Read Zokam Luke 21 Bible Online

Luke 21 - Zokam bible

Luke 21

¹Jesu a khuadak toh leh, sum haute in biakinnpi sumkholna sungah amau sum a khiat uh a mu hi.

²Amah in, a zawng meigongnu khat in a neu mahmah sumsan tang a[82] nih a khiat zong a mu hi.

³Amah in, "Thutak kong geninah, hih a zawng meigongnu in midang khempeuh sangin tam khiazaw hi.

⁴Hih mite khempeuh in a hauhna uh panin khia uh hi; ahi hangin tuanu in a zawnsa pipi-in a ma kivak nading a neih khempeuh a khia hi," a ci hi.

⁵A nungzuite pawlkhat in suang melhoihte le Pasian tunga ki-ap letsongte tawh hoihtaka kizem biakinnpi thu a gen uh hi. Ahi hangin Jesu in,

⁶"Hih laitaka na muhte uh tawh kisai-in suang khat tungah suang dang khat beek kiciang lo a, a vekpi-in a kicipmang kiuhkeuh hun hong tung ding hi," a ci hi.

⁷Amaute in, "Sia aw, hih thute cik cianga piang ding ahi hiam? Hih thute a tun dektakna bang limin kithei ding hiam?" ci-in a dong uh hi.

⁸Amah in, "Note kuamah in hong khem zawh loh nadingin na kigalging un. Ahang in, keima minin mi tampi hong pai ding uh a, ‘Amah ka hi hi. Hun hong nai ta hi,’ hong ci tangtang ding uh hi. Amaute na zui kei un.

⁹Gal thu le kumpi lumletna thu na zak uh ciangin na linglawng kei un. Hih thute a piang masa pelmawh ding mah hi-a ahi hangin a beina a tungpah nai kei ding hi," ci-in a dawng hi.

¹⁰Tua ciangin amah in amaute kiangah, "Minam khat le minam khat kido dinga, gam khat le gam khat a kido ding uh hi.

¹¹Mun tuamtuam ah zin nakpi in ling dinga, kialpi le pul tungin vantung panin a kihtakhuai thupiangte le lim lianpite hong om ding hi.

¹²"Ahi hangin hihte a pian ma-in amaute in note tungah a khut uh hong nga-in hong bawlsia ding uh hi. Keima min hangin amaute in note synagogue-te le thongte ah hong tun ding uh a, kumpite le gam-ukte mai-ah hong paipih ding uh hi.

¹³Hih in amaute tunga teci pang na suah nading uh ahi hi.

¹⁴Ahi hangin no le no na kihut zia ding uh ama in na lunghimawh loh nadingun lungsim khentatsa-in om un.

¹⁵Ahang in, na langte un note hong nan zawh loh nadingun thute le pilna kong pia ding hi.

¹⁶Na nu-le-pate, na sanggamte, na tanaute le na lawmte un note hong lehhek ding uh a, pawlkhat hong that ding uh hi.

¹⁷Keima hangin mi khempeuh in note hong mudah ding uh hi.

¹⁸Ahi hangin na samzang khat nangawn uh a mang thang kei ding hi.

¹⁹Kiptaka dinna tawh nuntakna na ngah ding uh hi.

²⁰"Galkap honpi in Jerusalem a umcih na muh uh ciangin a hawmmang nading nai ta hi, cih na thei ding uh hi.

²¹Tua ciangin Judea gama omte mual tungah tai uh hen; tua khuapi sunga omte taikhia uh henla, gamsunga omte tua khuapi ah lut kei uh hen.

²²Tua in, a kigelhsa khempeuh a tangtun nadingin gawtna hun ahi hi.

²³Tua nite, nau paiite le naungek nei nupite adingin mulkimhuai lua ding hi! Tua gam sung tengah lungdonna lianpi le hih mite tungah thangpaihna lianpi a tung ding hi.

²⁴Amaute namsau in puk ding uh a, minamte khempeuh thongkiate bangin a kai ding uh hi. Gentile-te hunte a tangtun kim khit matengin Gentile-te in Jerusalem a tuancil ngi-ingei ding uh hi.

²⁵"Ni, kha le aksite sungah limte hong om ding hi. Tuipi kilok le tuihual hawkte hangin leitunga minamte lunggimin a cimawh ding uh hi.

²⁶Van a nate khempeuh kiling dinga, leitunga piang dingte kihta kholin lau lua-in mite a sibup ding uh hi.

²⁷Tua laitakin vanglianpi le minthanna tawh meii laka hong paisuk Mihing Tapa amaute in a mu ding uh hi.

²⁸Hih nate tun a kipat ciangin note tatkhiatna nai ta ahi manin ding to unla khuadak khia un," a ci hi.

²⁹Amah in amaute kiangah hih gentehna gena: "Theikung le singkung dangte khempeuh na en un.

³⁰A tehte a sel ciangin khuakhal hun nai ta hi, cih na thei uh hi.

³¹Tua mah bangin hih nate a pian na muh uh ciangin Pasian gam hong nai ta hi, cih na thei un.

³²"Thutak kong geninah, hih thute khempeuh a tun khit mateng hih khang mite b[83] a bei peuhmah kei ding hi.

³³Van le lei a mangthang ding hi; ahi hangin ka thute a mangthang ngei kei ding hi.

³⁴"Note pilvang un, tua hi keileh na lungsimte uh lalthangin zukhamna le nuntak nading lunghimawh nate in hong thazawhgawp dinga tua ciangin na upmawh loh laitak un tua ni, thang kisai bangin no tungah hong tung ding hi.

³⁵Leitung bupa tengte khempeuh tungah tua ni a tung ding ahi hi.

³⁶Note na kigalging gige un. Thupiang dingte khempeuh pana na suahtak nading uh le Mihing Tapa mai-a na din theih nadingun thu na ngen un," a ci hi.

³⁷Jesu in biakinnpi ah nisimin thu hilh a, Olive Vum ah giak dingin nitak sialin a paikhia hi.

³⁸Ama thugen ngai dingin zingsang tungin mi khempeuh biakinnpi ah a pai uh hi.