kiangah, "Zechariah aw, lau kei in na thungetna hong kiza zo hi. Na zi Elizabeth in tapa khat nei dinga, a min John na phuak ding hi.

¹⁴Amah na lungnopna, na lungkimna hi dinga, ama suahna hangin mi tampi a kipak ding hi.

¹⁵Ahang in, Topa muhna ah amah alian ding hi. Amah in leng gahzu ahi zongin a kibilh zu nam tuamtaumte ahi zongin dawn lo dinga, a suah b[2] a kipan Khasiangtho tawh kidim ding hi.

¹⁶Israel mite tampitak, Topa amau Pasian kiang a tunpih kik ding hi.

¹⁷Tua hi-a amah in pate lungtang tate lamah kiheisak dinga, thumang lote, thumaan pilna lamah kiheisak ding, Topa adingin mite a baihsa-a, a koihkhol dingin Elijah kha le vangliatna tawh Topa mai-ah a pai ding hi," a ci hi.

¹⁸Zechariah in tua vansawltak kiangah, "Kei lah tek ta inga, ka zi lah kum tam lua ta hi. Hih thu bangci muan ngam ding ka hi hiam?" ci-in a dong hi.

¹⁹Tua vansawltak in, Gabriel ka hi hi. Pasian kianga ding ka hi-a hih lungdamna thu nang tunga gen ding le nang hong hopih dingin kei hong kisawl hi.

²⁰A hun a cin cianga a tung takpi ding ka thugente um lo na hi manin hih thu a tun mateng pau thei loin na daicip ding hi," ci-in a dawng hi.

²¹Tua kikal sungin mipite in Zechariah na ngak uh a, biakinnpi sungah tua tanvei a om lamdang a sa uh hi.

²²A paikhiat ciangin amaute a hopih thei kei hi. Amah pau thei lo a, amaute lim bek tawh a khutin a hopih ciangin biakinnpi sungah amah mangmu ahilam a theikhia pan uh hi.

²³A nasep hun sung a cin khit ciangin innah a ciah hi.

²⁴Hih thu teng khit ciangin a zi Elizabeth gai-a kha nga sung a tang om hi.

²⁵Amah in, "Topa in kei adingin hih hong hihsak ahi hi. Ka mite lakah tu hun laitaka ka maimawlna hong lakkhiat sakin kei hong angvan hi," a ci hi.

²⁶A kha gukna ciangin, Pasian in Galilee gam khuapi khat ahi Nazareth ah,

²⁷David suan, Joseph min nei pasal khat tawh kiteng dinga a kidongsa nungak bit khat kiangah vansawltak Gabriel a sawl hi. Nungak bit min Mary ahi hi.

²⁸Ama kiangah vansawltak pai-in, "Nang hong ki-angvan mahmah nu aw kong hopih hi! Topa in nang hong ompih hi," a ci hi.

²⁹Ama thugente hangin Mary lungmang mahmah a, bangci bang hopihna hiam, ci-in lamdang a sa hi.

³⁰Ahi hangin vansawltak in ama kiangah, "Mary aw, lau kei in Pasian in nang hong angvan zo hi.

³¹Nau na paii dinga tapa khat na nei ding hi; a min Jesu na phuak ding hi.

³²Amah lian dinga Sang Penpa Tapa kici ding hi. Topa Pasian in a pa David tokhom pia dinga,

³³amah in Jacob suante uk denin ama gam a bei ngei kei ding hi," a ci hi.

³⁴Mary in vansawltak kiangah, "Kei nungak bit ka hi hi, hih thu bangci pian theih ding ahi hiam?" ci-in a dong hi.

³⁵Vansawltak in, "Nang tungah Khasiangtho hong tung dinga Sang Penpa vang in nang hong sung ding hi. Tua ahi ciangin a suak ding misiangthopa, Pasian Tapa kici a[3] ding hi.

³⁶Na tanaunu Elizabeth nangawn in a tek nungin ta khat nei dekta hi. Amah tasel a kici nangawn a gai kha guk pha zo hi.

³⁷Ahang in, Pasian in hih theih loh a nei kei hi," ci-in a dawng hi.

³⁸Mary in, "Kei, Topa nasemnu ka hi hi. Na cih bangin kei tungah piang ta hen," a ci kik hi. Tua khit ciangin vansawltak in amah a nusia hi.

³⁹Tua hunin Mary kithawi-a Judah gam sung mualtung khuapi khat zuanin pai mengmeng a,

⁴⁰Zechariah innah lutin Elizabeth a hopih hi.

⁴¹Mary hopihna Elizabeth in a zak ciangin ama sunga naungeek dianga Elizabeth Khasiangtho tawh a kidim hi.

⁴²Amah in: "Numeite lakah thupha ngah nu na hi-a, nang sung pana suakkhia ding naungek, thupha ngah ahi hi!

⁴³Ahi zongin bang hanga ka Topa nu kei kianga hawh ding zah dongin kei hong ki-angvan ahi hiam?

⁴⁴Nong hopihna ka zak phetin ka sunga naungeek lungdamin a diang hi.

⁴⁵Topa in ama tunga a gensate a tung takpi ding hi, ci-a a um numei in thupha ngah ahi hi," ci-in ngaihtakin a awngkhia hi.

⁴⁶Tua ciangin Mary in: "Ka hinna in Topa phat a

⁴⁷ka Honpa Pasian ah ka kha a kipak hi.

⁴⁸ahang in a nasemnu tualniamna hong thudon hi. Tu-a kipan khang sawnsawnte’n thupha ngah nu hong ci ding hi;

⁴⁹ahang in, Thahat Pa in kei ading na lianpipi bawl zo a - ama min siangtho hi.

⁵⁰Amah a kihtate tungah akhang akhangin ama lainatna zaam suksuk hi.

⁵¹Amah in a khut tawh a thahatna lak hi; a lungsim tawnga kisatheite a thehthang zo hi.

⁵²Gam-ukte amau tokhom panin khiasuk a, ahi hangin a tualniamte lamto khin zo hi.

⁵³A gilkialte na hoihin taisak a, ahi hangin a haute a hawm ciahsak zo hi.

⁵⁴Amah in ama nasem Israel huh a,

⁵⁵i pu i pate tungah a gensa bangin Abraham le a suan a khakte hehpih denden ding, a phawk gige hi," a ci hi.

⁵⁶Elizabeth kiangah Mary kha thum bang a tam khit ciangin innah a ciah hi.

⁵⁷Elizabeth suah hun tunga tapa khat a nei hi.

⁵⁸Topa in ama tungah lainatna lianpi a lah lam a vengte le a tanaute in za-in a lungdampih uh hi.

⁵⁹A nigiatna ni-in tua naupang vun-at dingin amaute khempeuh va pai uh a, a min, a pa Zechariah tamsak dingin a kisa uh hi.

⁶⁰Ahi hangin a nu in, "Hi kei! John phuah ding ahi hi," ci-in a genkhia hi.

⁶¹Amaute in ama kiangah, "Na tanaute lakah tua min nei om lo hi," a ci uh hi.

⁶²Tua ciangin a pa in naupang min ding bang phuak nuam hiam, cih amaute in khut tawh lim lakin a dong uh hi.

⁶³Amah in suangpek khat ngen in, "Ama min John ahi hi," ci-a a gelh ciangin tua muna omte khempeuh in lamdang a sa uh hi.

⁶⁴Tua khit phetin a kam kihonga, a leigui kolin paukhia-a Pasian a phat hi.

⁶⁵A vengte khempeuh in piandang a sa mahmah uh hi. Judea gam mualtung tenga mite in zong hih thute khempeuh a gengen uh hi.

⁶⁶Hih thu a za peuhpeuh in lamdang sa uh a, "Tua ahileh hih naupang bangci mi hong hi tam?" ci-in a kidong ciat uh hi. Ahang in, Topa khutin amah a ompih gige hi.

⁶⁷A pa Zechariah, Khasiangtho tawh kidim a thu genin:

⁶⁸"Topa, Israel-te Pasian kiphat ta hen, bang hang hiam cih leh amah hong pai-in ama mite tankhia zo hi.

⁶⁹Ama nasem David suan sung panin eite ading, hotkhiatna ki a[4] khat hong potosak a,

⁷⁰(tanglai ama kamsang siangthote tungtawna a gensa mah bangin),

⁷¹i galte le ei hong mudahte khut sung panin hotkhiatna ahi zongin,

⁷²i pu i pate tunga lainatna lak ding le ama thukhun siangtho phawk gige nading ahi zongin,

⁷³i pa Abraham tunga a ciamsa tua kiciamna:

⁷⁴i galte khut sung panin hong kihonkhia ding, lau lo-a ama na sem thei ding,

⁷⁵i nun sung teng ama mai-ah siangthona le thumaanna tawh ama na a sem ding i hi hi.

⁷⁶Tua ciangin nang, ka ta aw, Sang Pen-pa’ kamsangpa hong kici ding hi; a lampi sial dingin Topa mai-ah na pai dinga,

⁷⁷amaute mawhna maisakna tungtawna ama mite hotkhiat theihna piak nading ahi hi;

⁷⁸bang hang hiam cih leh i Pasian’ lainatna nem ngi-ingei hangin van pan sun nisuak i tungah hong tang dinga,

⁷⁹khuamial sung le sihna liim le khuamial sunga tengte tungah tangin, i khete lemna lampi a tawnsak ding hi," a ci hi.

⁸⁰Tua ciangin naupang khangto a, a lungsim a pumpi a hat hi; Israel mipite lakah a kilaak mateng gamlakah a teng hi.