Read Zokam Luke 8 Bible Online

Luke 8 - Zokam bible

Luke 8

¹Tua khit ciangin Jesu khuapi le khuaneute ah zin kawikawi-a, Pasian gam tawh kisai lungdamna thu a tangko hi. Tua Sawm-le-nihte ama kiangah om uh a,

²kha gilo le a natnate uh a damsak numei pawlkhat zong a om uh hi: A sung pana dawi sagih a paikhiatna nu Mary (Magdalene kici);

³Herod inn sunga sungtapipa Chuza zi Joanna, Susanna, le adang tampi tawh a om uh hi. Hih numeite in amau neih bangbang tawh amaute a panpih uh hi.

⁴Khuapite panin Jesu kiangah mipite pai uh a, mihon tampi a kihonkhop laitakin amah in hih gentehna na gen a,

⁵"Lokhopa khat ama khaici vawh dingin kuankhia hi. Khaici a theh ciangin pawlkhat lamdungah tu-a kituancilin vana vasate in nemang uh hi.

⁶Pawlkhatte suang tungah tu-a a po khiat ciangin a nom om lo ahi manin ankungte a keugaw hi.

⁷Adang pawlkhatte linglakah tu-a, lingkung tawh khangkhawmin lingkung in depgawp hi.

⁸Adang pawlkhatte leuleu lei hoihna ah a tu hi. Tuate poto in a kivawh sangin azah zakhat-a tamzaw gah a gah hi," a ci hi. Hih thu a gen khit ciangin, "Zak nading bil nei peuh in za ta hen," ci-in a kiko hi.

⁹A nungzuite in hih gentehna a khiatna a dong uh hi.

¹⁰Amah in, Pasian-gam thusimte theih theihna note hong kipiak hangin, "amaute in mumu napi a muhtel theih loh, zaza napi in a theihtel theih loh,’ c[32] nadingin midangte tungah gentehnate zangin ka gen hi.

¹¹"Hih gentehna a khiatna: Khaici pen Pasian thu ahi hi.

¹²Lam dunga tute, thu za-a, ahi hangin uma hotkhiatna a ngah loh nadingin dawimangpa va pai-in amau lungsim panin Pasian thu a lakkhiatte ahi hi.

¹³Suang tunga tute, Pasian thu a zak uh ciangin lungdamin a san uh hangin zungkha lote ahi uh hi. Amaute in tomkha sung um uh a zia-etna a thuak uh ciangin a pukmangte ahi hi.

¹⁴Ling laka tu khaicite, Pasian thu a zak uh hangin a nuntakna uhah nuntak nading lunghimawhnate, hauhnate le nopsaknate in depgawp-a, a picing lote cihna ahi hi.

¹⁵Ahi hangin lei hoihna-a tu khaicite ahileh lungsim picing le lungsim hoih nei in Pasian thu za-in kem dena, thuak keikai-in gah a gahkhiate cihna ahi hi.

¹⁶"Kuamah in mei a vak khit ciangin bel sung ahi zongin lupna nuai ahi zongin a sel kei hi. Tua sangsikin inn sunga om khempeuh in khua a muh theih nadingin meivak tunna tungah tungzaw hi.

¹⁷Ahang in, a kigenkhia lo ding a ki-imcip khat beek om lo-a, a kitheikhawk lo ding le a langtanga kipholak lo ding a kiselcip khat beek a om kei hi.

¹⁸Tua ahi manin thu bangci ngaih na hi uh hiam, limtakin ngaihsun un. A nei peuhmah kipia beh ding hi; a nei lo peuhmah ama neihsa-a a ngaihsutte nangawn kilaksak ding hi," a ci hi.

¹⁹Tua laitakin amah tawh kimu nuamin Jesu nu le a sanggamte a pai uh hi; ahi hangin mihonpite hangin ama kiangah a pai thei kei uh hi.

²⁰Mi khat in, "Na nu le na sanggamte, nang hong mu nuamin innpua ah ding uh hi," a ci hi.

²¹Amah in, "Pasian thu za a, a zuite ka nu le ka sanggamte ahi hi," ci-in a dawng hi.

²²Ni khat Jesu in a nungzuite kiangah, "Tuilipi galkhat lamah galkah ni," a ci hi. Tua ciangin amaute gunkuang ah tuangin a dingkhia uh hi.

²³A pai laitakun amah a ihmu hi. Tuilipi tungah huih le guah kinuai-a gunkuang tuum dektak ahi manin amaute adingin a lauhuai mahmah hi.

²⁴Nungzuite pai-in, "Topa, Topa, tui a kia petmah ding hi ta ung!" ci-in a phong uh hi. Amah tho-in huih le tuihual kinuai a tai ciangin huihpi daipah in a sippah dide hi.

²⁵Amah in a nungzuite kiangah, "Na upna uh koi-ah om hiam?" ci-in a dong hi. Amaute in lau kawm lamdang sa mahmah kawmin, "Hih pa kua hiam? Thu a piak ciangin huih le tui nangawn in ama thu mang uh hi," a kici uh hi.

²⁶Amaute Galilee tuilipi galkhat lam Gerasenes a[33] kualah gunkuangin a pai uh hi.

²⁷Tui gei-ah Jesu a kumkhiat ciangin khuapi panin dawilut mi khatin a na dawntuah hi. Hih mipa in sawt veipi puan silh lo, inn ah teng loin hante lakah a teng hi.

²⁸Amah in Jesu a muh ciangin kiko-a ama khe phungah bokin, "Sang Pen Pasian Tapa Jesu aw, kei bang hong cih nuam na hi hiam? Kei hong bawlsia kei in ci-in kong thum hi!" ci-in a aw neih zahin a kiko hi.

²⁹Ahang in, Jesu in tuapa sung pan tua kha gilo b[34] a paikhiat nadingin thu a pia hi. Tua kha gilo in tuapa tam veipi a man hi. A khut a khete sikkhainiang tawh khihin a cin uh hangin a sikkhainiangte peksatin tua dawi in amah gamdaih na munte ah a hawl hi.

³⁰Jesu in ama kiangah, "Na min bang ahi hiam?" ci-in a dong hi. Amah in a sungah dawi tampi om ahi ciangin, "Legion hi," ci-in a dawng hi.

³¹Tua ciangin amaute Kawhawmpi sungah a paisak loh nadingin ama kiangah a thumthum uh hi.

³²Mual pangah vok hon tampi a gamta hi. Dawite in tuate sungah a lutsak nadingin Jesu kiangah a nget uh ciangin amah in a phal hi.

³³Tua mipa sung pan dawite a paikhiat ciangin vokte sungah lut uh a vok honte kensang pan tuili sungah tuaksukin tui kia khin uh hi.

³⁴Vok cingte in tua thupiangsa a muh uh ciangin tai uh a, khuapi le khuaneute ah a koh uh ciangin,

³⁵bang thu piang hiam cih en dingin mipite a paikhia uh hi. Jesu kiang a tun uh ciangin dawite in a paikhiatsan pa Jesu khe phungah tu-in, puan silh-a, a lungsim pil kik-a om a muh uh ciangin a lau uh hi.

³⁶Tua thu a musate in dawilut pa a kidamsak zia mite kiangah a gen uh hi.

³⁷Tua ciangin amaute lau mahmah uh ahi manin, Gerasenes kuala mi khempeuh in amaute kiang pan Jesu a paikhiat ding a ngen uh hi. Tua ciangin amah gunkuang sungah kahin a paikhia hi.

³⁸Dawite a paikhiatna pa in amah a tonpih nadingin a thum hangin Jesu in,

³⁹"Na inn ah ciah inla Pasian in nang tungah bangzah hong bawlsak cih thu na gen in," ci-in amah a sawlkhia hi. Tua ahi ciangin tuapa paikhia a, Jesu in ama tungah bangzah bawlsak cih khuapi sung khempeuh ah a gen hi.

⁴⁰Mi honpite khempeuh in Jesu a kileh kik ding lamen uh ahi manin, amah a ciah kik ciangin a na muak uh hi.

⁴¹Tua laitakin Jairus min nei synagogue ukpa va pai-a, Jesu khephungah bokin ama inn ah a pai nading a ngen hi.

⁴²Bang hang hiam cih leh kum sawm-le-nih bang a pha pan a tanu neihsun a si dektak hi. Jesu lampi ah a pai laitakin mihon pite in a nehkham dektak uh hi.

⁴³Tua lai-ah kum sawm le nih sung c[35] siluang natna a vei, kuama damsak zawh loh numei khat a om hi.

⁴⁴Tua-nu, Jesu nunglamah pai-in a puantualpi mongtep a lawn leh a siluang a kangpah hi.

⁴⁵Jesu in, "Kei hong lawng kua hiam?" ci-in a kan hi. Amaute khempeuh in a nial uh ciangin Peter in, "Topa aw, mipite in nang hong neh in hong phukhakha uh hi," ci-in a dawng hi.

⁴⁶Ahi hangin Jesu in, "Hong lawng khat om hi; ka tung panin vang a paikhiat lam ka thei hi," a ci hi.

⁴⁷Tua ciangin tuanu in amah kitheikhia veve ding cih a theih ciangin lingsa in va pai-a, Jesu khe phungah a bok hi. Mi khempeuh zakin, amah in bang hangin Jesu lawnga, bangci dampah lian cih thu a gen hi.

⁴⁸Tua ciangin amah in tuanu kiangah, "Ka tanu aw, na upna in nang hong damsak hi. Lungnuamin ciah in," a ci hi.

⁴⁹Jesu a paupau laitakin synagogue ukpa Jairus inn panin mi khat hong pai hi. Tuapa in, "Na tanu si ta hi. Siapa buaisak nawn dah in," a ci hi.

⁵⁰Jesu in hih thu a zak ciangin Jairus kiangah, "Lau kei in; um lel in, tua hileh amah dam ding hi," a ci hi.

⁵¹Amah Jairus inn a tun ciangin Peter, John le James le tua naupang nu le pa longal adang kuamah inn sungah a tumpih kei hi.

⁵²Tua kawmkalin mi khempeuh amah kahin a taamlo uh hi. Jesu in, "Tawp dih un, amah a si hi loin a ihmu ahi hi," a ci hi.

⁵³Amaute in tua numeino a si ahilam thei uh ahi manin amah a nuihsan uh hi.

⁵⁴Ahi hangin amah in tuanu a khutin len a, "Ka ta aw, tho in!" a ci hi.

⁵⁵Tuanu a kha kileh kik a thakhatin a ding to hi. Tua ciangin Jesu in ama nek ding bang khatpeuh a piak dingun a sawl hi.

⁵⁶A nu a pate in lamdang a sa uh hi. Ahi hangin amah in hih thupiang kuama kiangah a gen loh nadingun thu a pia hi.