Read Zokam Luke 10 Bible Online

Luke 10 - Zokam bible

Luke 10

¹Tua khit ciangin Topa in adang sawmsagih le nihte d[40] sehkhia-in ama pai nading mun le khua lian khempeuhah, ama mai-ah nihta in a sawlkhia hi.

²Amah in amaute kiangah, "An lak ding tampi a om hangin nasem ding mi tawm hi. Tua ahi ciangin ama lo lai-a nasem dingin an nei Topa kiangah ngen ta un.

³Pai un, keivomte lakah tuunote bangin note kong sawlkhia hi.

⁴Sumbawmte, thung-ipte, khedapte keng kei un; lamkalah kuamah hopih kei un.

⁵"Inn khatpeuh ah na lut uh ciangin, ‘Hih innah lemna om ta hen.’ ci masa un.

⁶Tua lai-ah lemna deih mi a om leh na piak uh lemna ama tungah tung dinga, a deih kei leh no tungah hong kileh kik ding hi.

⁷Nasempa in thaman ngah ding kilawm ahi manin tua innah na tam unla, nek ding dawn dinga hong piak peuhpeuh na ne un. Inn khat pan inn khatah zin na khel kawikawi kei un.

⁸"Khua khatpeuh ah na lut uh a hong ngaih uh leh na mai-ua hong lui peuhpeuh ne un.

⁹Tua khua-a cinate damsak unla amaute kiangah, ‘Note kiangah Pasian-gam hong nai ta hi,’ ci-in gen un.

¹⁰Ahi hangin khua khatpeuh na lut uh a hong ngaih kei uh leh kongzingte ah pai-in,

¹¹‘Ka khepek-ua bang na khua-ua leivuite nangawn no langa pang dingin ka phiatkhia uh hi. Ahi ta zongin Pasian-gam hong nai ta hi, cih na tel un,’ ci un.

¹²Kong gen tektek hi, tua ni ciangin tua khua thuak ding sangin Sodom khuapi thuakna a thuak nopzaw ding hi.

¹³"Korazin aw, gimna nak thuak na nicia! Bethsaida aw, gimna nak thuak na nicia! No sunga kibawl nalamdangte Tyre le Sidon khuate ah kibawl leh amaute in ippipuan silhin vut kibuakin sawt veipi-in kisik zo ding uh hi.

¹⁴Ahi hangin thukhenna ah no thuak ding sangin Tyre le Sidon khuate thuakna a zangzaw ding hi.

¹⁵Nang Capernaum aw, vanlai dongin hong kilamto ding ahi hiam? Hi peuhmah lo ding hi; a thuk penna mun a[41] dongin na kiasuk ding hi.

¹⁶"No thu hong ngaite, kei thu ngai ahi hi; no hong nolhte, kei hong nolh ahi hi; ahi hangin kei hong nolhte, kei hong sawlpa nolh ahi hi," a ci hi.

¹⁷Sawmsagih le nihte lungnuamin ciah kik uh a, "Topa aw, nang min hangin dawite nangawn ka thuthu un om tazen hi," a ci uh hi.

¹⁸Amah in, "Vantung panin khuaphelep bangin Satan hong kumsuk ka mu zo hi.

¹⁹Gulte le aikamte na tuatcil theih nading uh le galpa vang khempeuh na zawh theih nadingun thuneihna kong pia zo hi. Note bangmah in hong siasak zo lo ding hi.

²⁰Ahi zongin khate in na thu uh a manna hangin lungnuam kei unla vantungah na min uh a kigelhna hangin na lungnuam zaw un," ci-in a dawng hi.

²¹Tua hun laitakin Khasiangtho tungtawnin Jesu lungnuam mahmah a, "Vantung le leitung’ Topa, ka Pa aw, hih thute mipilte le theihna sangte tungah na im-a, naupangte tungah pholak na hi manin nangmah kong phat hi. Hi mah hi, Pa aw, hih in nangma deihna ahi hi.

²²"Ka Pa in na khempeuh kei hong ap zo hi. Tapa kua hiam, cih Pa longal kumah in thei lo-a, Pa kua hiam, cih Tapa le Tapa in a theihsak dinga a teelte longal kuamah in a thei kei uh hi," a ci hi.

²³Tua ciangin a nungzuite lamah amah kihei a, "Tu-a na muhte uh a mu mitte thupha ngah ahi hi.

²⁴Ahang in, kamsangte le kumpi tampitakin na muhte uh a muh nop uh hangin mu kha lo uh a, na zakte uh a zak nop uh hangin a za kha kei uh hi, cih kong gen hi" ci-in a tuam genpih hi.

²⁵Khat vei Jesu zia-et dingin thukham siam khat dingto a, "Sia aw, nuntak tawntungna ka luah theih nadingin ka hih pelmawh ding bang ahi hiam?" ci-in a dong hi.

²⁶Jesu in, "Thukham ah bang kigelh ahi hiam? Nang bang na ci ngaihsut hiam?" ci-in a dong hi.

²⁷Tuapa in, "‘Na Topa Pasian na lungtang khempeuh, na hinna khempeuh, na thahatna khempeuh le na lungsim khempeuh tawh na it in,’ b[42] cih le ‘Nang le nang na ki-it bangin na vengte it in,’ c[43] ci-in kigelh hi," ci-in a dawng hi.

²⁸Jesu in, "Mantakin nong dawng hi. Tua bangin zui lecin na nungta ding hi," a ci hi.

²⁹Ahi hangin tuapa amah le amah kidiktangsak nuam ahi manin Jesu kiangah, "Tua ahileh ka vengte kua ahi hiam?" ci-in a dong hi.

³⁰Tua dawnna-in Jesu in, "Mikhat, Jerusalem pan Jericho lam manawha a paisuk laitakin misuamte a tuak hi. Tuate in a puan hawkkhiatsak uh a, sat gawpin a sisa phialin nusia-in a paisan uh hi.

³¹Tua lampi mah tawnin siampi khat paisuk a, tuapa a muh ciangin a pamlamah pelin a paisan hi.

³²Tua mah bangin Levi-te khat va pai-a tua mun a tun ciangin tuapa mu-a, a langkhatah pelin a paisan hi.

³³Ahi hangin Samaria mi khualzin khat tua mun ah tunga tuapa a muh ciangin a hehpih hi.

³⁴Amah tua mipa omna-ah pai-a, a liammate sathau le lenggahzu nuhin a tuamsak hi. Tua ciangin tuapa ama laa tungah tuangsaka, zintun innah paipihin a khoi hi.

³⁵A zing ciangin nguntang d[44] nih lakhia a zin-inn ngakpa a pia hi. Amah in, ‘Amah na khoi in; nang aa na zatbeh a om leh kong kileh kik ciangin kong din ding hi,’ ci hi.

³⁶"Hih mi thumte lakah misuamte khut thuakpa adingin kua pen a vengte hi, ci-in na ngaihsun hiam?" ci-in a dong hi.

³⁷Thukham siampa in; "Amah a lainatpa pen ahi hi," ci-in a dawng hi. Jesu in, "Pai inla tua mah bangin na hih in," a ci hi.

³⁸Jesu le a nungzuite a pai laitakun khua khatah amah lut-a, Martha min nei numei khat in amah a inn a na hon hi.

³⁹Amah in Mary kici sanggam numei khat a nei hi. Tuanu a thugente ngai-in Topa khephungah a tu hi.

⁴⁰Ahi hangin Martha pen a innsung nasep teng semin a buai mahmah hi. Amah Jesu kiangah pai-a, "Topa aw, ka sanggamnu in nasep khempeuh kei guak hong khiat phamawh sa lo na hi hiam? Kei hong huh dingin sawl dih in!" a ci hi.

⁴¹Topa in, "Martha, Martha aw, na tampi lunghimawhin na lunggim hi.

⁴²Ahi hangin a kisam na khat bek a om hi. a[45] Mary in a hoihzaw pen tel khin zo a, tua pen ama tung pan a kilakhia nawn kei ding hi," ci-in a dawng hi.