Read Zokam Luke 15 Bible Online

Luke 15 - Zokam bible

Luke 15

¹Tua ciangin ama thu gen ngai dingin siahdongte le "mawhneite" ama kimah a kikhawm uh hi.

²Ahi hangin Pharisee-te le thukham siate in, "Hih mipa in mawhneite ngai-in amaute tawh an a nekhawm hi," ci-in a phunsan uh hi.

³Tua ciangin Jesu in amaute kiangah gentehna gen a,

⁴"Note lakah khat in tuu zakhat nei a, tuate lakah khat mansuah leh sawmkua le kua-te pawn lakah nusia in a tuu mang a muh mateng zong lo ding ahi hiam?

⁵A muh ciangin lungnuamtakin a liangko tungah pua-in,

⁶innah a ciah hi. Tua ciangin amah in a lawmte le a vengte samkhawm a, ‘Kei hong nuampih un; ka tuu mang ka mu zo hi,’ ci hi.

⁷Tua mah bangin kisik a kul lo a thumaan mi sawm kua le kua-te sangin mawh nei khat a kisik na hangin vantung ah nuamna a lianzaw ding hi, cih kong hilh hi.

⁸"Ahikeh gentehna-in numei khat in nguntang a[62] sawm nei in khat mansuah leh tuanu in mei vaka a inn phiatin a muh mateng limtakin zong lo ding ahi hiam?

⁹A muh ciangin a lawmte le a vengte samkhawm in, ‘Kei hong nuampih un; ka sum mang ka mu zo hi,’ ci hi.

¹⁰Tua mah bangin ken kong geninah, mawhnei mi khat a kisikna hangin Pasian vansawltakte omna ah nuamna a om hi," a ci hi.

¹¹Jesu in a thugen zomlai a, "Tapa nih a nei mi khat a om hi.

¹²A nauzawpa in a pa kiangah, ‘Pa aw, i goute sung pan kei tanh ding hong khenkhia in,’ ci hi. Tua ciangin amah in a neihsate amau gel a hawmsak hi.

¹³"Tua khit a sawt loin a nauzawpa in a neih khempeuh kaikhawmin, gamlapi ah pai-a noptatna-in a sum neih teng a zangbei hi.

¹⁴A neih khempeuh a zat bei khit ciangin tua gambup ah kialpi tunga, amah a kitasam hi.

¹⁵Tua ciangin amah tua gam mite khat kiangah sum thalawh dingin pai-a, tuapa in amah a lo ah vok-an pia dingin a sawl hi.

¹⁶Amah in vokte nek begapte duhgawh mahmah a, ahi hangin kuamah in bangmah a pia kei hi.

¹⁷"Amah le amah a kiphawkkhiat ciangin, ‘Ka pa inn a sum thalawhte tampi in an khamval nei ding uh a, kei lah hih lai-ah ka puksi dektak hi!

¹⁸Kei dingkhia ning ka pa kiangah ciah kikin: Pa aw, vantung le nangma tungah ka mawh zo hi.

¹⁹Nang ta cih dingin ka kilawm nawn kei hi; na sum thalawhte khat bangin hong koih in ka ci ding hi,’ ci hi.

²⁰Tua ahi ciangin amah tho-a, a pa kiangah a ciah hi. "Ahi hangin inn pan gamlapi-a a om laitakin a pa in na galmuh-a, amah khuatuah mahmah ahi manin, a tapa delha pumkawi-in a nam hi.

²¹"A tapa in ama kiangah, ‘Pa aw vantung le nangma tungah ka mawh zo hi. Nang ta cih dingin ka kilawm nawn kei hi,’ b[63] ci hi.

²²"Ahi hangin a pa in a nasemte kiangah, ‘Manlang un! Puan a hoih pen hong la unla amah silhsak un. A khutme ah zungbuh bunsak unla khedap zong bulhsak un.

²³Bawngno vakthau pen hong paipih unla go un. Pawipi bawlin lawm ni.

²⁴Ahang in, hih a si khinsa ka tapa tu-in hing kik zo hi; a mangsa hi-a tu-in kimu kik hi,’ ci hi. Tua ahi ciangin amaute in a lawm uh hi.

²⁵"Tua hun laitakin a tapa uzaw pen lo-ah a om hi. Inn kiang a tun ciangin tumging le lamna a za hi.

²⁶Tua ahi ciangin amah in nasemte khat sama, ‘Bang kihih ahi hiam?’ ci-in dong hi.

²⁷Amah in, ‘Na sanggampa hong ciah ta a, cidam ludamtakin na pa kiang hong tung kik ahi manin na pa in amah bawngno vakthau pen gawh hi,’ ci hi.

²⁸"A u pa heh a inn sungah a lut nuam kei hi. Tua ahi ciangin a pa pusuakin amah va zol hi.

²⁹Ahi hangin amah in a pa kiangah, ‘Ngaihsun in! Kum hi tan vei nang adingin sila-na ka sema, nong thupiakte ka mang lo ngei peuhmah kei hi. Tua hi napi ka lawmte tawh ka lop nadingin keelno khat nangawn nong pia ngei kei hi.

³⁰Ahi hangin na neihsa teng numei kizuakte tawh a zatmang khit cianga inn hong zuan hih na tapa, bawngno vakthau pen na gawh tazen hi!’ ci hi.

³¹"A pa in, ‘Ka ta aw, nang le kei i omkhawm dena, ka neih khempeuh nang aa ahi hi.

³²Ahi hangin na sanggampa a si khinsa tu-in hong hing kika, a mangsa tu-in kimu kik ahi manin nuamin i lop a kul hi,’ ci hi," ci-in a gen hi.