Read Zokam Luke 12 Bible Online

Luke 12 - Zokam bible

Luke 12

¹Tua hun laitak, khat le khat kisikkha zah dongin mi tul tampi a kihonkhop uh ciangin Jesu in a masa penin a nungzuite kiangah, "Kineihsiamna ahi Pharisee-te silngo lakah na kikem un.

²A kipholak lo ding, a kiselcip bangmah om lo a; a kitheikhawk lo ding a ki-imcip bangmah a om kei hi.

³Khuamial sunga na gente uh sun nitang sungah kiza dinga, inn sungtawnga na huausimte uh innkhum dawnah kitangko ding hi.

⁴"Ken kong geninah lawmte aw, pumpi a thah khit ciangin aban bangmah a cih thei nawn lote na kihta kei un.

⁵Ahi hangin na kihtak ding uh kua hiam cih kong lak ding hi: Pumpi a thah khit ciangin hell khuk sunga hong paii thei dinga vangliatna a neipa na kihta un. Hi hi, ken kong geninah amah na kihta un.

⁶Kawlgit nga ciangin penny b[56] nih in kizuak hi lo ahi hiam? Tua hi napi Pasian in kawlgit khat zong a mangngilh kei hi.

⁷Na samzangte khempeuh uh kisim khin takpi hi. Lau kei un; kawlgit tampi sangin note na manphazaw uh hi.

⁸"Ken kong geninah, mite mai-a kei hong sang peuhpeuh Mihing Tapa in Pasian vansawltakte mai-ah a sang ding hi.

⁹Ahi hangin mite mai-ah kei hong kitheihmawhbawlte Pasian vansawltakte mai-ah ka kitheihmawh bawl ding hi.

¹⁰Tua ahi ciangin Mihing Tapa a langgente peuhmah kimaisak dinga, ahi hangin Khasiangtho a gendai peuhpeuh a kimaisak kei ding hi.

¹¹"Synagogue-te mai ahi zongin gam-ukte le thuneite mai-ah ahi zongin note hong kipaipih ciangin bang kici hutin, bang gen ding cih lunghimawh kei un.

¹²Tua hun ciangin na gen ding uh Khasiangtho in hong hilh na ding hi," ci-in a gen hi.

¹³Mihonpite lakah khat in, "Sia aw, ka sanggampa tawh ka gamh luah dingte ka hawm nadingun ama tungah hong gensak in," a ci hi.

¹⁴Jesu in, "Mihingpa, nogel kikal-a thukhen ding ahikeh lemgen dingin kua in kei za hong pia hiam?" ci-in a dawng hi.

¹⁵Tua ciangin amah in amaute kiangah, "Kigalging un! Huaihamna nam khempeuh panin na kikem un; mihing nuntakna pen neih le lama bucinna tawh a kim kei hi," a ci hi.

¹⁶Tua ciangin amah in amaute kiangah gentehna gen a, "Mi hau khat lo ah an tampi a piang hi.

¹⁷Tuapa in, ‘Bang ci ding ka hi hiam? Ka ante ka khol nading mun ka nei kei hi,’ ci-in a ngaihsun hi.

¹⁸"Tua ciangin amah in, ‘Hih ka hih ding hi. Ka salte phelkhia-in a lianzaw ka lam dinga, tua lai-ah ka ante khempeuh le ka vante ka koih ding hi.

¹⁹Tua ciangin, ‘Kum tampi man ding na hoih tampi ka koih khin zo hi. Nuntakna nopzatin, nene-in dawndawnin gualnuam in, ka kici ding hi,’ ci hi.

²⁰"Ahi hangin Pasian in ama kiangah, ‘Nang mihaipa! Tu zan mahmah in na nuntakna nang tung pan hong kilaksak ding hi. Tua hileh nang adinga na koihkholhte kua in tang ding ahi hiam?’ ci hi.

²¹"Pasian lamah hau lo a, ama adinga na a kholte peuhmah tua bang hi ding hi," a ci hi.

²²Tua caingin Jesu in a nungzuite kiangah, ‘Tua ahi ciangin ken kong geninah na nuntak nading, na nek ding ahi zongin, na silh na ten ding ahi zongin na pumpi uh ading bangmah lunghimawh kei un.

²³An sangin nuntakna thupizaw a, puan sangin pumpi thupizaw hi.

²⁴Va-akte na ngaihsun dih un: Tuate in vawh lah vawh lo, at lah at lo, gawdam ahi zongin sal ah ahi zongin a khol kei uh hi. Tua hi napi Pasian in tuate a vak hi. Vasate sangin note na manpha zawtham pek uh hi!

²⁵A lunghimawh manin a nuntak hun nai khat bek nangawn a sotto a[57] thei note lakah kua om ahi hiam?

²⁶Hih bang thu neucik khat nangawn na hih theih loh khit nungsangun adangte bang lunghimawhna na hi uh hiam?

²⁷"Unokte khanzia na ngaihsun un. Na sem loin khau lah a khek kei uh hi. Tua hi napi Solomon nangawn a thupina khempeuh tawh a kizep laitakin, hihte zahin zong a kizem zo kei hi.

²⁸Upna neu mite aw, tuni-in hih lai-ah om a, zing ciangin mei-a kikhul ding lopa kung khat, Pasian in tua zahin zem ahileh amah in note puan hong guan zaw tham ding hi!

²⁹Tua ahi ciangin na nek na dawn ding uh ngaihsut penin nei kei un; tuate na lunghimawh kei un.

³⁰Hih nate khempeuh leitung lawkite in zon penin a nei uh hi. Hih nate na kisap lam uh na Pa un a thei hi.

³¹Ahi zongin Pasian gam na zong un, tua hileh hih nate khempeuh hong piathuah ding hi.

³²"Tuu hon tawmkhate aw, na Pa un note gam hong piak ding lungkim khin ahi manin na lau kei un.

³³Na neihsate uh zuak unla mizawngte na pia un. A patvang thei lo sumbawm no le no na kiguan unla, a bei thei lo, gutate in a naih theih loh le nget nek theih lohna mun vantungah na gou uh khol un.

³⁴Ahang in, na gou omna munah na lungsim zong om ding hi.

³⁵"Na sem dinga kisa kholsa in om unla, meivak kuangsa-in om un;

³⁶mopi powi sima hong ciah kik, kong a kiuh pheta a honpah thei dinga a pu uh a ngakte bangin om un.

³⁷A pu uh a pai ciangin tua banga a ngak laitak a tuah nasemte hampha ding uh hi. Thutak kong geninah, an vak dingin amah kithawi-a, a nasemte sabuai ah kingamsakin amaute ankuang a lui ding hi.

³⁸Zan, vil nihna ahi zongin, vil thumna ahi zongin a pu a pai cianga, a pu in kigingsa-a om a tuah nasemte a hampha ding uh hi.

³⁹Ahi hangin note in hih thu na theitel un: Inn neipa in zanlai bang hunin gutate pai ding hiam cih theikhol leh a inn kiluhsak lo ding hi.

⁴⁰Na muanmawh loh hun laitakun Mihing Tapa hong pai ding ahi manin note zong pel loin kigingsa in om un," a ci hi.

⁴¹Peter in, "Topa aw, hih gentehna ko tung beka gen na hi hiam, ahikeh mikim tunga gen na hi hiam?" ci-in a dong hi.

⁴²Topa in, "Tua ahileh ama inn sunga nasem dangte ukin, amaute a hunhuna an a pia dinga a pu in a koih, a muanhuai a pil sungtapipa kua ahi hiam?

⁴³A pu a ciah kik cianga tua banga a sep laitak a tuah nasempa hampha ding hi.

⁴⁴Thutak kong geninah, a pu in tuapa a neihsa khempeuh a uksak ding hi.

⁴⁵Ahi hangin tua nasempa in, ‘Ka pu sawtveipi hong tam na inteh,’ ci-in nasem-numei le nasem-pasalte satgawp henla, an ne in zu dawnin zu na kham leh,

⁴⁶a lamet loh ni le a khuadon loh hun laitakin a pu tung dinga, tua nasempa a pu in atnenin thu um lote tawh mun khatah a koihkhawm ding hi.

⁴⁷"A pu deihna thei napi-in, a pu deihna banga gamta lo-a, kigingkhol lo tua nasempa tam veipi a kisat ding hi.

⁴⁸Ahi hangin bangmah thei lo-a gawtna thuak nadinga kilawm nate a hihpa ahileh tawm vei kisat ding hi. Tampi a kipiate tung panin tampi kingen kik ding hi; tampi a ki-apte tung panin a tamzaw lai kingen kik ding hi.

⁴⁹"Leitungah mei puak dinga hong pai ka hi hi. Tua mei a kuang khin hileh ut sing!

⁵⁰Ahi hangin ka thuak ding baptisena khat oma, tua a kizawh siang mateng ka lungdong mahmah hi!

⁵¹Leitung ah kilemna puak dingin hong pai hi, ci-in hong ngaihsun kha uh hiam? Hi lo hi, ken kong geninah kikhenna khah dinga hong pai ka hi hi.

⁵²Tu-a kipanin innkuan khat mi nga a phate, thum lang ah nih, nih langah thumin khat le khat kilangpang ciat ding uh hi.

⁵³A tapa langah a pa, a pa langah a tapa, a tanu langah a nu, a nu langah a tanu, monu langah teknu, teknu langah monu kilangpan ciatin amaute a kikhen ding uh hi," ci-in a dawng hi.

⁵⁴Amah in mihonpite kiangah, "Nitumna-lam panin meii hong kai na muh uh ciangin, ‘Guah zu ding hi,’ na ci thei pah uh a, guah lah a zu takpi hi.

⁵⁵Leitaw-lam pana huih a nun ciangin, ‘Khua lum ding hi,’ na ci uh a, a lum takpi hi.

⁵⁶Kineihsiamte! Van le lei maitangte pianzia na khia thei uh hi. Bangci bangin tu lai hun khia thei lo na hi uh hiam?

⁵⁷"Bang hangin note in amaan le amaan lo khen thei lo na hi uh hiam?

⁵⁸Thukhenpa kiangah na langpa tawh na paikhawm laitak mah un lampi-ah na kilemkik zawh nading nakpi in hanciam in. Tua hi kei leh amah in thukhenpa kiangah nang hong kai dinga, thukhenpa in bupa tungah hong apin, tua bupa in nang thong sung hong denna ding hi.

⁵⁹Ken kong geninah, na liausum na piak khit siang matengin na suakta kei ding hi," a[58] a ci hi.