Read Zokam Luke 18 Bible Online

Luke 18 - Zokam bible

Luke 18

¹Tua ciangin Jesu in a nungzuite, lungkia lo-a thu a nget tawntung nadingun gentehna khat a gen hi.

²Amah in, "Khuapi khatah Pasian kihta lo, mite a awlmawh lo thukhenpa khat om hi.

³Tua khuapi sunga meigongnu khat ama kiangah pai ngitnget a, ‘Ka langpa tungah mantakin thu hong khensak in,’ ci-in ngen hi.

⁴"Amah in tawlkhat sung a nial hi. Ahi hangin a tawpkhakna ah, ‘Pasian nangawn kihta loin mite ka awlmawh loh hangin,

⁵hih meigongnu in hong buaisak den ahi manin, amah hong paipai-a kei hong gimsak ngi-ingei nawn loh nadingin a thu tangtakin khensak ning!’ ci-in ngaihsun hi," a ci hi.

⁶Tua ciangin Topa in, "A thutang lo tua thukhenpa gente ngaihsun dih un.

⁷Pasian in, sun le zana ama kianga kiko, a teelsate adingin thu khensak lo ding ahi hiam? Amaute ngaksaksak ding ahi hiam?

⁸Ken kong geninah amaute thu manlangtakin a khensak ding hi. Ahi zongin Mihing Tapa hong pai ciangin leitungah upna a mu ding hiam?" a ci hi.

⁹Amaute thumaanna kimuanga midangte khempeuh a neumuh pawlkhatte tungah Jesu in gentehna gen a,

¹⁰"Pharisee khat le siahdong khat mi nih thungen dingin biakinnpi ah a pai uh hi.

¹¹Pharisee-pa dingto a, ama thu e[71] amahmah in ngena, ‘Pasian aw, keimah midangte khempeuh - misuamte, a kheltatte, angkawmte tham lo hih siahdongpa bang hi lo ka hi manin na tungah ka lungdam hi.

¹²Nipikal khatin nih vei an tangin ka ngah khempeuh sawm ah khat ka pia hi,’ ci hi.

¹³"Siahdongpa ahileh a gamlapi-ah a ding hi. Amah in vantung lam nangawn ento loin a awm tum-a, ‘Pasian aw, mawhneipa keimah hong lainat in,’ ci hi.

¹⁴"A khat pa sangin hih pa, Pasian mai-ah diktangsa in innah a ciah hi, cih kong gen hi. Ahang in, amah le amah a kitawisangte kiniamsak dinga amah le amah a kiniamsakte a kitawisang ding hi," a ci hi.

¹⁵"Naungekte, Jesu a lawngsak dingin mipite in ama kiangah a paipih uh hi. Nungzuite in a muh uh ciangin amaute a tai uh hi.

¹⁶Ahi hangin Jesu in naupangnote ama kiangah sama, "Naupangnote ka kiangah hong paisak un. Amaute na dal kei un, Pasian gam in hih bangte aa ahi hi.

¹⁷Thutak kong geninah, naupangno banga Pasian gam a sang lo peuhmah tua gam sungah a lut ngei kei ding hi," a ci hi.

¹⁸Ukpa khat in ama kiangah, "A hoih siapa aw, nuntak tawntungna ka luah theih nadingin ka hih pelmawh ding bang ahi hiam?" ci-in a dong hi.

¹⁹Jesu in, "Bang hangin kei hoih hong ci na hi hiam? Pasian bek longal kuamah a hoih a om kei hi.

²⁰Angkawm kei in, tual that kei in, gu kei in, zuau teci pang kei in, na nu na pa pahtawi in, a[72] cih thupiakte na theihsa ahi hi," ci-in a dawng hi.

²¹Tuapa in, "Tuate khempeuh ka neu-a kipan ka zuihsa ahi hi," a ci hi.

²²Jesu in hih thu a zak ciangin ama kiangah, "Na khat na samlai hi. Na neihsa khempeuh zuak inla, mizawngte pia in. Tua hileh vantungah gou na nei ding hi. Tua khit ciangin hong pai-in kei hong zui in," a ci hi.

²³Tuapa in hih thu a zak ciangin hau mahmah ahi manin a lungsi dedu hi.

²⁴Jesu in amah en a, "A haute Pasian gam a lut nading haksa mahmah hi!

²⁵Mihau khat Pasian-gam sungah a lut ding sangin kala-oh khat phimbil vangah a thawl ding a baihzaw takpi ding hi," a ci hi.

²⁶Hih thu a zate in, "Tua hileh hotkhiatna kua in ngah zo peuhmah ding hiam?" a ci uh hi.

²⁷Jesu in "Mihing hih theih lohte Pasian in hih thei hi," ci-in a dawng hi.

²⁸Peter in ama kiangah, "Kote in ka neih khempeuh uh nusia in nang kong zui uh hi!" a ci hi.

²⁹Jesu in amaute kiangah, "Thutak kong geninah, Pasian gam hangin a inn, a zi, a sanggampate, a nu-le-pa le a tate a nusia peuhmah in,

³⁰hih khanghunah a zah tampi ngah in, hong tung ding khanghunah nuntak tawntungna a ngah ding hi," a ci hi.

³¹Jesu in Sawm le nihte paipih tuamin amaute kiangah, "Eite Jerusalem ah i paito dinga, Mihing Tapa thu kamsangte gelhsa khempeuh a tangtung ding hi.

³²Gentile-te khutah amah a piakhia ding uh hi. Tuate in amah zahko-in, engbawlin, cilphih-in, satin that ding uh hi.

³³A ni thumna ni-in a tho kik ding hi," a ci hi.

³⁴Nungzuite in hih thute khat beek a theitel kei uh hi. Amaute tungah a khiatna ki-im lai-a, amah in bang thu gen hiam, cih a thei kei uh hi.

³⁵Jericho ah Jesu a tun kuan ciangin mittaw khat lamgei-ah tu-in khutdawhin a ngen hi.

³⁶Tuapa in mihonpi lam pai a zak ciangin, bang thu piang hiam, cih a dong hi.

³⁷Amaute in ama kiangah, "Nazareth mi Jesu in hong nawk laitak hi," ci-in a gen uh hi.

³⁸Amah in, "David Tapa Jesu aw, kei hong lainat in!" ci-in a galsap hi.

³⁹A madawk mipite in amah tai uh a, daitaka a om nadingin a gen uh hi. Ahi hangin tuapa in, "David Tapa aw, kei hong lainat in," ci-in a kinak ko semsem hi.

⁴⁰Jesu khawl-a ama kiangah tuapa a paipih nadingun thu a pia hi. Tuapa ama kiangah a tun ciangin Jesu in,

⁴¹"Bang kong hihsak ding deih na hi hiam?" ci-in a dong hi. Amah in, "Topa aw, khua ka mu nuam hi," ci-in a dawng hi.

⁴²Jesu in, "Khua mu ta in; na upna in nang hong damsak zo hi," a ci hi.

⁴³Tua khit phetin khua mu pah lian a, Jesu nungzui-in Pasian a phat hi. Mi khempeuh in zong tua thu a muh uh ciangin Pasian a phat uh hi.