Read Zokam Luke 14 Bible Online

Luke 14 - Zokam bible

Luke 14

¹Sabbath ni khat, a kipi-et mahmah Pharisee khat innah Jesu an ne dingin a pai ciangin amah limtakin a encik uh hi.

²Tua lai-ah, ama mai-ah tuipuak natna a vei mi khat a om hi.

³Jesu in Pharisee-te le thukham siamte kiangah, "Sabbath ni-a cina damsak ding thukham tawh kituak hiam, kituak lo hiam?" ci-in a dong hi.

⁴Ahi hangin amaute a dai khipkhep uh hi. Tua ciangin amah in, tua mipa lenin damsaka, a ciahsak hi.

⁵Tua khit ciangin Jesu in amaute kiangah, "Note lakah khatpeuh in a tapa b[61] ahikeh a bawngtal khat, Sabbath ni-in tuikhuk sungah kia leh a kaikhiapah lo ding kua om ahi hiam?" ci-in a dong hi.

⁶Amaute in gen ding a nei kei uh hi.

⁷Lenglate in sabuai-a tutna thupite a tel uh amah in a theih ciangin amaute kiangah gentehna gena:

⁸"Mi khatpeuh in mopi pawi-a hong sap ciangin no sanga lianzawte na kisam kha thei ding ahi manin, tutna thupite ah na tu kei un.

⁹Tua hileh note gel hong samkhawm inntekpa hong pai-in na kiangah, ‘Na tutna tuapa na awn in,’ hong ci ding hi. Tua ciangin nang zahlakin a thupi lo penna munah na tut kul kha ding hi.

¹⁰Ahi hangin nang hong kisap ciangin aniam penna munah na tut leh, inntekpa hong pai-in nang kiangah, ‘Lawm aw, a hoihzaw mun tutna ah na tuto in,’ hong ci ding hi. Tua ciangin na lenglapihte khempeuh lakah na angtang ding hi.

¹¹Ahang in, amah le amah a kitawisangte kiniamsak dinga, amah le amah a kiniamsakte kitawisang ding hi," a ci hi.

¹²Tua ciangin Jesu in a inntekpa kiangah, "Sun-an ahi zongin nitak-an ahi zongin na vak ciangin, na lawmte ahi zongin na sanggamte ahi zongin na tanaute ahi zongin sum hau na vengte ahi zongin sam kei in. Tua banga na sap leh amaute in nang hong samin hong thuk kik ding uh hi.

¹³Anvakna pawi na bawl ciangin mizawngte, mipoite, khebaite le mittawte na sam zaw in,

¹⁴tua hileh thupha na ngah ding hi. Amaute in nang hong thuk zawh loh hangin thumaante thawhkik ciangin nang hong kithukkik ding hi," a ci hi.

¹⁵Amah tawh sabuai-a tukhawmte khat in hih thu a zak ciangin Jesu kiangah, "Pasian gam sunga pawi-a an ne dingte, thupha ngah ahi hi," a ci hi.

¹⁶Jesu in, "Mi khat in pawi lianpi khat bawlin mi tampi a kho hi.

¹⁷Tua anvak pawi hun ciangin a khohsate kiangah, ‘Hong pai ta un, na khempeuh a baihsa-in om zo hi,’ ci-a gen dingin a nasemte a sawl hi.

¹⁸"Ahi hangin a khohsate in a kibangin paulap a nei ciat uh hi. A masa pa in, ‘Lo khat a lei khin phet ka hi a, pai-in tua lo ka et kul hi. Nong hehpihna-in hong pengsak in,’ ci hi.

¹⁹"Adang khat in, ‘Bawng kap nga a lei khin phet ka hi-a tuate sin dingin a pai kimlai ka hi hi. Nong hehpihna-in kei hong pengsak in,’ ci hi.

²⁰"Adang khat leuleu in, ‘Zi nei khin phet ka hi hi, tua ahi ciangin kong pai thei kei ding hi,’ ci hi.

²¹"Nasempa ciah kika, a pu kiangah hih thute a zasak hi. Tua ciangin inn neipa heha, a nasempa kiangah, ‘Khuapi kongzingte le kongzingneute ah pai mengmeng inla, mizawngte, mipoite, mittawte le khebaite hong lutsak in,’ ci-in thu pia hi.

²²"Nasempa in ‘Pu aw, nong thupiak bangin kihih khin zo hi, ahi hangin mun awng lai hi,’ ci hi.

²³"Tua ciangin a pu in nasempa kiangah, ‘Lamliante le lamneute ah va pai inla, ka inn a dim nadingin amaute hong lutsak in.

²⁴Ken kong geninah, a kikhosate khat beek in ka anvak a ciam kha kei ding uh hi,’ ci hi," a ci hi.

²⁵Mihon tampi tawh Jesu a paikhawm laitakin amaute lam nga in,

²⁶"Kei kianga hong pai mi khatpeuh in a nu, a pa, a zi a tate le a sanggampate, a sang gamnute tham lo ama nuntakna nangawn a muhdah kei leh amah, kei nungzui a hi thei kei ding hi.

²⁷Tua hi-a ama singlamteh pua-a ka nung hong zui lo peuhmah ka nungzui a hi thei kei ding hi.

²⁸"Gentehna-in note lakah tausang dawh nuam khat om leh a tua tausang a dawh zawh nading sum a kicing ding a nei hiam, cih thei dingin tu-in aman ding tuat masa lo ding ahi hiam?

²⁹Ahang in, amah in a bulpi pan khin napi, zosiang zo kei leh a mu khempeuh in nuihsan dinga,

³⁰‘Hih pa in tausang dawh kipan khin napi a zosiang kei hi,’ ci ding uh hi.

³¹"Ahikeh gentehna in kumpipa khat in kumpi dang khat sim dingin kithawi leh mi tul sawmnih tawh a kuanpa, mi tul sawm tawh a nang zo ding hiam, cih tu photin, ngaihsun masa lo ding ahi hiam?

³²Amah a kingap kei leh, a galpa a gamlapi-a a om lai-in ama kiangah palai sawl dinga, kilem nadingin a thumsak ding hi.

³³Tua mah bangin note laka na khempeuh a nusia lo peuhmah ka nungzui a hi thei kei ding hi.

³⁴"Ci a lim hangin a alna mang leh bangci in ki-al kiksak thei ding hiam?

³⁵Leitak ading ahi zongin eklei dinga khol ding ahi zongin kimanna a nei kei hi; kibuakhia lel hi. "Zak nading bil nei peuh in za ta hen," a ci hi.