Read Zokam Luke 17 Bible Online

Luke 17 - Zokam bible

Luke 17

¹Jesu in a nungzuite kiangah, "Mite mawhna a bawlsak ding thute hong tung pelmawh ding hi. Ahi hangin tua mawhnate a bawlsak mipa in nakpitakin gimna thuak ta hen.

²Hih naupangnote mawhna a bawlsak tua mipa, a ngawgah angawina suang kikhihin tuipi sungah kipai leh ama adingin hoihzaw ding hi.

³Tua ahi ciangin note kigalging un. "Na sanggampa in mawhna a bawl leh tai inla, a kisik leh ama mawhna maisak in.

⁴Nang tungah ni khatin mawhna sagih vei hong bawla, nang kiangah sagih vei mah hong pai-in, ‘Ka kisik hi,’ hong cihleh maisak in," ci-in a gen hi.

⁵Sawltakpite in Topa kiangah, "Ka upna uh hong khangsak in," a ci uh hi.

⁶Amah in, "Note in ankam tang cia-a neu upna na neih uh leh hih nailung ankung kiangah, ‘Kizunglot inla, tuipi sungah va po in,’ ci le uh cin na thu uh hong mang ding hi.

⁷"Gentehna-in, note lakah khat in lokai ahikeh tuucing nasem khat nei hi. Tua nasempa lo pan a ciah ciangin ama kiangah, ‘Tu-in hong pai inla an ne dingin tukhawm ni,’ a ci ding hiam?

⁸‘Ka nitak-an kuang hong lui inla a kigingsa-in om in; an ka nek ka dawn laitakin hong tuan-vai in; ka kham khit ciangin nang na ne na dawn thei pan ding hi,’ ci zaw ding hi lo ahi hiam?

⁹Amah in a nasempa tunga sep dinga a hilh bangin sem ahi manin ama tungah a lungdam ding hiam?

¹⁰Tua ahi ciangin note in zong no tunga hong kigen khempeuh na hih khit uh ciangin, ‘Eite, a kizen lo na semte i hi hi; i sep ding zah bek a sem i hi hi,’ na cih ding uh ahi hi," a ci hi.

¹¹Jerusalem lam manawh-a a pai laitakin Jesu in Samaria le Galilee kikal gamgi dung a zui hi.

¹²Amah khuaneu khatah a lut laitakin phak natna a[67] a vei mi sawm in amah a na dawntuah uh hi. A gamlat simna munah ding uh a,

¹³"Jesu aw, Topa aw, kote hong hehpih in!" ci-in nakpi in a galsap uh hi.

¹⁴Amah in tuate a muh ciangin, "Pai unla, siampite kiangah va kilak un," a ci hi. Tua banga a pai kimlai mah amaute a siang uh hi.

¹⁵Amaute lakah khat in a damsiang lam a kitheih ciangin va pai kika, aw ngaihtakin Pasian a phat hi.

¹⁶Amah Jesu khephung kidenna-in a lungdamna a gen hi - amah Samaria mi ahi hi.

¹⁷Jesu in, "A kisiangsak sawm pha hi lo ahi hiam? Adang kuate koi-ah om uh ahi hiam?

¹⁸Hih mi namdang pa longal hong kileh kika Pasian phat ding khat beek om lo ahi hiam?" ci-in a dong hi.

¹⁹Tua ciangin amah in tuapa kiangah, "Tho inla pai in; na upna in nang hong damsak zo hi," a ci hi.

²⁰Khat vei Pharisee-te in Pasian gam hong tun ding hun a dot uh ciangin Jesu in, "Pasian-gam mit-a kimu thei-in hong tung lo ding hi.

²¹Mite in, ‘Pasian gam hih lai-ah om hi, hua lai-ah om hi,’ zong a ci thei kei ding uh hi. Bang hang hiam cih leh Pasian gam note sungah b[68] a om hi," ci-in a dawng hi.

²²Tua ciangin a nungzuite kiangah, "Note in Mihing Tapa nite lakah khat na muh nop hun uh hong tung dinga, ahi hangin na mu kei ding uh hi.

²³Mite in note kiangah, ‘Amah hua lai-ah om hi!’ Ahikeh ‘Amah hih lai-ah om hi!’ hong ci ding uh hi. Amaute na nungdelh kei un.

²⁴Ahang in, Mihing Tapa, ama ni-in c[69] khuaphelep in van mong khat pan mong khat dong phia in a tanzal tawh kibang ding hi.

²⁵Ahi hangin amah in na tampi thuak masa-in, hih khang mite in amah a nolh phot ding uh hi.

²⁶"Mihing Tapa hun in, Noah hun lai mah bang ding hi.

²⁷Noah gunkuangpi sungah a lut ni dongin mite in ne-in dawna, mo la mo kha-in a om uh hi. Tui khanga amaute khempeuh a tuum mang hi.

²⁸"Lot hunlai-in zong tua mah bang ahi hi. Mite in ne-in dawna, lei-in zuak-a suanin a lam uh hi.

²⁹Ahi hangin Lot in Sodom a nusiat ni-in vantung panin kaat le meikuang zusuk a, amaute khempeuh a kangtummang uh hi.

³⁰"Mihing Tapa hong kilaak ni ciangin tua bang tektek hi ding hi.

³¹Tua ni-in innkhum tunga omte kuamah inn sunga vante la dingin kumsuk kei hen. Tua mah bangin lo-a omte, na khatpeuh la dingin ciah kik kei hen.

³²Lot’ zi phawk gige un!

³³A nuntakna a hu nuamte in mangsak dinga, a nuntakna a mangsakte in hu ding uh hi.

³⁴Ken kong geninah, tua zanin lupna khatah mi nih lumkhawm dinga; khat kila-in khat kinusia ding hi.

³⁵Numei nih in an gawikhawm dinga; khat kila-in khat kinusia ding hi.

³⁶Lo lai-ah mi nih om dinga; khat kila-in khat kinusia ding hi," d[70] a ci hi.

³⁷Amaute in, "Koi lai-ah maw, Topa?" ci-in a dong uh hi. Amah in, "Mi siluang omna peuhpeuh ah musanete a kikhawm ding uh hi," ci-in a dawng hi.