Read Zokam Luke 24 Bible Online

Luke 24 - Zokam bible

Luke 24

¹Nipikal ni masa pen ni, zingsang phalvak tungin tua numeite amau bawlkholhsa gimnamtuite kengin hanah a hawh uh hi.

²Amaute in tua han pana suangtum kilikkhiasa a mu uh hi.

³Ahi hangin a sungah a lut uh leh Topa Jesu luang a mu kei uh hi.

⁴Hih thu ah amaute lungmangin a om laitakun, a puante uh khuaphialep banga tee zalzal pasal nih a gei uah thakhatin a ding hi.

⁵Tua numeite lau lua mahmah uh ahi manin kunsukin amai uh lei-ah a phum uh hi. Ahi hangin tua mite in amaute kiangah, "Note in bang hangin misite lakah mihing zong na hi uh hiam?

⁶Amah hih lai-ah om lo hi; amah tho kik zo hi! Amah note tawh Galilee gama a om lai-in note kiangah,

⁷‘Mihing Tapa mawhnei mite khut sungah kipia dinga, kikilhlumin a ni thumna ni-in kithokiksak ding hi,’ ci-a hong gen phawk gige un," a ci uh hi.

⁸Tua ciangin ama thugente a phawk kik uh hi.

⁹Amaute han pan a ciah kik uh ciangin hih thute khempeuh, Sawm-le-khatte le adangte khempeuh a hilh uh hi.

¹⁰Sawltakpite kiangah hih thu a gente: Mary Magdalene, Joanna, James nu Mary le amaute tawh a omkhawm midangte ahi uh hi.

¹¹Ahi hangin amaute in tua numeite thugente uptak lo sa uh ahi manin a um kei uh hi.

¹²Ahi zongin Peter ding to-in hanah a tai hi. Amah kunsukin a et leh, saihadial puan bek a mu hi. Tua ciangin amah in tua thupiang-sate lamdang sa in a ciah kik hi.

¹³Tua ni mah in amaute lakah nih, Jerusalem panin tai sagih a[95] bang a gamlatna Emmaus kici khua neu ah a pai uh hi.

¹⁴Amaute gel in tua thupiangsa khempeuh a kikum uh hi.

¹⁵Hih thute kikumin a paupau laitakun Jesu mahmah paito in amaute tawh a tonkhawm hi.

¹⁶Ahi hangin amaute lakah amah a kitheisak kei hi.

¹⁷Amah in amaute kiangah, "Na pai kawmkawmun bang kikum na hi ua?" ci-in a dong hi. Amaute mai mialin a dinkhawl uh hi.

¹⁸Amaute khat Cleopas min nei pen in, "Jerusalem a hawhte lakah tua lai-a tusawng tenga thupiangte a thei lo nang bek hi niteh maw?" a ci hi.

¹⁹Amah in, "Bang piang a hia?" ci-in a dong hi. Amaute in, "Nazareth mi Jesu thu ahi hi. Amah kamsang khat hi-a Pasian mai le mi khempeuh mai-a, a pauna le a tatnate ah vang a nei hi.

²⁰I siampi makaite le ukpate in amah a si dingin thu khen uh a, kilhlum uh hi;

²¹ahi hangin kote in Israel-te tankhia ding pa amah hi dinga ka lamet uh ahi hi. Tua tham loin hih thu a pian zawh a ni thumna hi ta hi.

²²Tua banah ka numeite uh pawlkhat in lamdang hong sasak mahmah uh hi. Tuni zingsang tungin amaute hanah va hawh uh a,

²³ahi hangin ama luang a mu kei uh hi. Amaute hong ciah kik uh a, amah nungta hi, ci-a amau tunga gen van sawltakte a muhna thu hong gen uh hi.

²⁴Tua ciangin ka pawlte uh kimkhat han ah va pai uh a, numeite gen bang tektek in mu uh hi; amah va mu lo takpi uh hi," ci-in a dawng kik uh hi.

²⁵Amah in amaute kiangah, "Hai na lawmlawm uh cia! Kamsangte gen sate khempeuh uphak sa si uh cia!

²⁶Christ b[96] in hihte khempeuh a thuak masak kul phot-a, tua khit ciangin ama minthanna sunga lut pan ding hi lo ahi hiam?" a ci hi.

²⁷Tua ciangin Moses a kipan Kamsangte khempeuh in amah tawh kisai-in Laisiangtho sunga a gensa khempeuh amah in amaute tungah a hilhcian hi.

²⁸Amaute a pai nading uh tua khuaneu a zuat laitakun Jesu a paisuak lai ding bangin a kineih hi.

²⁹Ahi hangin amaute in, "Ni kai lua ta-a, ni tum phial ta ahi ciangin ko kiangah hong tam in," ci-in amah a kun uh hi. Tua ahi ciangin amah pai-in amaute kiangah a tam hi.

³⁰Amah in amaute tawh ankuang a um khawm ciangin, anlum la-a, lungdam ko-in, balkham a, amaute a pia hi.

³¹Tua ciangin amaute a mit uh kihonga amah a theician uh hi; tua ciangin amau muhna panin amah a mang hi.

³²Amaute in, "Amah tawh lampi ah tonkhawmin, kiho-a, Laisiangtho hong hilh laitakin i lung hong lawng hi lo ahi hiam?" ci-in khat le khat a kidong uh hi.

³³Amaute ding khia uh a thakhatin Jerusalem ah a kilehkik uh hi. Amaute in tua lai-a Sawm-le-khatte le amau tawh a om, a na kikhawm khawmte in,

³⁴"Hi takpi! Topa tho kik zo a Simon kiangah kilang hi," ci-in a gen laitak uh a tuak uh hi.

³⁵Tua ciangin tuate gel in lampi a thupiangte le Jesu in anlum a balkhap laitaka a meel a theihcian patna uh thute a gen uh hi.

³⁶Hih thu a gengen laitakun amaute laizangah Jesu mahmah va dinga, amaute kiangah, "Note tungah lemna om ta hen," a ci hi.

³⁷Amaute sikha mu kisa uh a kigaihin a lau mahmah uh hi.

³⁸Amah in amaute kiangah, "Bang hangin note lungmang in lungka na hi uh hiam?

³⁹Ka khutte le ka khepekte en un. Kei mahmah hi buang ing! Hong lawng unla en un; sikha in tu-a na muh uh kei neih bangin satak le guh a nei kei hi," a ci hi.

⁴⁰Amah in hih teng a cih khit ciangin a khutte le a khepekte amau a lak hi.

⁴¹Amaute lungdamin lamdang sa lua uh ahi manin a up nai loh lailai uh ciangin, "Hih lai-ah nek theih ding khatpeuh na nei uh hiam?" ci-in a dong hi.

⁴²Amaute in amah ngasa haikeu khat a piak uh leh

⁴³la-a amaute muh in a ne hi.

⁴⁴Amah in amaute kiangah, "Hih in note tawh ka omkhawm lai-a ka gen: Kei thu, Moses Thukham, Kamsangte le Phatna-late sunga kigelhte khempeuh a tangtung pelmawh ding hi, ka cih hih thu ahi hi," a ci hi.

⁴⁵Tua ciangin amaute lungsim amah in honsaka, amaute in Laisiangtho a theitel uh hi.

⁴⁶Amah in amaute kiangah, "A kigelhsa thu hih bang ahi hi: Christ in thuak dinga a ni thumna ni-in misi pan tho in,

⁴⁷Jerusalem pan kipankhia in, ama minin minamte khempeuh tungah kisikna le mawh maisakna thu a kihilh ding hi.

⁴⁸Hih thute ah note teci na hi uh hi.

⁴⁹Keimah in ka Pa hong kamciamsa, note tungah kong sawl ding hi; ahi hangin asangna pana vangliatna note hong kisilhsak matengin tua khuapi ah na om tadih un," ci-in a gen hi.

⁵⁰Amah in amaute Bethany kimnai-ah pai khiatpih-a, a khut lamto in amaute thupha a pia hi.

⁵¹Amah in amaute thupha a piak laitakin amaute nusia in amah vantungah kila to hi.

⁵²Tua ciangin amaute in amah bia uh a, lungdam mahmah in Jerusalem ah a ciah uh hi.

⁵³Tua ciangin amaute, Pasian phatin biakinnpi ah a om suaksuak uh hi.