Read Zokam Luke 5 Bible Online

Luke 5 - Zokam bible

Luke 5

¹Ni khat Gennesaret f[24] tuilipi gei-ah Jesu a din laitakin a kimah mihonpi va kikhawmin Pasian thu a ngai uh hi.

²Tua laitakin a lente uh a sawp ngabengte in tuili monga a nusiat uh gunkuang nih amah in a mu hi.

³Simon’ gunkuang tungah amah kahto in sehtak pan tawm a khinphei dingun a gen hi. Tua ciangin amah tu-a, gunkuang panin thu a hilh hi.

⁴A thu hilh a man khit ciangin Simon kiangah, "Tui thuk lamah hot phei inla na lente khiasuk g[25] in," a ci hi.

⁵Simon in, "Topa aw, zan thapai-in khuhkhuh napi bangmah ka man kei uh hi. Ahi zongin nang cih ahi manin len ka khiasuk ding hi," a ci hi.

⁶Amaute in tua banga a hih uh ciangin ngasa tam awk lua ahi manin a lente uh a kikek dektak hi.

⁷Tua ciangin gunkuang khat pen-a om a lawmte uh pai-in amau huh dingun a khutvan uh hi. Tua ciangin amaute pai uh a gunkuangte gel sungah a koih uh ciangin dim lua ahi manin a tum dektak hi.

⁸Simon Peter in hih a muh ciangin Jesu mai takah bokin, "Topa aw, kei kiang pan paikhia in; mawhdim mi ka hi hi!" a ci hi.

⁹Ahang in, ngasa tua zahta a mat uh amah le a pawlte khempeuh in lamdang a sa uh hi.

¹⁰Zebedee tate James le John-te, Simon lawmte in zong lamdang a sa uh hi. Tua ciangin Jesu in Simon kiangah, "Lau kei in; tu-a kipan mihing na man ding hi," a ci hi.

¹¹Tua ciangin amaute in a gunkuangte uh tuigei-ah kaito uh a, na khempeuh nusia in amah a zui uh hi.

¹²Khuapite khatah Jesu a om laitakin phak a[26] natna in a pumtuam mi khat va pai hi. Tuapa in Jesu a muh ciangin leitualah khupbawh in, "Topa aw, ut peuh lecin nong siangsak thei hi," ci-in a thum hi.

¹³Jesu in a khut zanin tuapa lawng a, "Ka ut hi, siang ta in!" a ci hi. Tua khit phetin phak natna in amah a nusia pah hi.

¹⁴Tua ciangin Jesu in ama kiangah, "Kuama kiangah gen kei in, ahi hangin pai-in siampipa kiangah va kilak inla, amaute tungah teci panna in Moses in na sian nadinga hong thupiak na biakpiakna va pia in," ci-in thu a pia hi.

¹⁵Tua hi napi ama thu kizel semsem a, ama thugen ngai ding le a natnate uh a damsak ding deihin mihonpite a va pai uh hi.

¹⁶Ahi hangin gamdaihna munte ah Jesu kihemkhia zelin thu a ngen hi.

¹⁷Ni khat Jesu in thu a hilh laitakin Galilee gam khuaneu khempeuh pan, Judea le Jerusalem pana pai Pharisee-te le thukham siate tua lai-ah a tu uh hi. Cinate a damsak nading Topa vangliatna ama adingin a om hi.

¹⁸Mi pawlkhat in pumzaw khat phek tawh zawngin va paipih uh a, inn sungah tumpih in Jesu mai-a ngak ding a hanciam uh hi.

¹⁹Mihonpite hangin Jesu kiang a tut theih nading uh lampi a muh theih loh uh ciangin innkhumah kahto in leisekpekte phelkhia uh a, mihonpite laizang, Jesu mai santakah a phekin a khai suk uh hi.

²⁰Jesu in amaute upna a muh ciangin, "Lawm aw, na mawhna kimaisak zo hi," a ci hi.

²¹Pharisee-te le thukham siate in, "Pasian a gendai hih mipa kua ahi hiam? Pasian longal kua in mawhna maisak thei ahi hiam?" ci-in a ngaihsun uh hi.

²²Jesu in amaute ngaihsutna thei a, "Note in bang hangin na lungsim uhah hih thute ngaihsun na hi uh hiam?

²³‘Na mawhnate kimaisak zo hi,’ cih ding le ‘Tho inla pai in,’ cih ding koi baihzaw hiam?

²⁴Ahi hangin Mihing Tapa in hih leitungah mawh maisak theih nading thu nei hi, cih na theih nadingun...," a cih khit ciangin pumzawpa kiangah, "Tho-in, na phek la inla, innah ciah in, kong ci hi," a ci hi.

²⁵Tua khit phetin amah amaute mai-ah dingto pah a, ama kizawnna a lak khit ciangin innah ciah a Pasian a phat hi.

²⁶Mi khempeuh in lamdang sa mahmah uh a Pasian a phat uh hi. Amaute in piandang sa lua mahmah uh a, "Tuni-in a ciamtehtak thute i mu zo hi," a ci uh hi.

²⁷Tua khit ciangin Jesu a paikhiat leh siahdonna bukno-a tu Levi min nei siahdongpa khat a mu hi. Jesu in ama kiangah, "Kei hong zui in," a cih ciangin

²⁸Levi dingto a na khempeuh nusia in amah a zui hi.

²⁹Tua ciangin Levi in a innah Jesu ading anvakna pawi khat a bawl hi. Siahdongte hon tampi le midang tampi in amaute tawh an a nekhawm uh hi.

³⁰Ahi hangin Pharisee-te le amau pawlmi thukham siate in a nungzuite kiangah, "Bang hangin note in siahdongte le ‘mawhneite’ tawh nekhawm dawnkhawm na hi uh hiam?" ci-in a phunsan uh hi.

³¹Jesu in amaute kiangah, "Cinate siavuan kisam uh a, cidamte kisam lo uh hi.

³²Thumaante sam dinga hong pai hi loin, mawhneite kisiksak dinga hong pai ka hi hi," a ci hi.

³³Amaute in ama kiangah, "John nungzuite le Pharisee-te nungzuite in an a tan zelzel uh hangin nang nungzuite in a nene a dawndawn uh hi," a ci uh hi.

³⁴Jesu in, "Zineipa tawh a omkhawm kimlai a lenglate in bangci-in an tang thei ding uh ahi hiam?

³⁵Ahi hangin zineipa amaute kiang pan a kilakkhiat hun hong tung ding hi. Tua ni ciangin amaute in an tang ding uh hi," ci-in a dawng hi.

³⁶Amah in amaute kiangah gentehna gen a: "Kuamah in puanthak eukhia in puanlui a thuap kei hi. Tua bangin kihih leh puan thak kimlai eukhia dinga tua puanthak bek le a lui a kituak kei ding hi.

³⁷Savun-um lui sungah lenggahzu thak kuamah in thun ngei lo hi. Tua bangin kithun leh savun-um kitamin lenggahzu bua dinga savun-um kisia ding hi.

³⁸Tua bang hizaw loin savun-um thak sungah lenggahzu thak kithun pelmawh zaw ding hi.

³⁹Tua ciangin lenggahzu kumlui a dawnsa peuhmah in ‘A kumlui mah geii zaw’ sa uh ahi manin lenggahzu thak a deih zaw kei uh hi," a ci hi.