Read Zokam Luke 16 Bible Online

Luke 16 - Zokam bible

Luke 16

¹Jesu in a nungzuite kiangah, "Khatvei mihau khat om a, sungtapipa in a pu neihsa teng a zat beisak hi, ci-in kingawh hi.

²Tua ahi ciangin a pu in amah sama, ‘Nang thu ka zak bang thu ahi hiam? Ka sungtapipa hi thei nawn lo ding na hi manin na sum ciamtehna hong lak dih in,’ ci hi.

³"Sungtapipa in a lungsim sungah, ‘Tu-in bang cih ding ka hi hiam? Ka pu in ka nasepna pan hong tawpsak ding hi. Lei to dingin lah ka hat nawn kei a, khut dawha nget ding lah ka maizum hi.

⁴Hih lai-a ka nasep ka tan ciangin mite in a innuah kei hong san theih nadingun ka hih ding ka thei ta hi,’ ci hi.

⁵"Tua ahi ciangin amah in a pu tunga leibate a banbanin a sam hi. Amah in a masa pen kiangah, ‘Ka pu tungah bangzah na ba hiam?’ ci-in dong hi.

⁶"Amah in, ‘Olive thau gallon c[64] za giat hi,’ ci hi. "Sungtapipa in ama kiangah, ‘Na leiba lai va la inla, tu mengmeng in zali in bawl in,’ ci hi.

⁷"Tua ciangin a nihna pa kiangah, ‘Nang bang zah ba na hi hiam?’ ci-in dong hi. "Amah in, ‘Mangbuh seu d[65] tul khat hi,’ci-in dawng hi. "Amah in ama kiangah, ‘Na leiba lai va la inla, zagiat-in bawl in,’ ci-in gen hi.

⁸"A pu in a simtat nasempa geelsiam mahmah ahi manin a phat hi. Ahang in, khuavak sunga om mite sangin hih leitung mite in amaute kibatpihte tawh kizop zia ah a geelsiam zaw uh hi.

⁹Ken kong geninah, leitung hauhnate lawm ngah nadingin na zang un; tua hileh a bei ciangin tawntung tenna ah note hong kimuak ding hi.

¹⁰"Tawmcik tunga muanhuaite tampi tungah kimuang thei dinga, tawmcik tunga muanhuai lote tampi tungah zong a muanhuai kei ding hi.

¹¹Tua ahi ciangin note leitung hauhna kem dingin na muanhuai kei uh leh hauhna taktak kem dingin kua in hong muang ding ahi hiam?

¹²Midang khatpeuh neihsa tungah na muanhuai kei uh leh no neihsa ding kua in hong pia ding ahi hiam?

¹³"Kuamah in to nih na a sem khawm thei kei hi. Khat itin khat a mudah hiam, khat beelin a khat a simmawh hiam, khat zawsang hi ding hi. Pasian na le Sum na, na sem khawm thei kei ding uh hi," ci-in a gen hi.

¹⁴Sum iplah Pharisee-te in hih thu a zak uh ciangin Jesu a zahpih uh hi.

¹⁵Amah in amaute kiangah, "Note, mite mitmuh ah dik na kitansak uh hangin Pasian in na lungtangte uh a thei hi. Mite in manpha a sak mahmah nate Pasian muhna-ah kihhuai hi.

¹⁶"John hun masiah Thukham le Kamsangte a kitangko hi. Tua khita kipan, Pasian gam lungdamna-thu kihilhin, tua sungah thahatthu-in mikim a lut gawp hi.

¹⁷Thukham panin a mal themcik khat a mawk maiman sangin van le lei a mawk maiman ding a baihzaw ding hi.

¹⁸"A zi ma a numei dang khat a tenpih peuhmah, angkawmpa suak a, a kimasa numei a tenpih peuhmah angkawmpa a suak hi.

¹⁹"Khatvei sumhaupa khat a om hi; tuapa in puan dupsan le saihadial puan silh a, nisimin noptatin a om hi.

²⁰A kongpi gei-ah meima in a pumtuam Lazarus min nei khutdawh-a ngen khat kikoih hi.

²¹Amah in sumhaupa sabuai pana kia an-nengte a lunggulh hi. Uite nangawn pai-in ama meimate a liahsak uh hi.

²²"Tua khutdawh-a ngenpa a sih ciangin vansawltakte in Abraham kiangah a puak uh hi. Sumhaupa zong si-a, a kivui hi.

²³Amah gentheipi-a a omna mun hell a[66] khuk sung pan a khuadak leh agal pekpekah Abraham le a kianga om Lazarus a mu hi.

²⁴Tua ciangin amah sama, ‘Pa Abraham aw, kei hong hehpih in. Hih mei sungah gimna nakpi in ka thuak hi. Lazarus in a khutme dawn tui diahin ka leii hong votsak dingin hong sawl in,’ ci hi.

²⁵"Ahi hangin Abraham in, ‘Ka ta aw, na nuntak hun sungin na hoihte na ngah a, tua laitakin Lazarus in na hoih lote a ngah hi, cih phawk in. Ahi hangin tu-in amah hih lai-ah nuamsa a, nang na hileh gimna na thuak hi.

²⁶Tua banah eite kikalah guam thukpi khat om a, tua kantanin hih lai pan tua lai-a pai nuamte a pai thei kei uh hi; tua lai pan hih lai ko kianga hong pai nuamte a pai thei kei uh hi,’ ci hi.

²⁷"Amah in, ‘Tua ahileh pa aw, ka pa inn ah Lazarus nong sawlsak ding kong thum hi.

²⁸Ahang in, sanggam pasal nga ka nei hi. Tua ka sanggamte hih gentheihna mun hong tun loh nadingun amah in amaute va vauhilhsak hen,’ ci-in dawng hi.

²⁹"Abraham in, ‘Amaute in Moses le Kamsangte a nei uh hi; tuate thu na ngai uh hen,’ ci-in dawng kik hi.

³⁰"Tuapa in, ‘Hi lo hi, pa Abraham aw, a sisate kiang panin amau kiangah khatpeuh va pai leh amaute kisik ding uh hi,’ ci hi.

³¹"Amah in ama kiangah, ‘Amaute in Moses le Kamsangte thu a ngaih nop kei uh leh a sisa khatpeuh a thawh kik hangin a taksang tuan kei ding uh hi,’ ci hi," ci-in a gen hi.