Read Zokam Luke 13 Bible Online

Luke 13 - Zokam bible

Luke 13

¹Tua laitakin tua lai-a om mi pawlkhat in, Pilate in Galilee-te sisan le a biakpiakna uh a helsakna Jesu kiangah a ko uh hi.

²Jesu in, "Tua Galilee mite in hih banga a thuak manun a Galilee mipih dangte khempeuh sangin a mawhzaw hi dingin na ngaihsun uh hiam?

³Ken kong geninah, a mawhzaw tuan kei uh hi! Ahi hangin note na kisik kei uh leh note zong na vekun na mangthang khin ding uh hi.

⁴Ahikeh Siloam a tausang in a denlup mi sawm le giatte, Jerusalem a tengte khempeuh sangin a mawhzaw hi dingin na ngaihsun uh hiam?

⁵Kong hilh tektek hi, a mawhzaw tuan kei uh hi! Ahi hangin note na kisik kei uh leh note zong na vekun na mangthang khin ding uh hi," ci-in a dawng hi.

⁶Tua ciangin amah in, hih gentehna gen a: "Mi khat in a lenggui lo sunga kisuan theikung khat a nei hi. Amah a gah en dingin a pai hangin a gah khat beek a mu kei hi.

⁷Tua ciangin amah in a lenggui lo cingpa kiangah, ‘Kum thum sung tawntung thei a gah hiam, cih en dingin kong paipai hangin a gah khat beek ka mu kei hi. Phuk tan in! Lei hoih pengsak lel hi lo hiam?’ ci hi.

⁸"Tuapa in, ‘Pu aw, kum khat khawi lai dih in, a kimkot toin leihoih na sung phot dih ning.

⁹Ni kum ciang a gah le pha! A gah kei leh tua ciangin phuk in,’ ci-in dawng hi," a ci hi.

¹⁰Sabbath ni khat Jesu in synagogue-te khatah thu a hilh hi.

¹¹Tua lai-ah kha khat in, kum sawm-le-giat sungtak a poisak numei khat a om hi. Tuanu a nung kulin a dingtang thei peuhmah kei hi.

¹²Jesu in amah a muh ciangin a mai lamah samkhia a, "Numei aw, na zawnkhalna panin hong kikhahkhia hi," a ci hi.

¹³Tua ciangin amah in tuanu tungah a khutte nga-a, tua khit phetin tuanu dingtang thei-a Pasian a phat hi.

¹⁴Sabbath ni-in Jesu in cina damsak ahi manin synagogue ukpa lungkim lo a mipite kiangah, "Nasep hun ding ni guktak a om hi. Tua ahi ciangin a kidamsak dingin tua nite in hong pai unla, Sabbath ni-in hong pai kei zaw un," a ci hi.

¹⁵Topa in tuapa kiangah, "No kineihsiamte, Sabbath ni-in na bawngte na laate uh a buk pan sutin nomau ciat in tui pia dingin paipih hi lo na hi uh hiam?

¹⁶Tua ahileh kum sawm le giat sungtak Satan in a hencip hih Abraham tanu a kihencipna pan Sabbath ni-in khahkhiat huaizaw lo ding ahi hiam?" ci-in a dawng hi.

¹⁷Amah in hih thu a gen ciangin amah a langpangte khempeuh zahlak uh a, ahi hangin mipite ahileh ama hih nalamdangte hangin a kipak uh hi.

¹⁸Tua ciangin Jesu in, "Pasian gam bang tawh kibang ahi hiam? Bang tawh ka teh ding hiam?

¹⁹Mi khat in huan sunga a cin ankam tang tawh kibang hi. Tua ankam khangto a, kungpi suakin a hiangte tungah huihlak vasate a tuang uh hi," a ci hi.

²⁰Amah in, "Pasian gam bang tawh ka teh ding hiam?

²¹Numei khat in a ki mekman buhnel lompi b[59] khat a khangsak zo-a, a sawh silngo tawh kibang hi," a ci lai hi.

²²Tua ciangin Jerusalem lam manawhin a pai kawmin khuapi khuaneute ah lutin thu a hilh hi.

²³Mi khat in ama kiangah, "Topa, mi tawmkha bekin hotkhiatna ngah ding uh ahi hiam?" ci-in a dong hi. Amah in amaute kiangah,

²⁴"Kong kawcik-a lut ding na hahkat un. Bang hang hiam cihleh, mi tampi in lut ding a hanciam ding uh a, ahi hangin a lut thei kei ding uh hi, cih kong gen hi.

²⁵Inn neipa khatvei thoin kong a khak khit nak leh note a pualamah dingin, ‘Topa aw, kote kong hong hon in,’ ci-in kongkhak kiu-in na ngen ding uh hi. "Ahi hangin amah in, ‘Note kong thei kei hi; koi pan hong pai cih zong kong thei kei hi,’ ci-in dawng ding hi.

²⁶"Tua ciangin note in, ‘Nang tawh i nekhawm i dawnkhawm a, ka kongzingte uah zong thu na hilh hi,’ na ci ding uh hi.

²⁷"Ahi hangin amah in, ‘Note kong thei kei hi; koi pan hong pai cih zong kong thei kei hi, no a tatkhelte aw paimang un!’ ci-in hong dawng ding hi.

²⁸"Abraham, Isaac, Jacob le kamsangte khempeuh, Pasian gam sungah om a, note pualamah hong kihawlkhia cih na muh uh ciangin tua lai-ah kahna le hagawina a om ding hi.

²⁹Nisuahna, nitumna, leilu, leitaw panin mite hong pai ding uh a, Pasian gam sunga pawipi-ah amau mun ciatah a tu ding uh hi.

³⁰A nunungte masa a, a masate nunung cih a om takpi hi," ci-in a gen hi.

³¹Tua hun laitakin Jesu kiangah Pharisee-te pawlkhat va pai uh a ama kiangah, "Hih lai nusia in mundang khatpeuh ah pai in. Herod in nang hong that nuam hi," a ci uh hi.

³²Amah in, "Pai-in tua ngia kiangah, ‘Tuni le zingciang dawite hawlkhia-in mite ka damsak dinga, a ni thumna ni-in ka tupna ka tung ding hi, ci hi,’ ci-in va gen un.

³³Bangbang ahi zongin tuni, zingciang le thaiciang ka vakvak lai ding hi - ahang in, Jerusalem pualamah kamsang kuamah a si thei peuhmah kei ding hi!

³⁴"Jerusalem aw, Jerusalem, kamsangte that-a, nang kianga hong kisawlte suangin a deng nang, akpi in a note a kha nuai-ah a khop bangin na tate ka khop nop hangin nang na ut kei hi!

³⁵En in, na inn a hawmmangsa in kinusia ding hi. Ken kong geninah, ‘Topa min a[60] hong paipa in thupha a ngah hi,’ na cih matengin nong mu kik nawn kei ding hi," a ci hi.