Read Zokam Luke 3 Bible Online

Luke 3 - Zokam bible

Luke 3

¹Pontius Pilate, Judea gam ukpipa hi-a, Herod, Galilee gam ukpa hi-in, a sanggampa Philip, Iturea le Traconitis gam ukpa hi-a, Lysanias, Abilene gam ukpa ahi laitak- Tiberius Caesar in a uk zawh a kum sawm le ngana ahi hi.

²Tua hunin Anna le Caiaphas tulpi sem hi uh a, tua hunlaitakin gamlaka om Zechariah tapa John tungah Pasian thu a tung hi.

³Amah Jordan kimkot-a gamsung khua khempeuh ah pai-a, mawhnate maisak nading kisikna tawh kisai baptisena thu a hilh hi.

⁴Kamsangpa Isaiah thute laibu sungah: "Gamlak-a kikopa aw in, ‘Topa ading lampi na sialkhol un, ama ading lampi na tangsak un.

⁵Mualkuam khempeuh kivuk dim dinga, muallian le mualneu khempeuh kiniamsak ding hi. Lamkawi khempeuh kitangsak dinga, lamphok khempeuh kimaihtam ding hi.

⁶Tua ciangin mi vannuai in Pasian hotkhiatna a mu ding uh hi.’ ci hi" c[10] ci-a kigelh bang ahi hi.

⁷Amah kibaptisesak dinga pai mihonte John in a muh ciangin, "No mualtan suante! Hong tung ding thangpaihna pana taikhia dingin kua in hong vauhilh ahi hiam?

⁸Kisikna tawh kilawm gah na gah un. No le no in, ‘Abraham ka pa uh hi,’ kici kei un. Ahang in, Pasian in hih suangte Abraham tate a suaksak thei hi, cih kong hilh hi.

⁹Sing phungte ah hei a om khin zo hi; gah hoih a gah lo kungte kiphukin mei sungah kikhul ding hi," a ci hi.

¹⁰Mihonpite in, "Tua ahileh bang ka hih ding uh hiam?" ci-in a dong uh hi.

¹¹John in, "Puantungsilh nih a neithuah pa in, a nei lo pa khen dinga, tua mah bangin an nei pa in zong a hih ding hi," ci-in a dawng hi.

¹²Siahdongte zong a kibaptise dingin va pai uh a, "Sia aw, bang hih ding ka hi uh hiam?" ci-in a dong uh hi.

¹³Amah in amaute kiangah, "Na don ding zah val uh na dong kei un," ci-in a gen hi.

¹⁴Tua ciangin galkap pawlkhat va pai uh a, "Ko zong bang ka hih ding uh hiam?" ci-in amah a dong uh hi. Amah in, "Mi sum na gumsuh kei unla, zuauthu tawh mi na mawk ngawh kei un. Na khasum uh tawh lungkim lel un," ci-in a dawng hi.

¹⁵Mite in John hoh Christ a[11] a hi kha tam ci-a a lungtang sunguah ngaihsun kakkakin, a ngak laitak uh ahi hi.

¹⁶John in amaute khempeuh kiangah, "Keimah in note tui in b[12] kong baptize hi. Ahi hangin kei sanga a vanglian zaw khat hong pai ding hi; ama khedap khaute sut ding nangawnin ka cin zo kei hi. Amah in note Khasiangtho le mei-in hong baptize ding hi.

¹⁷Amah in a buhah ciangka tawi-in buhphual a hahsiang ding hi. Atak teng a sal sungah koih dinga, a sii teng ahileh a mit thei lo mei sungah a khul ding hi," ci-in a hilh hi.

¹⁸John in mipite thudang tampi tawh hanthawna, amaute kiangah lungdamna-thu a hilh hi.

¹⁹Ahi hangin John in, gam-ukpa Herod tatsiatna khempeuh le a sanggampa zi Herodias hangin amah a tai ciangin,

²⁰Herod in ama tatsiatnasa teng a behlapna in thong sungah John a khum hi.

²¹Mi khempeuh a kibaptise uh ciangin Jesu zong a kibaptise hi. Tua ci-a thu a nget laitakin van kihong a,

²²vakhu bangin Khasiangtho pumpi nei in ama tungah a kumsuk hi. Tua ciangin vantung pan aw khat in, "Nang ka it ka Tapa na hi hi; nang tungah ka lungkim mahmah hi," a ci hi.

²³Jesu thuhilh nasep a kipatin kum sawmthum bang a pha hi. A kingaihsutna ah amah Joseph tapa hi-a, Heli tapa Joseph,

²⁴Matthat tapa Heli, Levi tapa Matthat, Melki tapa Levi, Jannai tapa Melki, Joseph tapa Jannai

²⁵Mattathias tapa Joseph, Amos tapa Mattathias, Nahum tapa Amos, Esli tapa Nahum, Naggai tapa Esli,

²⁶Maath tapa Nagai, Mattathias tapa Maath, Semein Tapa Matathia, Josech tapa Semein, Joda tapa Josech,

²⁷Joanan tapa Joda, Rhesa tapa Joanan, Zerubbabel tapa Rhesa, Shealtiel Tapa Zerubabel, Neri tapa Shealtiel,

²⁸Melki tapa Neri, Addi tapa Melki, Cosam tapa Adi, Elmadam tapa Cosam, Er tapa Elmadam,

²⁹Joshua tapa Er, Eliezer tapa Joshua, Jorim tapa Eliezer,Matthat tapa Jorim, Levi tapa Matthat,

³⁰Simeon tapa Levi, Judah tapa Simeon, Joseph tapa Judah, Jotham tapa Joseph, Eliakim tapa Jonam,

³¹Melea tapa Eliakim, Menna tapa Melea, Mattatha tapa Menna, Nathan tapa Mattatha, David tapa Nathan,

³²Jesse tapa David, Obed tapa Jesse, Boaz tapa Obed, Salmon c[13] tapa Boaz, Nahshon tapa Salmon,

³³Amminadab tapa Nahshon, Ram d[14] tapa Aminadab, Hezron tapa Ram, Perez tapa Hezron, Judah tapa Perez,

³⁴Jacob tapa Judah, Isaac tapa Jacob,Abraham tapa Isaac, Terah tapa Abraham, Nahor tapa Terah,

³⁵Serug tapa Nahor, Reu tapa Serug, Peleg tapa Reu, Eber tapa Peleg, Shelah tapa Eber,

³⁶Cainan tapa Shelah, Arphaxad tapa Kainan, Shem tapa Arphaxad, Noah tapa Shem, Lamech tapa Noah,

³⁷Methuselah tapa Lamech, Enoch tapa Methuselah, Jared tapa Enoch, Mahalalel tapa Jared, Cainan tapa Mahalalel,

³⁸Enosh tapa Cainan, Seth tapa Enos, Adam tapa Seth. Pasian tapa Adam.