Read Zokam Luke 4 Bible Online

Luke 4 - Zokam bible

Luke 4

¹Jesu Khasiangtho tawh kidimin, Jordan panin ciah kika Kha in amah gamlakah a pi hi.

²Tua lai-ah dawimangpa in ni sawmli sung a zia-et hi. Tua hun sungin amah in bangmah ne lo a, tua nite a bei khit ciangin a gil kial hi.

³Dawimangpa in ama kiangah, "Nang Pasian Tapa na hileh hih suang, anlum suaksak in," a ci hi.

⁴Jesu in, "‘Mihingte anlum bekin nungta lo hi,’ e[15] ci-in kigelh hi." ci-in a dawng hi.

⁵Dawimangpa in munsang khatah amah paipih a, leitunga om kumpi gamte khempeuh thakhatin a lak hi.

⁶Ama kiangah, "Thuneihna le a thupina teng khempeuh kei hong kipia zo hi. Ka piak nop peuh pia thei ka hi manin nang kong pia ding hi.

⁷Tua ahi ciangin kei hong bia peuh lecin a vekin nang aa hi ding hi," a ci hi.

⁸Jesu in, "‘Na Topa Pasian bia inla ama na bek sem in,’ f[16] ci-in kigelh hi," ci-in a dawng hi.

⁹Dawimangpa in amah Jerusalem ah paipih a biakinnpi khum dawnah a dingsak hi. Amah in, "Nang Pasian Tapa na hileh hih lai panin tuaksuk in.

¹⁰Bang hang hiam cih leh: " ‘Nang tawh kisai-in limtaka nang hong cing dingin amah in a vansawltakte thu pia ding hi:

¹¹na khepek suang tawh na tahkhak loh nadingin, amaute in a khut uh tawh nang hong domto ding uh hi,’ g[17] ci-in kigelh hi," a ci hi.

¹²Jesu in, "‘Na Topa Pasian na zia-et kei in,’ h[18] ci hi," ci-in a dawng hi.

¹³Dawimangpa in hih zia-etna teng khempeuh a man khit ciangin hun hoih a om kik mateng amah a nusia hi.

¹⁴Jesu, Kha vangliatna tawh Galilee ah ciah kika, ama thu gamsung khua khempeuh ah a kizel hi.

¹⁵Amaute synagogue-te sungah thu hilh a, mikim in amah a phat uh hi.

¹⁶Amah a khanna khua Nazareth ah pai-a, ama ngeina bangin Sabbath ni-in synagogue ah a pai hi. Amah laisim dingin a dingto hi.

¹⁷Kamsangpa Isaiah laizial amah kipia hi. Amah in tua laizial a phel leh:

¹⁸"Mizawngte tunga lungdamna-thu hilh dingin keimah sathau hong nilh khin zo ahi manin, Topa Kha ka tungah a om hi. Amah in thongkiate suaktasak ding, mittawte khua musak ding, a kinengcipte khahkhia ding,

¹⁹Topa angvanna kum a tangko dingin, kei hong sawl zo hi," a[19] ci-a kigelhna mun a mu hi.

²⁰A sim khit ciangin laizial zialin sawltakpa pia-in a tu hi. Jew-te synagogue sunga om mi khempeuh in amah mitkhah loin a en uh hi.

²¹Tua ciangin amah in amaute kiangah, "Tuni-in hih Laisiangtho note zakin a tangtung hi," a ci hi.

²²Mi khempeuh in amah phatgen in a kam pana kamngaihte lamdang sa mahmah uh a, "Hih pa Joseph tapa hi lo ahi hiam?" ci-in a dong uh hi.

²³Jesu in amaute kiangah, "‘Zato mangpa aw, nang le nang kidamsak in! Na khankhiatna Capernaum a na hih ka zakte uh hih lai-ah zong hong hih dih in,’ ci-in hih paunak tawh nong bulh tektek ding uh hi," a ci hi.

²⁴Amah in, "Thutak kong geninah, ama khua-a kisang kamsang khat beek a om kei hi.

²⁵Elijah hun lai-in kum thum le kum lang sung van kikhak-a, gamsung khempeuh ah a nasia mahmah kialpi a tun laitakin Israel gamah meigong tampi om hi, cih mantakin kong gen hi.

²⁶Tua hi napi Sidon kual Zarephath a meigongnu kiang longal adangte kiangah Elijah a kisawl kei hi.

²⁷Kamsangpa Elisha hun lai-in zong Israel gamah phak b[20] natna a vei tampi a om hi. Tua hi napi Syria mi Naaman bek longal adang khat beek a kisiangsak kei hi," ci-in a gen a zom lai hi.

²⁸Synagogue sunga om mite khempeuh in hih thu a zak uh ciangin a lungham uh hi.

²⁹Amaute dingkhia in, khuapi pua-ah amah hawlkhia uh a, kenah khiatsuk dingin tua khuapi kiphuhna mualdawn kil ah amah a paipih uh hi.

³⁰Ahi hangin amah mihonpite kawmlak tawnin a gelkhia hi.

³¹Tua ciangin Galilee gam khuapi khat, Capernaum ah paisukin Sabbath ni-in mite kiangah thu a hilh hi.

³²Ama thuhilhna lamdang a sa mahmah uh hi; bang hang hiam cih leh a thuhilhna in thuneihna a nei hi.

³³Synagogue sungah kha gilo c[21] lut mi khat a om hi. Tuapa in a aw neihzah in,

³⁴"Ehei! Nazareth mi Jesu aw, kote bang hong cih nuam na hi hiam? Kote susia dingin hong pai na hi hiam? Nang kua na hi hiam, cih kong thei hi - Pasian’ Mi Siangtho na hi hi!" ci-in a kiko hi.

³⁵Jesu in khauhtakin, "Pau kei in! Ama sung pan paikhia in," ci-in a sawl hi. Tua ciangin dawi in amaute khempeuh mai-ah tuapa a puksak khit ciangin amah liamsak loin a paikhia hi.

³⁶Mi khempeuh in lamdang sa mahmah uh a, "Hih thuhilhna bang ahi hiam? Thuneihna le vang tawh kha gilote thu a piak ciangin paikhia mawk uh hi!" khat le khat a kici uh hi.

³⁷Tua ciangin tua kuam kimkot tengah ama thu a kizel hi.

³⁸Synagogue panin Jesu paikhia a, Simon innah a hawh hi. Tua laitakin Simon sungnu nattun gim mahmah a, Jesu in amah a huh nading amaute in a ngen uh hi.

³⁹Tua ahi ciangin tuanu tungah kun a, nattun natna a tai leh a natna in amah nusiapah hi. Amah tho in amaute a zindo hi.

⁴⁰Nitum ciangin mipite in, natna tuamtuam a neite Jesu kiangah va paipih uh a, amah in amaute tungah khut nga kimin a damsak hi.

⁴¹Tua tham loin mi tampite sung pan dawite paikhai a, "Nang Pasian Tapa na hi hi!" ci-in a kiko uh hi. Ahi hangin amah in amaute a tai hi. Tua dawite in amah Christ d[22] hi, cih thei uh ahi manin amaute pau ding Jesu in a phal kei hi.

⁴²Khuavak ciangin Jesu gamdaihna munah a pai hi. Mite in amah zong uh a, ama omna munah a tun uh ciangin amaute nusia lo dingin a kho uh hi.

⁴³Ahi hangin amah in, "Pasian gam lungdamna thu hilh dingin kei hong kisawl ahi manin khua dangte ah zong ka hilh pelmawh ding hi," a ci hi.

⁴⁴Tua hi-a, amah in Judea e[23] gam synagogue-te sungah thu a hilhhilh hi.